]سن 78ء دے لہور دا اِک ''مزدور علاقہ''- ایتھے اِک مزدور پارٹی ولوں ''کلچرل پرگرام'' ہوون والا اے-[
رات دا ویلا اے- اِک چُنکرہ تھڑا اے- تھڑے دے ساہمنے تے سجے کُھلا پِڑ اے- پِڑ وِچ دریاں وِچھیاں نیں - تھڑے دے پچھلے بنے کنات لگی ہوئی اے- کنات دے کھبے سِرے بُوہا رکھیا گیا اے کاغذی جھنڈیاں نال سجایا ہویا- کنات اُتے لال کپڑے دے دو بینر لگے ہوئے نیں – ''دُنیا بھر کے مزدورو………… ہو جاؤ''
''……………… کا راستہ ہمارا راستہ''-
بینراں وِچ وٹاں پاروں دو لفظ پڑھے نہیں جاندے-
سواہرا نِما چاننا- کجھ بال جنانیاں جَنے ویکھنہاراں والے پاسیوں پِڑ وِچ آن بہندے نیں پئے- ایہہ کھیڈ دے ویکھنہار وی ہن تے کھیڈ دا اِک پاتر وی- ایہہ پاتر پِڑ وِچ کدیں چاننے کدیں انھیرے رہندائے- چاننے ایس پاتر دے کئیں رنگ نیں - کدیں چُپ بیٹھا سُندا اے- کدیں کُھل کے کھیڈ وِچ رل وَیندا اے- انھیرے ہوندیاں وی ایہدا اِک رنگ اے- کالا ادھ گُجھا پر اَت گُوڑھا-
]پِڑ مُناکُ بھر گیا اے- دو پنجھیاں تریہاں دے جَنے دِتا تے راجو عوامی سُوٹ پائی تھڑے اُتے نِک سُک ٹھیک کردے ویہلے ہوئے نیں - پِڑ انھیرے ہو گیا اے تھڑا چاننے-[
راجو: فس کلاس بندوبست ہو گیائے یار-
دِتا: …………چلو جو وی ہو گیائے-
راجو: ہُن عاشق لے آوے سہی آرٹسٹاں نوں -
دِتا: کلا ای مُڑ پئے تاں وی بڑی گل اے-
راجو: کِسے کِسے ویلے مینوں تیرے تے بے وساہی ہو جاندی اے- ایہو جیہیاں گلاں سُن کے-
دِتا: تہاڈیاں بے وساہیاں صدقہ رہیا کھہیا ست وی گوا لواں گے-
راجو: ست گوانائے تُسیں آپنیاں کیتیاں نال- سانوں ورت لینا اُلاہمیاں لئی-
دِتا: جے کیتیاں دی ونڈ دا ویلا آ گیائے تے پھیر ہر کِسے دِیاں آپو آپنے نال-
راجو: میں نہ کدیں کِسے دی کیتی آپنے ناویں لوائی اے نہ آپنی کِسے دے متھے مڑھی اے- لاہ پھاہ کرن تے آ جاندائے- کیہ آکھیائے میں - ایہو بئی اینے چِر دے جوں شاعراں تے گاون والیاں دے ناں لِکھ لِکھ کے ڈھیر لاوندے رہے او- تے ہُن ایس ویلے آہنائیں کلا ای مُڑ پوے-
دِتا: چوکھا کُجھ ہووے پر ککھ وی نہ ہووے- ایہہ بہار اے ساڈے تے- ایس بہارے ڈھیر سارا بُور پیندائے- پر پَھل نہیں بندا- پُھل کے جھڑ جاندائے-
راجو: اِک تے شاعریاں لے کے بہہ گئیاں نیں تہاڈیاں - اِنج دیاں گلاں کر کے شِیرے وِچ پا لیندائے بندہ آپنے آپ نوں -
]عاشق آوندائے- عمروں راجو تے دِتے دا ہانی اے- گل رتا پٹکا سو-[
دِتا: کِتھے نی بئی اوہ- کون کون آؤسیا-
عاشق: آکھ تے ساریاں نوں آیاں - آونا کِسے نہیں - وِچوں ڈردے نیں لیوی
نہ لہہ ونجے اُتوں بھاراں تے پوندے نیں - کاغذ دیاں پراں والے-
دِتا: تے ہن پھیر کرنا کیہ جے- لوہے دیاں پراں والیو-
عاشق: کجھ کرساں ای نا- آپنا دم تے ہے ای-
راجو: اوہ خیر ہووے- رتا پٹکا جو آگیائے- ایہو بڑائے-
دِتا: آپ تے ہے آں - اوہ گل نہیں - میں تے فاروق تے مجلسِ عاملہ دی
پیا سوچدا ساں -
راجو: تیرے سِر تے ہر ویلے اوہو سوار رہندے نیں -
دِتا: اسیں بنے جوں سواری جوگے ہوئے-
راجو: پھیر شِیرا- جد تائیں گلاں دا شِیرا نہیں مُکدا ساتھوں ککھ نہیں ہونا-
دِتا: تے جِتھے گلاں سُکیاں نیں، کڑاکڑ بولدیاں، تے عملاں چوں شِیرا چو چو
پیندائے، اوتھے؟
عاشق: جے میں پنج سو گویئے تے ساڈھے پنج سو شاعر گھیر لیاوندا تاں وی فاروق کیاں اوہو کرنی ہئی جیہڑی ہُن کرنی نیں - (ہس کے) سچ راہ چ بھولا بھنڈ ٹکر گیا- اَکھے ویاہ چلیائیں - مخے جلسہ اے یار- اکھے اسیں وی آجائیے- آجاؤ مخے- میں سوچناں جدوں آ دھا تے آ گئی گل- سچی مچی لے آونائے میں اوہناں نوں - مُڑ جٹ جانے تے بِجو جانے-
دِتا: بوٹے پٹیئے تاں جے اگوں لاون جوگا کُجھ ہتھ وِچ ہووے-
عاشق: ایہہ بُوٹے نہیں امبر ویل نیں -
دِتا: تے اسیں کیہ آں - ساڈے پلے کیہ اے-
راجو: شِیرا- اسیں شِیرے دِیاں مچھیاں -
