فرید بھنڈار

میں تے مفتی

ہیر مقابلہ سُن کے

بس وچ بہہ گئے آں 

''ایتکیں میلہ بھکھیا نہیں بئی''

''تھوڑے لوک تے نہیں سن مفتی''

''اِک منٹ وِچ پنجی لنگھے نی مین گیٹ وچوں 

پروں لنگھے سن پینتی- میں تے گنناں''

کولوں کالی عینک والے سِگٹ سِرے نوں جُٹ کے چسکا ماریائے

میں موئے سِلّھے دھوں دا گُھٹ بھریندا سوچناں:

جے اکھاں دَسدیاں ایہدیاں تے میں خبرے ترلا کردا ای

چلو سِرا رہ گیائے

سِرے دا لالچ ہوندائے

''چَدراں وی تھوڑیاں چڑھیاں نیں'' مفتی بولیائے

کالی عینک سرا چُنگھ کے تاکیوں باہر وگایائے

سجرا کڈھ لایائے

''وس بندے دے نہ رہیا جو خدائی ہو گیا

جیہڑا بکرا نہ بنیا کسائی ہو گیا''

سر تے پٹکا کھوڈی داڑھی

گل وچ گھر دا سیتا تھیلا‘ پِنیاں توں اُچی لکدی

''کس ویلے چڑھیائے؟''

''چندہ مسیت دا'' مفتی آہندائے

اوہ پچھوں قوالی کردا نیڑے آیائے

کالی عینک ول رتہ کو لِف کے نچیائے:

''بہتا دھواں جیہنے پیتا اوہ سُدائی ہو گیا''

بس کِھڑ پئی اے

کالی عینک ہس کے باہر وگایائے پُورا

ہسدیاں کالی عینک وچوں جیویں اکھاں شاوا منگدیاں نیں 

کیوں شاوا دا کوئی ڈھنگ نہیں اوہڑیا مینوں 

''دھوئیں رنگ رنگ نیں 

کوئی اِک دھوئیں دا رنگ نہیں 

سو بہتا دھواں جیہنے پِیتا اوہ سُدائی ہو گیا

بہتا لیکھا جیہنے کیتا سو ہوائی ہو گیا''

اوہ نچدا ساڈے کولوں لنگھ گیائے

میں مفتی ول ویکھ کے ہسناں 

''چندہ مسیت دا ویکھی جا توں''

''آہا- بہتا لیکھ جیہنے کیتا سو ہوائی ہو گیا''

''میں ٹکٹ نہ چھڈی تینوں'' ڈِھڈ کنڈکٹر ہسیائے

''ایہہ وھائی کیہڑی آ مولبی'' کھیسی مگروں پچھیائے

''اوہو استبازی'' مائی اگوں دسیائے

اوہ اک پیر تے نچ ہوائی بنیائے اک بانہہ چاء کے

''نی میں جیوندیاں بھُنجے ٹِک نہ سکاں تے چڑھنا پیا اسمانے

مر کے لہنی آں 

ہوائیاں رنگ رنگ نیں 

کیوں وئی مِیئیں بُھکانے''

اوہ گلاں پُھلا کے ڈولن لگ پیائے

''اوئے ساڈے اندر واء جے آپنی

اسیں کیہ جانیئے باہر دی واء نوں 

بہتا لیکھا جیہنے کیتا سو ہوائی ہو گیا

جُماں جنج نال پلس دا جوائی ہو گیا''

مَٹھا مٹھا نچدا

وچ وچ پٹ تے تال وجاندا تھیلیوں کڈھ ورتاوندائے پرچے

''آکھیا نہیں سی'' مفتی آہندائے

''اگوں لا لؤ ٹانکا آپے

کلی گر راہی ہو گیا

چس آوے تاں دیا جے اک رپیہ

نہیں تے موڑ دیا جے

کاگت مہنگائے ایہنے بھاڑا وی نہیں چھڈنا لڈن ملاح نے

جو وی دیوے ست بسم اللہ

نہیں پلے تاں خیریں سلا

میلے مکنے نیں؟''

کئیاں رپیہ دتائے وچ وچ نہیں وی دتا

پھول پھڑایائے کئیاں پرچہ

''باراں ویچ گیائے

دس وی بساں دن دیاں بھگتائے تاں اک سو ویہہ

لاگت پنجی‘ پنجی کرایہ‘ کھٹ گیا ستر'' مفتی آہندائے

''کیہ ناں جے مولانا- گھر کتھے جے''

''خطائی کلی گر- موضع وڈا گھر

ڈاکخانہ اٹھ پہرا براستہ نورا کھاڑا''

بزرگو اصلی ناں دسو ناں ہاسا چھڈو ساڈا کم اے

عوامی شاعراں دی گرداوری کرنے آں''

''جو کرنے آں سو ای ناں اے- بھرو کھتونی

اگے اصل سی کھوڈا نقل قلاعی

ہُن نال خطائیاں لائیاں نیں 

ہُن نقل قلاعی اصل خطائی

جیہنوں چڑھ گئی قلئی اوہ کمائی ہو گیا

بھانڈے وک گئے تے کھوڈا وی خطائی ہو گیا''

اوہ پیسے پرچے تھیلے سٹ کے نچدا نکرے بہہ گیائے

آپنا آپنا میں تے مفتی پرچہ کھول کے پڑھنے آں 

ساڈے پڑھدیاں کدھرے لہہ گیائے

مفتی پرچہ بریف کیس وچ دھر کے آہندائے

''تک بندی اے

بے وزنی بہتی''

''یار گل کراری کردائے- نہیں؟''

''ثابت مصرعے آپنے نہیں نا''

''جان دے مفتی''

''من وی‘ منظر لکھوی دے نی''

''اوہ کون اے''

''مر گیائے پچھے- توں کھونجے وڑ کے آپنی گھچ مچ کردا رہنائیں 

نہ کوئی سُندائے نہ کوئی گِندائے

اسیں ہوئے تنظیم دے بندے

ساڈا کم اے لکھن والے نال رابطہ رکھنا

استاد سی اردو کہندا سی

جتھے گیائے مشاعرہ لٹیائے

کسے دا دیوا بلن نہیں دِتا

میں لکھوائی اے پنجابی کھیہڑے پے کے

اوہدے مصرعے نیں 

پُتر آ گیائے کسٹم وچ- میں آکھیائے

کٹھیاں کرو پنجابی چیزاں پیو دیاں چھپوا دینے آں''

کالی عینک سگٹ لا لیائے

میں پرچہ ٹھپ کے کِھیسے پا لیائے