”متھّا میرے نال تُسیں کیوں لاؤندے او پئے“
”اسیں تے چیتا پئے کراونے آں
کم دا تُہانوں“
”کیہڑے کم دا؟“
”جیہڑا آہندے ہوندے سَو
کرن ایہو ای آئے آں“
”اوہا تے کرنے آں پئے، ہور کیہ“
”لکھاں دی کیتی اپنی کری آوندے او
ایہہ اوہدا اُلٹ نہیں؟“
”ایسے اُلٹ وچوں
پُلٹ وی جم پینا اے اپنے آپ ای
نَوں مہینے پُورے اُڈیکو“
”نَوں صدیاں“
”نہیں ہُن اٹکل پلو پل پئی نوِیں ہوندی اے
نَوں صدیاں ہُن نَوں ورھے ہو وینے نیں“
”ول نَوں مہینے؟“
”آہو، کیوں نہیں“
”تے نواں جنم جیہڑا تُہاڈے من نے
لے لیتا اے ایتنے چِر وچ
اوہدے پلٹن وچ کِتنے
ورھے مہینے پل لگنے نیں“
”ایہہ حساب کرن لئی
کرو پسند تے ٹھیکہ تُہانوں دینے آں،
اوہدے وچوں کُجھ حصہ تعلیم صحت لئی
دینا چاہو تے دے دیویا جے“،
”اسیں ہُن چلنے آں“
”آہو جاؤ
جاون وی کم ای ہویا
جیہدا اُلٹ مُڑ آون اے“