دِتا: جیہڑا ماواں ساڈیاں نے جمدیاں مُونہاں وِچ چویا-
عاشق: ماواں کیہ کردیاں وچاریاں - جیہڑا شِیرا اوہناں کولوں ساڈے پیو نہ لے سکے اوہناں پُتراں دے تالواں تے ای لِمبنا ہا کے-
دِتا: پیو کیہ کردے وچارے- بُھکھ دی غلامی نے اوہناں دِیاں کھلاں وِچ نرمیش ای نہیں سی چھڈی-
راجو: اوہ کیہ کردے وچارے اوہ کیہ کردیاں وچاریاں - اسیں کیہ کریئے وچارے- لڑے کیوں نہ- لڑدے- مر جاندے لڑ کے- (کھلیر) خبرے کیہڑیاں جُگاں دے کِیرنے پھولن بہہ جاندے نیں - اگلی نہیں سوچدے-
]باہروں وِرلے وِرلے نعریاں دا واج آوندا اے- جدوجہد- جدوجہد- بند کرو- بند کرو………………ہمارا راستہ- ہمارا راستہ………………واپس لو واپس لو-[
]دِتا نُکروں کپڑے دے جھولے وِچوں گُٹے دے ہار کڈھ کے راجو تے عاشق نوں اِک اِک پھڑاوندائے- اِک آپ پھڑ لیندا اے- نعریاں والی ٹولی کنات والے بوہیوں ڈُھکدی اے- تھڑیوں محنت کش اتحاد زندہ باد- قائدِانقلاب محمد فاروق خاں - زندہ باد- دے نعرے لاوندی پِڑ وِچ لہہ کے کھلو جاندی اے- پِڑ ادھ چاننے آگیا اے پورا اکٹھ کھلو گیا اے-تےنعریاں وِچ رل گیا اے- فاروق ہاریں لدیا اندر وڑدا اے- آلے دوالے کُجھ تگڑے جنے اوہدے نال جُڑے ہوئے نیں - دِتا عاشق راجو فاروق نوں ہار پواندے نیں - پواندے کیہ نیں اگلیاں ہاراں تے ہار دھر دیندے نیں - فاروق ہاراں توں اُتیرے باہواں چا کے نعرے وصولدا اے- تگڑے جنے اگیرے ہو کے خلقت نوں بہن دیاں سینتاں مریندے نیں - فاروق تے اوہدے نالدے خلقت موہرے پِڑ وِچ بہہ جاندے نیں - عاشق دِتا تے راجو وی-خلقت دے بہندیاں دِتا تھڑے تے چڑھدا اے-[
دِتا: ساتھیو- میں ثقافتی کمیٹی ولوں تہانوں ساریاں نوں مجلس عاملہ دیاں ممبراں نوں تے آپنے صدر ساتھی محمد فاروق خاں صاحب نوں جی آئیاں آکھناں - ثقافتی کمیٹی نے اجدے اکٹھ لئی محنت کشاں نال ہمدردی رکھن والے ملک دے منے پروّنے دانشوراں فنکاراں اتے شاعراں نوں سدا دِتا ہویائے- ہو سکدائے اوہناں وِچوں کُجھ آپنیاں رُجھاں پاروں ویلے سِر نہ اپڑ سکن- ویلا ہو گیائے- میں صدر صاحب دی اجازت نال ساتھی عاشق ہوراں نوں درخواست کرناں اوہ اج دا پروگرام شروع کرن- ]دِتا تھڑیوں لہندا اے- عاشق چڑھدا اے- کھلو کے گل کرن لگدا ای اے تے باہروں ڈھولکڑی نال کُجھ پاٹیاں واجاں دا گاون رولا اندر آوندا اے- بھولا بھنڈ تے اوہدے دو بھرا مَیلیاں دھوتِیاں اُتے مَیلے جھگے پائی اندر آوندے نیں - پنجھیاں پَینتِیاں دے گیڑ وِچ نیں - بھولے دے ہتھ ولَیتی دُدھ دے سکھنے ڈبے دی ڈھولکی اے- 2 دے ہتھ پٹاس اے- 3 تاؤڑی پیا مریندا اے- تریوے تھڑے تے کھلو کے گاوندے نیں - عاشق پہلوں گھابر کے بھنڈاں نوں ٹھاکن دی کردا اے مُڑ اچنبھے ونی مُسکار نال کھلوتا رہ جاندا اے تے اوڑک لہہ کے پِڑ وِچ بہہ جاندا اے-[
بھولے ہوریں: (سہرے دے سُر وِچ)
سُکھاں نال آئی سانوں اجدی رات اے
بھاگاں نال آئی سانوں اجدی رات اے
اے نی اجدی رات برات اے
جو مُونہوں منگیے مِلے
بھینا رات کیہ اے شبرات اے
جو مونہوں منگیئے مِلے-
]تھوڑا چِر گوں کے بھولا ''ڈھولکی'' ہاراں دے ڈھیر کول دھر دیندا اے[
بھولا: بُررر اللہ دی امان-
2: دوارے وسدے رہن-
بھولا: ایہہ کِتھے آ وڑے آں بئی- پتہ تے گلت نہیں -
2: پتہ تے ٹھیک اے تُسیں برنگ او خیر نال- لؤ ٹِکٹ لوا لؤ- (پٹاس)
بھولا: میں اجے وی آہناں مُڑ چل-
2: کیوں -
بھولا: نہ دیگاں دا کھڑکار- نہ پلاء دی ہواڑ- ایہہ برحمی والیاں دا دفتر نہ ہووے کِتے-
2: مریں (پٹاس) تے ایہہ جیہڑے بیٹھے نیں ایہہ کون نیں -
بھولا: مینوں تے آپنے بھرا ای لگدے نیں -
2: مریں (پٹاس) ابّے تہاڈے نوں عربیاں ٹھیکا دِتا ہونائے نا بھنڈ سپلائی دا-
بھولا: میں اجے وی آہناں مُڑ چل-
2: کیوں -
بھولا: (بھیت نال) ایہہ کوئی شک والی تھاں اے-
2: (کن کریندیاں) ہیں!
