اُچیاں سرُوٹاں وچوں راوی تلکے پئی
گھاہ ککا وچ گالھڑ چُنگھی
رات چاننی ڈولے پھرن ملاحاں دے
کہ لُکن چوراں دا
کہ ڈُھکن یاراں دا
سِکن چنن جیہے پَٹ وچ سپنی چلکے پئی
ترکھے جھل وچ کون وڑے؟
پکیاں رنگاں اپر ککے وال کَھڑے
تردی اکھیں سیک جیہا اقراراں دا
کہ چڑھت فرنگی دی
سنیہڑا واہراں دا
راوی تلکے پئی
ننگیاں ٹھوکر بَرجیاں
فی بُرجی اک‘ بُکل بگلے پال کھڑے
پرکھن پونگاں نھاوندیاں
نِسل تَھڑیاں اپر تھوک وپاری نیں
میز وکیلاں منشی باہر کچہری نیں
تھانے دُھپے تیل ملا کے ڈیہے سپاہی مَنجے
کہ عالم اَڈے بھال کھڑے سرکاری نیں
راوی تلکے پئی
چھل جُفتی وچ مست لہر دے ڈَمرے نوں
کنڈھے ٹھوکی چھمک اُڈیکے بنھ گھنگرو
لیوی بُرخے وچوں کُنڈی تاڑے پئی
اِک لَت تے یاد الٰہی بگلے نوں