فرید بھنڈار

''اجے آ کے مساں بیٹھے آں، تُوں آکھنی ایں جا

''پہلوں پچُھ تے سہی کِتھے''

''دس''

''پہلوں جُتیاں تے پا''

''پئیاں''

''ایہہ لے پیسے پھڑ اُٹھ سِدھا مال روڈ جا''

''گیا''

''مُڑ بھنگیاں دی توپوں پھیر نیلے گنبد آ''

''آیا''

''کھبے ہتھ ہو وڑ تُوں انارکلی''

''پھیر''

''وگ نک دی تُوں سیدھے''

''تے لُہاری وڑ دھا؟''

''نہیں، مُکّے جاں انارکلی مُڑ سجے ہتھ

''اگے آسی ہَٹّی امبرسرئیے مچھی وال دی

''اوتھوں پلّہ تِھندی اَتے پلّہ خشک وی لیا

سڑک ٹپ تے دوکان اگے نان والی او

تِن روغنی تے تِن سُکّے آپ لوا

پرت سِدھا ایتھے آ

بہہ کے نال ساڈے کھا،

یاد کر دن جیہڑے بھُکھیاں لنگھائے نی''

''سُن ساری گل تیری دِن اوہ پھیر آئے نی''

''اُٹھ کیوں کھلوتائیں''

''سنگی بھُکھیاں نُوں بھال

میں کریساں ہِمتال،

موگھے رِدیاں دے کھول

تار سکھنے تلاء،

وِچ ترسائیں تُدھ میں مَچھ مچھیاں

تَسّے جی سارے ہو وَیسائیں دریا''