بھولا: (بھیت نال خالی گُٹ توں ''گھڑی'' وکھا کے) پورے پنج منٹ ہو گئے نی جُگتاں کردیاں - ایہناں نوں ہاسا ای نہیں آوندا-
2: مریں (پٹاس) وجہ ویکھو آپنی خیر نال- تہانوں ویکھ کے رووے کوئی کے ہسے- ہاں جی- میں کہیا ایتھے اج جلسہ سی مجور بھراواں دا-
بھولا: اوہ نہیں ہو سکیا-
:2 کیوں؟
بھولا: ہڑتال ہو گئی اے-
2: بکواس نہ کر اوئے- اجکل کیہڑی بہار اے ہڑتال دی- بزاراں چِ ون سوَنّا سودا اے- مجور بھرا دِنے سُکھ نال دیہاڑی تے جاندے نیں - شامیں بال بچے نال ٹیلی ویژن ویکھدے نیں - جمعے والے دن نہا دھو کے اللہ دے حضور وِچ پیش ہو جاندے نیں -
بھولا: نہیں قسمے میں پتہ جو کیتائے ہڑتال اے-
2: پر کاہدی اوئے-
بھولا: بھنڈ آ گئے سن مالکاں ویلاں نہیں سینکشن کیتیاں -
2: مریں (پٹاس) لے پھڑ بونس-
3 ]اگانہہ ہو کے جھٹ کھلو کے ویکھدا اے- مُڑ تہمت لتاں وِچوں چِھک کے پِچھے ٹُنگ کے پتلون بنا لیندا اے- سینت دی سوٹی کچھے مار کے ''پتلون'' دے کھیسیاں وِچ ہتھ پا کے کھلو جاندا اے-[
3: خبردار اوئے- کوئی نہ ہلے- جام ہو جاؤ جِتھے او-
]بھولا، 2 اٹینشن ہو جاندے نیں مُڑ آپے ای سٹینڈ ایٹ ایز-[
3: نہیں اوئے- اٹینشن! (بھولا، 2 مُڑ اٹینشن) تہانوں پتہ اے ایہہ کیہ تھاں اے؟
بھولا: (کنبدیاں) پتہ ہوندا تے تہاڈے متھے کیوں لگدے بڈاوا ساب-
3: (سینت دی سوٹی مریندائے) بکواس نہ کر اوئے- باشٹر- ڈیم فول- ایہہ مجوراں دا جلسہ اے کوئی مخول نہیں - ایتھے کِسے نوں اجازت نہیں وادھو گل کرن دی-
2: تے سرکار میری اسیں کوئی سیاسی تقریر تے نہیں کیتی جُگتاں ای کرنے آں پئے-
بھولا: تُسیں تلاشی لے لو سرجی- کوڈی ویل دی نکل آوے تے جمع کرا دیاں گے رسیدوں بغیر ای اللہ دی امان-
3: دونہاں نوں ویہہ ویہہ سال قید- خموش!
2: تھوڑی بہت رعایت-
3: اک نوں دس کوڑے اِک نوں پنج کوڑے، خموش! (سوچ کے) تہاڈے چوں کوڑے کیہنوں مارنے آوندے نیں اوئے-
2: دونہاں نوں سرکار میری- اسیں خاندانی جلاد ہوندے جے- بھنڈ تے ایویں پارٹ ٹائم ہوئے کے-
3: بس ٹھیک اے- ویری گُڈ- توں ایہنوں کوڑے مار ایہہ تینوں مارے- قوم کو تم پر فخر ہے-
]3 اگے ودھ کے 2 نال ہتھ ملاوندا اے- جیویں انعام یاں سند دین لگیاں ملاوندے نیں - بھولا ہتھ دا کیمرہ بنا کے پریس فوٹو گرافراں والے پینترے نال دو تِن واری فوٹو لیندا اے- 2,3 دا ہتھ پھڑی کیمرے ول ویکھ کے فوٹو لہاوندا اے- مُڑ 2 پِچھے ہٹ کے سلوٹ مریندا اے- مُڑ پٹاس دا کوڑا بنا کے چھنڈدا اے- مُڑ کوڑے نوں کُڑتے ہیٹھ لُکا کے اِک دم اُنڈا ہو جاندا اے تے ہولی ہولی نسدا بھولے تے 3 دوالے چکر لاون لگ پیندا اے-[
2: کوٹلہ چھپا کے جمعرات آئی جے- کِسے مُنڈے کُڑی دی برات آئی جے- گھر مِٹھے چولاں دی پرات آئی جے- جیہڑا پِچھے ویکھے اوہدی موت آئی جے- ]2 دے چکر لاؤندیاں بھولا تے 3 ہولی ہولی بہہ جاندے نیں جیویں کھیڈ وِچ سج رلے بال ہون- اکھاں نُوٹ لیندے نیں تے وارو واری کنڈ پِچھے ہتھ مریندے نیں - 2کوڑا سُٹن دا جھاکا دیندا اے پر سٹدا نہیں - کُجھ چکراں مگروں 3 اُبھڑواہے اکھاں کھول کے کھلو جاندا اے-[
3: اوئے! اوئے!!
