فرید بھنڈار

خیر جہاں:      کِتھے ای پنڈت تیرا-

وِیرو:   جیہدا بھنڈارا اوہدا ورتارا- میرا کِتھوں، آکھ آئی آں - آوندا ہوسی- پوتھیاں بھالدا

خیر جہاں:      سچ آہنی ایں - جو جیہدا کھاوے اوہدا ای ہوندا اے-

وِیرو:   تہاڈا ای ہویا نا-

خیر جہاں:      میں تے آپ کِسے دا دِتا پئی کھانی آں - لہہ گئے نیں بھلیکھے سارے- پیٹ رکھ پالی وی میری نہیں - بادشاہ دی اے- چاہے تے رکھے چاہے تے مار دیوے-

وِیرو:   آکھاں تے متاں مینڈی جِبھ کِھچی ونجے- ہے ایہہ انھیر

خیر جہاں:      جے میں روواں تاں اکھاں کڈھی ویسن-

وِدیا ناتھ:        (آ کے نِیوں سلامیا اے ہتھ جوڑ) معافی سرکار- آون وِچ ڈِھل نہیں کیتی میں -

خیر جہاں:      پوتھی ویکھن وِچ ای وقت لایائے تُساں مہاراج-

وِدیا ناتھ:        میں خادم آں -

خیر جہاں:      ایس ویلے تے مینڈی جان تہاڈے ہتھ اے مہاراج- تہاڈے آکھن تے مینڈی ترسیویں دی جائی نوں مارن دا حُکم تھی گیا اے-

وِدیا ناتھ:        میں کون، مینڈا آکھیا کیہ سرکار- اساں تے نوکری پئے کرینے آں ستاں پُشتاں توں ایس تخت دی-

خیر جہاں:      دِھیاں مارن دی

وِدیا ناتھ:        حضور نوں اطلاع غلط مِلی جاپدی اے- میں تے علم دے حساب دسیا اے جو شہزادی دا پرچھاواں تخت لئی بھارا اے-

خیر جہاں:      میں اوہنوں لے کے کِدھرے نِکل ونجاں -

وِدیا ناتھ:        سرکار وی تخت دا انگ ہو- تہاڈی گود وِچ ای تخت دے وارث کھیڈنا اے- ایہہ علم اے قیافہ نہیں مینڈا- تہاڈے لئی، جام سرکار لئی، شہزادی دی تک مہلک اے-

خیر جہاں:      سو میں تاں موئی پئی آں - مینڈے پیٹ وِچ اُلیکی پئی اے اوہدی تک-

وِدیا ناتھ:        حضور دھرتی دے اندر بی دا پرچھاواں نہیں ہوندا- دھرتی دے اُتے ہوندائے جد بی رُکھ بن کے باہر آوے-

خیر جہاں:      میں پیکیاں دے گھل دینی آں ایہنوں -

پنڈت:   شاہی جات نال اوہدا لاگ لِکھیا ای نہیں ہویا-

خیر جہاں:      واسطہ ای اپنیاں پُرکھاں دا وِدیا ناتھا- جیہناں دا نام سمرنا اے اوہناں دا- مینڈی دِھی دی جان بچا دے- میں دیندار رہساں ساری حیاتی-

وِدیا ناتھ:        اساں نوکر آں - سرکار دی دِتی چھت، تے تھالی گراہی چھناں بہوں اے- دھن دولت تے ساڈی مندراں دیاں سردلاں نیں جتھاں کرتار دا نام پوجیندا اے-

خیر جہاں:      مینوں اوہناں مندراں دی داسی گِنو- جو سیوا وی ہووے- کیویں بچدی اے مینڈی بچڑی-

وِدیا ناتھ:        وگدے پانی وِچ- بُرجاں دا پھیر ہے ایہہ وی- پوتھیاں دے ورقے وکھ ہو ونجن تاں اساں وگدے پانی دے حوالے کر دینے آں - بعضے ویلے لکھتاں سچیاں وی بھاریاں ہو ویندیاں نیں -

خیر جہاں:      ہتھیں روڑھ دیاں

وِدیا ناتھ:        وگدا پانی روڑھدا ای نہیں تار وی کھڑدا اے-

خیر جہاں:      (سوچ کے) کون تارے

وِدیا ناتھ:        وگدے پانی دا رُخ- ساڈا علم تے جاچ ای سکدا اے- باقی سرکار دیاں اہلکاراں دی کار اے-

خیر جہاں:      میر ورمانی نوں سمجھاؤ تُساں ایہہ گل-

وِدیا ناتھ:        میں اوہناں نوں شُبھ گھڑی دی دس پا دیساں - حضور دا حُکم اے تے- (ہتھ جوڑ نیوندا اے)

(اوہلا)