”بھا شپیا ایہنوں سیدو پَھپّھے کُٹن نوں ڈک لؤ“
”کیوں؟
کُٹ کھادا اے پَھپّھا اوہنے ساڈے شَونکی دا؟“
”گل مخول دی نہیوں بھا“
”ہس کے کر نا پھیر“
”دو دِن ہوئے جے
جدوں میں لنگھناں آہندی اے پُھمنی پا کے……“
”نہ، کر تُوں وی پُھمنی پا کے اساں تاں سُننی او“
”بوڑھ لگّا جِس ویڑھے
اوہ گھر اُجڑ گیا-“
”آہا،
تے تُوں کیہدے گھر لواؤ ایں بوڑھ شَونکی“
”ایہہ اوہنوں پُچھو نا
اِنج چِھبیاں دیندی اے مینوں جیویں میں بوڑھاں دا ٹھیکیدار ہوواں
گل دُھمی ہوئی اے اوہدی دُھمائی
جِتھے گھر اے ساڈا اوتھے بوڑھ سی پاکستانوں پہلے“
”بوڑھ ای بوڑھ سی جگ سارا شَونکی
لہور تے کل پیا پَیندائے
تیرے وِچوں گولھ کوئی سُنگھی اے اوہنے
دِل تیرے تے آیائے“
”ہے چُڑیل بھا شپیا
پر پُھمنی پاوندی لک اوہدے جیہا کوئی نہیوں پھیردی
ہیرا منڈی وِچ وی“
”تُوں ہُن کالج سائنس پڑھاون لگائیں میاں
پُرکار تیری ہُن لک پِھرنی ہر رنگ دی مِن سکدی اے“
”ہن پُرکار دی لوڑ نہیں بھا
لیپ ٹاپ تے آگیائے سبھ کُجھ“
”رونی وجہ تیری ویکھ کے شونکی
میں سمجھیا گُٹ لہا آیائیں توں سیدو کولوں“
”پہلوان دی دِھی اے کِسے دی؟“
”وینی پھڑ ویکھ نا
بڑے بڑے سُور لہا بیٹھے نی گُٹ اوہدے کولوں“
”ہے تے سُکا چِھلڑ“
”وِچوں لوہا ای
میرے نانکے پِنڈ دی او پِچھوں
نِکی ہوندی گھر سانبھیا ہویا سُو
سرگھی دُدھ چونا ترونہہ مجھاں دا
پیو نوں دے ٹورنا شہریں مجھاں سابنھنیاں
ونڈا بناونا پٹھے وڈھ لیاونے پاونے
پیو نہ ہووے تاں ہل جو واہنا
پہریں پنیری لاونی پانی وِچ کھلو
لتاں چوں لنگھدے سپ میں آپیں ویکھے
گھر آ ٹُکر پکاونا
آنڈھ گوانڈھیں جا کم وِچ ہتھ پواونا
شامیں مشین دھر لینی
آل دوال دِیاں ماسِیاں پُھپِھیاں دِھیاں دے داج سوانے
تائے دا پُتر ویاہ لے لہور آیا
ہٹی پساری دی سی
رَولیاں چ وڈھیا گیا
آپ ہٹی تے بہہ گئی
گھر ویچ دِتا
ہٹی پِچھلے اندر تدوکی رہندی او
جیہڑا کماوندی اے رہیاں کھہیاں نوں دے آوندی او
سُوہ کِسے نوں لگن نہیں دیندی
تُوں وی شپ ای سمجھ ایہہ میری شَونکی
متے گل کر بیٹھیں
سَپ ای، لڑا نہ لئیں
گل داء نال کردی اے پتہ پِچھوں ای لگدائے“
”پھپھے کُٹن جو ہوئی“
”آپ وی اپنے آپ نوں ایہا آہندی اے
ایہہ بولی بوڑھ والی
پُرانی سُنی ہوئی سی اوہدے کولوں میں
سمجھ نہیں سی آئی
میں میئیں گنڈوئے کول ای جاناں
بُوٹے بُوٹی پکھو جنَور دا بھیت پُچھن
تینوں پتہ ای اے
کِنّا چِر اوتھے لگدائے
میں پُچھیائے بوڑھ دا
ادھا گھنٹہ جِلد کتاب دی جوڑ میئیں سِر چُکیا اے
’تینوں سُنائی اے سیدو شپُو؟‘
’جی میاں جی‘
’ورتی پلّے بنھی ہوئی سُو
گل پُرانی، ہے پر سچی
جُھگا ہووے حویلی ہووے
گھر ہویا وکھرا تیرا میرا آل اولاد لئی پایا
بوڑھ تے ہویا دُھر دا رانجھا
کُن فیکونوں اگے دِیاں لگِیاں اوہنوں
کُل ہِیراں دا سانجھا
پَھپّھے کُٹنیاں دا
گھر دُوار نوں راس نہیں اوہدی چھایا،‘
’پر میاں گنڈویا
گوتم بُدھ وی بوڑھ تھلے ای بہہ کے سُدھ نہیں ہویا؟‘
’آہو شپُو
گھر بوڑھ ہیٹھ گوایا
تاہیوں ہو موکلا آیا‘
حرف حرف کر گھنٹہ لا کے میئیں گنڈوئے گل شَونکی پُوری کیتی
مائی برساتی گُڑ کالا مینوں کھور پھڑایا سنگھنا
گُھٹ گُھٹ کر کر ادھا گھنٹہ میں پیالی پیتی
ادھا گھنٹہ پَوڑی پَوڑی لہہ شپّا چونک وِچ آیا“