2 ] '' کوٹلہ چھپا کے'' کردا مشین وانگر چکر لائی آوندا اے- چکر تیز ہوئی جاندے نیں - اوہدیاں اکھاں ادھ نوٹیاں نیں - بُل آپنے آپ پئے ہلدے نیں - مُونہہ تے اِک عجیب جیہا بے وسا جوش اے جیہڑا حال کھیڈن والیاں دے مونہہ تے ہوندا اے-[
3: (بھولے نوں) اِس کو رو کو-
بھولا: ایہہ نہیں رُک سکدا-
3: کیوں -
بھولا: ایہدے پِچھے کوئی غیبی ہتھ اے-
3: (مونہہ وِچ اُنگلاں دے کے سیٹی مریندا اے- 2کھلو جاندا اے-) ایہہ کیہ پکھنڈ بازی اے- (بھولے نوں ٹُھڈے نال اُٹھاوندا اے) اُٹھ اوئے- توں وی وچے ای ایں - تم کو پتہ ہے یہ عدالت ہے- تم کو توہینِ عدالت کی سزا……
2: (بھولے نوں ہُجھ مار کے) رحم دی اپیل کر اوئے-
3: ہتھ تے کیوں بولنائیں اوئے- پہلوں سزا سُن- تہانوں کیہ پتہ میں سزا
دینی وی اے کے نہیں - ہو سکدائے میں تہاڈا ای فائدہ سوچیا ہووے-
بھولا: سزا سُناؤ سرکار تُسیں - ایہہ تے ایویں بیوقوف جے- ایہنوں عدالتی کاروبار دا تجربہ نہیں نا-
3: کوڑے! تا برخاست عدالت- (چونکڑا مار کے بہہ جاندا اے)
2: اوئے ہوئے- اوئے ہوئے-
بھولا: حال اوئے-
]2 کنبدا کنبدا 3 دے مگر جا کے ملکڑے اوہدے کھیسے نوں ہتھ پاؤندا اے 3 اوہنوں نپ لیندا اے-[
3: ایہہ کیہ کرن لگا سیں -
2: او سرکار ذرا ڈبی سِگٹاں دی دے دیو وصیت لِکھنی سی-
3: خبردار اوئے- ایڈی وڈی عدالتوں سزا لے کے آپنی اوقات بُھل گئے او- ہونا سی کلاس مانگت تے کرنیاں وصیتاں - اوہ وی لِکھ کے- مُونہہ زبانی بول جو بکنا ای-
2: (روون ہاکا) میں کُل عالم دیاں بھنڈاں نوں وصیت کرناں پئی مُجوراں دیاں جلسیاں چِ نقلاں کرنیاں ہون تے ویلاں گھروں لے کے آیا کرو-
بھولا: نہیں سرکار میری- ایہہ وصیت ای گلت ہوئی اے- گھر ایہدے ابّے نے نوٹ چھاپن والی مشین لائی ہوئی اے؟ میں درخواست پیش کرناں وصیت ایہو رہوے- پر تُسیں ایہدے وِچ آپنے ہتھ نال اِک ترمیم کر دیو-
3: بول- (لکھن دا پینترا)
بھولا: بس جی ایہو بئی ویلاں جمعرات دے جمعرات درباروں کٹھیاں کر لئیاں
تے جلسے توں اِک دن اگوں ججماناں نوں ایڈوانس پھڑا دتیاں - (اکدم گوڈے پھڑ کے) باقی سرکار رحم کردیو تہاڈے مانگت آں - نِکا نِکا بال بچہ اے-
3: بس اوئے- اپیل دا ویلا تُسیں وصیت وِچ گوا دِتائے- خاندانی جلادو- تم کو حکم دیا جاتا ہے کہ قنون کے مطابق آپو آپنا فرض پورا کرو-اس وقت قوم کی آنکھیں تم پر لگی ہوئی ہیں -
2: (نیوں کے) حضور- (بھولے نال) چل بئی پہل تیری سہی-
]بھولے نوں ہتھ اتانہہ تے لتاں چوڑیاں کرا کے ''کِڑکّی'' وِچ کھلیاردا اے- اوہنوں ٹُوٹی لاوندائے- اوہدی نبض ویکھدا اے- ڈنڈ بیٹھکاں ماردائے- ڈَولے ویکھدائے تہمت ٹُنگدائے- نچ کے ببلی ماردائے- مُڑ قدم گِن کے بُھنجے نشان رکھدا اے- جیویں فاسٹ باولر ہووے- باولراں وانگر پِنڈا نِسل کردا مُڑ پٹاس دا کوڑا تولدا اے تے ''سٹارٹ'' لیندا اے-[
3: پہلے پیو کا نام بولو- تاکہ ملزم کی شناخت ہو سکے اور ساتھ ہی ساتھ والدین کچھ عبرت بھی پکڑیں -
بھولا: (''کڑِکی'' وِچوں) حضور اسیں بھنڈ لوک ویلے سِر کھوتے نوں پیو بنا لینے آں - ایس ویلے تے تُسیں ای مائی باپ او-
3: خموش!
]ستراں بہتراں دا گلابو- چِھیٹکا پِنڈا- چِٹے پَٹے- چِٹیاں لمکنیاں مُچھاں - گل مَیلا پٹکا- ویکھنہاراں ولوں بالاں والی پُھرتی نال تھڑے تے چڑھدا اے-[
گلابو: (کُوک کے) گلابو، مائی باپ میرا ناں گلابو جے- میں پیو آں ایہناں دونہاں دا وی تے تہاڈا وی-
(تریوے اُکھڑ جاندے نیں)
3: او بیڑا گرک جائے-
2: توں جَندا نہیں نہ ماریا ہونا-
بھولا: بے بے کدھر گئی؟
گلابو: مائی باپ میں ایس دھرتی دا سبھ توں پرانا بھنڈ آں -
بھولا: (سنبھل کے) ایتھے آپنا ختم دوان آئے او-
2: امپلائمنٹ ایکسچینج دا کاڈ ہے ای-
گلابو: مائی باپ ایہہ بھنڈ بچے نیں - پیو نال وی جُگت کرنوں نہیں ٹلن لگے- بھاویں کوئی کم دی گل اوہڑے نہ اوہڑے- میرا ناں گلابو اے-ایس دھرتی دی اِٹ اِٹ تے میری پٹاس دا نشان اے-
بھولا: انکل- توں بھنڈاں دا بزرگ ایں تے بزرگاں دا بھنڈ ایں - تیریاں ججماناں دا جمعرات ولیمہ ای میانی صاحب اوتھے جا کے مار اِٹاں تے پٹاس-
2: آہو خیر ہووی- ایتھے انگلش میڈیم اے-
گلابو: (3 نال) سرکار تُسیں ایہناں نوں کوڑے مرواؤنے سن-
3: ہُن نہیں وج سکدے-
گلابو: اوہ کیوں؟
3: ایہہ وعدہ معاف ہو گئے نیں -
گلابو: پھیر ایہہ پٹاس مینوں چا دیو-
3: حالے نہیں مِل سکدی-
گلابو: اوہ کیوں -
3: اجے اصل ملزم مفرور اے-
گلابو: حضور جے میں ملزم پھڑوا دیاں تے مینوں مِلسی کیہ-
3: پھانسی-
گلابو: اللہ دی امان اوہ کیوں -
3: وعدہ مافاں دیاں وکنسیاں پوریاں ہو چکیاں نیں - نالے توں اوور ایج ایں -
گلابو: تے ایہہ جواناں دا ای کم اے-
3: (بھولے نال) ٹھوہ ٹھاہ لَٹَر پَٹَر!
بھولا: (سلوٹ) سَر!
3: با- بے ہوراں نوں باعِزّت بری کیتا جاندائے- ایہناں نوں باحفاظت گھر چھڈ کے آؤ-
2: تے بے- بے ہوراں کولوں رسید لے کے آؤ-
گلابو: مینوں اپیل دا حق اے-
2: وکیل عزرائیل نوں کرنا جے-
گلابو: سرکار ایہناں دے برخلاف کارروائی کیتی جاوے- ایہناں کولوں جُگت نہیں بندی- ایہہ آ جا کے میرے بڈھیپے توں ای فائدہ اٹھان دی کوشش کردے نیں -
3: اپیل خارج- ملک دے بہترین مفاد واسطے کِسے وی چیز توں فائدہ اٹھایا
جا سکدائے-
بھولا: (گلابو نوں باہوں پھڑ کے) آہو- تیرا بڈھیپا کوئی پرائیویٹ اے- چل (اوہنوں کھچدا اے)
گلابو: (اَڑدیاں ٹُردیاں) بڈھیاں تے تُسیں وی ہونائے حرامدیو-
بھولا: اوسلے ساڈے لسنس کینسل کرا دئیں -
]بھولا گلابو نوں چِھکدا تھڑیوں ڈھلن لگدا اے- مہراں، تگڑی کاٹھی دی
جنانی، ویکھنہاراں ولوں اگے آوندی اے- آپنی کایا پاروں گلابو کولوں
چوکھی نِکی جاپدی اے- کرڑ برڑے سِر سَنے وی-[
مہراں: لکھ لعنت ای، سَتیں پیڑھیں ہگاونیا- میں گوانڈھیاں دے ڈبی تیلی لین گئی آں تے مگروں پُھٹ کے ایتھے آن چڑھیائے- قصائیاں جوگا- خورے راہ کیہنے دسیا سُو- چھڈ دیوس بھولیا میں لے جانی آں - تُسیں کرو کم- (گلابو نُوں بانہوں پھڑدی اے) ہُن تے ایہدا پڑدہ ای ہو جائے تاں ای کھلاسی ہونی اے ساڈی-
گلابو: (بانہواں چاء کے) میں پرھے کولوں نیاں منگناں - مینوں قبر پئی چِھکدی اے- جانا تاں مینوں پینا ای اے- جان توں پہلاں مینوں ڈھائی گھڑیاں دے دِتیاں جان-
(کجھ ہاسا- کجھ رولا)
واجاں:
بابا جی جان دیو-
ٹھیک اے بڈھڑیا
دو منٹ بولن دیوسُ یار
بزرگو ٹَیم نہ خراب کرو
(اِک جنا اُٹھ کے گلابو نوں ویل دیندا اے)
گلابو: ویل ویل گلابو بھنڈ دی ویل- بھنڈاں دے پورس دی ویل-
بھولا: (3 نال) حضور ایہنے آپنے ناں دی ویل ہوک کے بھنڈاں دا دستور تروڑیا جے-
3: چُپ اوئے- بھنڈاں دے دستور نوں ستے خیراں نیں - اوہنوں کون مائی دا لال تروڑ سکدائے- ہاں ایس ویلے نظریہ ضرورت دے تحت اوہدے تے عمل روک دِتا گیائے-
(اِک ہور جنا گلابو نوں ویل دیندا اے)
گلابو: ویل ویل ست پیڑھیئے بھنڈ دی ویل- ڈِھڈ گھروڑی دی ویل- جواناں دی کھار دی ویل- سچ والیا توں ودھائیں تے لیکھے لائیں -
مہراں: ارانہہ کر کدھرے سٹ نہ پائیں -
(گلابو آپنے سِروں وار کے ویلاں مہراں نوں پھڑا دیندائے)
2: بلے او بے بے توں تے ساڈی وی پیو ایں -
گلابو: (مہراں دی ٹھوڈی ہتھ لا کے) ہُن جان بخشی کرو چودھری ساب- دیہاڑی بن گئی اے تہاڈی- ہور ٹھانے کھڑ کے بھنڈ چوں کیہ لینا جے (خلقت نال) پرھے والیو اسیں بھنڈ لوک گلاں دا ای کھٹیا کھانے آں لیکھاں دا لکھیا نہیں لیندے- پر اَج میں ویل نہیں سی منگی- نیاں منگیا ہا- میں تہاتھوں پچھنا ہا بئی بھنڈ کون ہوندائے-
بھولا: جیہڑا شُوماں کولوں ویل لے لوے-
گلابو: (لوکاں نال) کیوں جی بھنڈ دا کم ویل لینائے؟
بھولا: نہیں - کاہنوں - (وعظ والی ہیک نال) بھنڈ دا کم اے فجرے صدقے دیاں سِریاں کٹھیاں کرنیاں -
2: (اوسے ہیک نال) پیشی ویلے کمیٹی دا پانی پینا-
3: (اوسے ہیک نال) کُفتاں ویلے کورا لٹھا لین میانی کلاتھ مارکیٹ جانا-
گلابو: جے بھنڈ دا کم ویل لینائے تے مُڑ ٹھیک اے- ایہو بھنڈ نیں میں نہیں -
بھولا: تاہیوں تے آکھیائے گھر جا کے آرام کرو خیر نال-
اِک واج: ایہہ وی تیری اولاد نیں گلابو-
گلابو: نہیں او جوانا- ایہہ گل نہ آکھیں - کسب کماون شیرنی دا دُدھ پچاون اے- کسبی دی کوئی اولاد نہیں ہوندی- کوئی ماپے نہیں ہوندے- کسبی کسب دا ای پتر ہوندائے تے کسب دا ای پیو ہوندائے- (کھلیر) میں ایہناں نوں پتروں بھنڈ بناونا چاہوندا ساں - ایہہ مینوں بھنڈوں پیو بناونا چاہوندے نیں -
(اِک جنا گلابو نوں ویل دیندا اے)
گلابو: ویل- شیرنی دے دُدھ دی ویل- کسبیاں دے صِدق دی ویل-
صدق والیا توں ویل ودھائیں تے لیکھے لائیں -
بھولا: (ویل دی ہیک) تے دو تولے دُدھ وِچ پنجی کلو پانی کمیٹی دا پائیں -
2: (وعظ والی ہیک) نہیں تے جلاب لگ جان گے بچیاں شیردیاں نوں -
3: (وعظ والی ہیک) تے چڑیا گھر والے اوہناں نوں غیر حاضر وکھال کے وِچ رجسٹراں دے- اوہناں دی گھر لے جان گے چربی واسطے طاقت دا تیل بنان دے-
بھولا: آہو سانھیاں دی ابادی جوں گھٹ گئی اے-
2: کیہ بنیاں نیں سانھیاں نوں؟
بھولا: پنجاہ فی صدی عرب ٹُر گئے نیں - پنجاہ فی صدی بھرتی ہو گئے نیں - تے باقی سنسر والیاں کٹ دِتے نیں -
2: (پٹاس) میں سُنیائے گورمنٹ نے سانھا پال سکیم کڈھی اے- ریٹائر افسراں نوں مربے دِتے جان گے-
2: رٹائر بھنڈاں دا کیہ بنے گا؟
بھولا: اوہ کاواں دے مُونہہ چوں بُرکیاں کھوہن گے-
2: (پٹاس)
گلابو: (خلقت نال) پَینچو میرا نیاں اجے وِچے ای اے- مینوں دسیا جاوے بئی بھنڈ تے کاں وِچ کیہ فرق ہوندائے-
(اِک جنا گلابو نوں ویل دیندائے)
گلابو: ویل پینچاں دے نیاں دی ویل- بھنڈاں دیا ربا توں ویل ودھائیں - بھنڈ رکھیں تے کاں نہ بنائیں
(مہراں پُھرتی نال گلابو دے ہتھوں ویل جھپٹ لیندی اے)
گلابو: چلو کاں دا کم میتھوں سُن لو- تمبواں دی تاڑ رکھنی- دیگاں دوالے کنیاونا نے کاگو رولا پاونا- لاکڑیاں کولوں توہے توہے کراونی تے لاکڑیاں دی وگائی جُوٹھ چُنجاں نال چاونی- ہُن بھنڈ دا کم کیہ اے ایہہ تُسیں دسو- (کھلیر) سوچ کے دسیا جے-
(خلقت وِچ مَٹھی مَٹھی کُھسر پُھسر)
گلابو: چنگا تُسیں سوچو تے میں توا لاونا -
اِک واج: کیہدا
(ہاسا)
گلابو: تہاڈا
(ہاسا)
گلابو: (گاوندائے) اسیں بئی ککھ جہان دے
سانوں اگ تُفیک
اسیں بئی ککھ جہان دے
(پہلوں گلابو دا واج سُر تے نہیں ٹِکدا- ہولی ہولی نِتر جاوندا اے تے پِڑ نوں پکڑ کرن لگدا اے)
مہراں: بھولیا- وے پُتر ڈھولکی پھڑ کے اگانہہ ہووو- پیو دی بُڈھی جان جے کلے دی-
2: آہو بئی اگے ہوو بئی-
بھولا: کیہ بول نیں - بئی لے دے مینوں ککھ ڈوریا؟
مہراں: وے ڈوریا دادی بہشتن نوں پواؤنا ای- اوہدی سُن-
گلابو: اسیں بئی ککھ جہان دے
سانوں اگ تفیک
ککھوں ودھ جیہناں نوں جُڑیا
بُھگتن کل تریک
اسیں بئی ککھ جہان دے
(اِک جنا ویل دیندا اے)
گلابو: ویل- جہان دیاں ککھاں دی ویل- ککھاں والیا توں ویل ودھائیں تے دُھکھدی دا بھانبھڑ بنائیں - (مہراں ویل بھوچھن پلے بنھدی اے- بھولا ڈھولکی تے ہتھ مار کے واج لاوندائے- 3,2 وی نال لگدے نیں)
بھولا: ککھوں ودھ جیہناں نوں جُڑیا
2: بُھگتن کل تریک
3: اسیں بئی ککھ جہان دے
گلابو: (خلقت نال) جوانو پیسے نوں میں نہ تے نہیں کر سکدا- دوزک جوں نال لگی ہوئی- (ہاسا- مہراں ہس کے گلابو نوں دھپھہ مریندی اے) پر گاون دی ویل گوں کے دئی دی اے-
سانوں اگ تفیک
اسیں بئی ککھ جہان دے
(کجھ مُنڈے پہلوں شرموں کشرمی نال رلدے نیں - مُڑ ویکھو ویکھی کُھل ڈُلھ جاوندے نیں - جیویں جیویں پِڑ گاون وِچ رَلدا اے گلابو لہر وِچ آ کے انترے بولی آوندا اے- اوڑک سارا پِڑ گاوندا انترے چاوندا تے دہراؤندا اے)
گلابو: چڑھیاں ہویاں دی لہندی ویکھے
ساڈی اکھ بریک
اسیں بئی ککھ جہان دے
کُوڑے نہ جد تائیں جان بُہارے
لگدی اے سانوں لیک
اسیں بئی ککھ جہان دے
جِنی گِل گوا لئے کوئی
اونا ای سیک ودھیک
اسیں بئی ککھ جہان دے
مالکیاں دے اَوڑے جنگل
ساڈے اج شریک
اسیں بئی ککھ جہان دے
باہروں ساڈا دُھوں نہ نکلے
اندر چِننگ اُڈیک
اسیں بئی ککھ جہان دے
(پڑ وِچ بھنگڑا پیا پیندا اے، گلابو کھلو جاوندا اے تے بھنگڑا مَٹھا پے
جاوندا اے)
اِک واج: گلابو بول وئی-
گلابو: ہُن تہاڈی واری اے-
ہور واج: عاشقا ہو وئی اگانہہ
عاشق: مینوں سنگ آوندی اے گلابو کولوں -
گلابو: جے عاشق ہیں تاں اگانہہ ہو- گلابو تے سُکا کسبی ہویا-
عاشق: میں بول دیناں تُسیں چا لینا-
اِک جنا: جے ڈِگے نہ تے چا لَیساں تینوں وی- بول توں -
عاشق: سُنو سُنو بئی کھٹیاں پُھلاں دی گل سُنو
ہاڑ دیاں چونکاں وِچ جیہڑے کِھڑدے نیں
وڈیاں وانگ اسیں آہرے لگے سُندے نہیں
بالاں وانگ ایہہ آپنی مُڑ مُڑ گِندے نیں
اِک جنا: ہلا وئی کیہ آہندے نیں؟
عاشق: چارے کنیاں جیہناں دِیاں خالی- چارے کنیاں - چارے کنیاں جیہناں دِیاں خالی بئی اوہناں ڈرنا کیہ
گلابو: (نچ کے) بلے بلے بئی اوہناں ڈرنا کیہ
پِڑ: بلے بلے بئی اوہناں ڈرنا کیہ
عاشق: اسیں پانی اندر پانی- اسیں پانی- اسیں پانی اندر پانی تے ڈُلھنا بھرنا کیہ
پڑ: بلے بلے بئی ڈُلھنا بھرنا کیہ
عاشق: تُسیں چڑھ گدیاں تے پھیرو گوٹاں مکر دِیاں
تُسیں گھر گھر واڑو رسماں جھولی چُکن دِیاں
اِک جنا: بوہے تکن دیاں
گلابو: جھونگے جَھپن دیاں
عاشق: سانوں ٹُکر دا بُتا دے کے ہتھ وڈھائے جے
پڑ: بلے بلے بئی ہتھ وڈھائے جے
عاشق: ساڈیاں ہتھاں تے مُہراں لا کے نوٹ چلائے جے
پڑ: بلے بلے بئی نوٹ چلائے جے
عاشق: سانوں انھیاں کُھوہاں وِچ ڈک کے راج کمائے جے
پڑ: بلے بلے بئی راج کمائے جے
عاشق: ساڈے پِیڑ ہنیرے وِچوں پُنگرے ہتھ نویں
پڑ: بلے بلے بئی پُنگرے ہتھ نویں
عاشق: بھاڑے دِیاں ڈانگاں تے
ہتھ جیہڑے بھارُونیں
اِک جنا: ہتھ جیہڑے مارُو نیں
اِک جَنی: موئیاں نوں دارُو نیں
گلابو: بلے بلے بئی ہتھ جیہڑے دارُو نیں -
پڑ: بلے بلے بئی ہتھ جیہڑے دارُو نیں -
(بھنگڑا ترکھا ہو کے سہجے سہجے مَٹھا پے ویندا اے- لوک ہولی ہولی مُڑ ٹِک ویندے نیں -)
اِک واج: ہُن پتہ لگائے بھنڈ دا کم کیہ ہوندائے-
گلابو: آپنے کم دا وی پتہ لگا ای جوانا؟
دِتا: میں اِک گل پُچھنی سی تیرے کولوں - اوس ویلے دی پئی رَڑکدی اے-
گلابو: کیہ ناں ای-
دِتا: دِتا
گلابو: پُچھ دِتیا متے میری پُج وِچ ہووے-
دِتا: توں جیہڑا آہنائیں بئی کسب کماون شیرنی دا دُدھ پچاون اے- تے پھیر اسیں کیہ آں اسیں کسبی نہیں؟
گلابو: کیہ کسب اے تہاڈا-
دِتا: مشیناں اگے کھلونا-
گلابو: اوہ کاہدا کسب اے-
دِتا: تے ہور کسب کیہ ہوندائے-
گلابو: جیہڑا بندے دے ہتھ پیر بناوے- اوہدیاں اکھاں اوہدی جیبھ اوہدے کن بناوے-
فاروق: صنعتی پرولتاریہ عالمی انقلاب دا ہراول دستہ اے- ایہدا تمام تر شعور ایہنوں سرمایہ دارانہ صنعتی تجربے نے دِتائے- ایہہ کسب کمال نہیں تے ہور کیہ اے-
گلابو: دِتیا ایہہ کون ای جوانا؟
دِتا: ساڈے لیڈر نیں فاروق ساب-
گلابو: جَن عطائی نتھی کنٹھ سہاوڑا-
دِتا: اوہ کیہ ہویا-
گلابو: تے جیہڑا فروق لیڈر بولیائے اوہ کیہ ہویا- کیوں وئی پرھے والیو میری گل سچی اے کہ فروق لیڈر دی-
اِک واج: ساڈے ولوں دونویں سچیاں نیں - معرفت دیاں جوں ہوئیاں -
بھولا: چِڑی گُھٹ بھگیاڑ چمُونا گَھیں گَھیں -
مہراں: جیبھ نیفے چِ کر وے-
بھولا: بے بے یہ معرفت کی بات چیت ہے- تم کیوں آپنی سنسر کی کینچی چلاتی ہو-
(تقریر دا پینترا بنھدائے- پہلوں ہتھ وِچ ''مائیک'' پھڑ کے ٹھونگے نال ٹسٹ کریندا اے مُڑ پُھوک نال)
گلابو: جے توں بھنڈ تے لیڈر وِچ فرق دس سکیں تاں تینوں بولن دا حق اے
بھولا: (مُڑ مائیک ٹسٹ کر کے تقریردا اے) بھنڈ اور لیڈر میں فرق یہ ہے کہ جُگتیں بھنڈ کرتے ہیں ویلیں لینے کو لیڈر آ جاتے ہیں -
2: بھنڈاں نوں جُتیاں اگوں پیندیاں نیں تے لیڈراں نوں پِچھوں -
3: لیڈراں نوں ماپے جمدیاں کھلا چھڈ دیندے نیں - بھنڈاں نوں دفنا کے وی اتے کھلوتے رہندے نیں -
گلابو: تُسیں ایہناں کُوڑاں دا کلان نہ سنو فروق ساب- تُسیں آپنی گل دا مطبل کر دیو میں آپنی دا کر دینا-
فاروق: ایس ویلے تے تُسیں ای گلاں کرو بابا! اسیں تے سُنن آئے آں - ]ویل دیندا اے-[
بھولا: اُڈ کاں!
]گلابو ویل نہیں ہوکدا- پیسے پھڑ کے جھٹ دا جھٹ کھلوندا اے- مہراں نال ای ویل جھپٹ لیندی اے- تے پیسے پلے بنھدی بھولے نوں پَیندی اے-[
مہراں: وے توں کجیا نہیں رہندا-
بھولا: میں تینوں تے نہیں آکھیا بے بے ایویں نہ میرا جلسہ خراب کر-
گلابو: ویل- وڈھی دی ویل- ربا توں وڈھی دا مال دوزک چِ پائیں تے بھنڈ نوں نھاتا دھوتا ڈھیٹھ بنائیں -
(ہاسا- مہراں ہس کے گلابو نوں دھپھہ مریندی اے)
دِتا: میری گل تے وچے ای رہ گئی گلابو-
گلابو: تیرا کسب کوئی کسب نہیں دِتیا-
دِتا: کیوں؟
گلابو: جیہڑیاں مشیناں اگے کھلونائیں اوہ تیریاں نیں؟
دِتا: لگدیاں ساڈیاں ہڈاں دی پِیھ نال ای نیں - پر ساڈیاں نہیں -
گلابو: تینوں تیری محنت مِل جاندی اے؟
دِتا: محنت تے مالک لے جاندے نیں سانوں تے اوہو کاں والا بھورا سٹ کے اڈاوندے نیں -
گلابو: مشیناں بگانیاں - ہتھاں دی کیتی بگانی- تیرا دِل تیریاں ہتھاں نال رَسدائے؟
دِتا: نہیں -
گلابو: مُڑ تیرا شوہ تیرے اندر کیکن وسے- شوہ نہ وسے تے اندر ویہلا تے نہیں نہ رہندا- کِسے تاں رہنا ہویا- سو اندر میں رہندی اے- پھٹڑ میں - انھی ڈوری گُنگی- مُردے کھانی- کیہ وڈے لوک کیہ چھوٹے لوک- سبھ آپو آپنی میں دے راتب نی- بوپئی ہوئی آ اندراں وِچ- موئیاں شیواں جاں پھیلردیاں نیں جاں سُنگڑدیاں نیں - میں وڈا بندہ بنا سکدی اے، چھوٹا بندہ بنا سکدی اے- کسبی نہیوں بنا سکدی-
راجو: گلابو جے مشیناں نہ ہوندیاں تے ایہہ پِڑکیویں بجھدا؟
گلابو: کیہ ناں ای جوانا، کھلو کھاں
راجو: بیٹھا ای ٹھیک آں توں گل کر-
اِک واج: راجو راکٹ!
گلابو: حق آکھیا ای راجو راکٹا- جی کردائے تیرے ناں دی ویل ہوکاں -
(اِک جنا راجو دے سِر توں وار کے ویل دیندائے)
گلابو: ویل- ویل- ربا توں حق والیاں دے پِڑ بنھائیں تے راجو راکٹ کولوں ہمیش ای حق اکھوائیں - آہا- مشیناں نہ ہوندیاں تے پِڑکیویں بجھدا- کُھوہ نہ جُپدے تاں یار کِتھے ڈُھکدے- ویہن نہ وگدے تے ڈاراں کِتھوں جُڑدیاں -
بھولا: ویاہ نہ ہوندے تے بھنڈ کِتھوں کھاندے- (مہراں ویل سانبھدی بھولے نوں چِھبی دیندی اے)
گلابو: ویہن نہ وگدے تے ڈاراں کِتھوں جُڑدیاں - پر جِتھے بگانی چوگ ہووے اوتھے بگانی پھاہی وی ہوندی آ راجو راکٹا-
راجو: جے مشیناں میریاں ہو جان تے-
عاشق: پھیر پھاہی تیرے ہتھ ہووے-
اِک واج: راجو راکٹ اینڈ سنز لمیٹڈ-
گلابو: نہ بئی- تیریاں نہ میریاں -
عاشق: تیر میر مُک جائے تے میں مُک جائے-
گلابو: مُک کاہنوں جائے کُھل جائے- ساڈیاں وجوداں دے پنجریوں چُھٹ کے بے قید ہو جائے- ساری خدائی نال اِک مِک- بے روک- نَلج- میں بے قید میں، بے قید، نہ روگی نہ وَید (اِک جَنی ویل دیندی اے)
گلابو: سخی بُلھے شاہ دے ناں دی ویل، بھینا تے بھرجائیاں دی ویل- سخیا ہُن بھیناں تے بھرجائیاں کولوں فقراں نوں تھاپڑے دوائیں تے ویل ودھائیں -
بھولا: کاواں دی عیش اے بئی نہ کوئی اوہناں لئی پنجرے بنواوندائے نہ پھاہیاں اَڈدائے- کُھلا کھاؤ تے ننگا نھاؤ-
2: (گلابو دی نقل وِچ ویل ہوک کے) ربا توں کاں رہن دئیں راجو راکٹ نہ بنائیں -
3: مجوراں دے جلسے چ سانوں ویل دا مونہہ نہ وکھائیں -
(فاروق بھولے نوں ویل دیندائے)
بھولا: (چھیتی چھیتی) فروق ساب دی ویل- ساڈے لیڈر دی ویل- ساری قوم دے لیڈر دی ویل-
گلابو: آکاواں تینوں چُوری پاواں -
(مہراں نال ای بھولے دے ہتھوں ویل کھوہن لگدی اے- بھولا جھاکا دے کے آپنے کھیسے چ پاون دی کردا اے پر مہراں کھوہ لیندی اے-
بھولا: (کِھج کے) دونہاں پارٹیاں دِیاں ووٹاں اِکو ڈبے چ پائی آ- آپے جلوس کڈھا بہیں گی-
مہراں: وے کھسماں نوں کھاندائے جلوس- میں جُتی تے لِکھنی آں - تُسیں رناں نوں کھواؤ کمائیاں (بھولے والی ویل کڈھ کے چُڑ مُڑ کر کے اوہدے مُونہہ تے ماردی اے- بھولا پیسے بُچ کے کھیسے پا لیندائے)
بھولا: سنسر!
(2 سینت دی کینچی مہراں دے مُونہہ اگے چلاؤندا اے- مہراں دے بولدیاں بھولا چُڑ مُڑ ہوئی ویل کڈھ کے گیند ونگر اُچھالدا اے- تے فیلڈراں ونگر کیچ کر کے باہواں اُچیاں کر کے ٹپدا اے- 3,2 ساتھی فیلڈراں وانگوں تاوڑی مریندے نس کے اوہنوں تھاپڑا دیندے تے جپھے مریندے نیں - ایہہ سارا کم اوہ ڈاڈھی پھرتی نال کریندے نیں تانجو پِڑ دا دھیان مہراں ولوں ہٹے-)
مہراں: رناں نوں آکھو خرچے کرن پُورے…………جیہڑیاں انھیاں سوئیاں چ میں دھاگے پئی پاونی آں اوہ تے میں جاننی آں نہ………… اونتری چھت دا پتہ نہیں راتیں سِر چ پَینی اے کے دِنیں …… مالک چھیئیں مہینیں کرایہ ودھان دی آکھ دیندائے ڈھٹھے کُھوہ دا …………
بھولا: تینوں ڈاکٹر اقبال نے آکھیا سی بھنڈ جم-
2: کوئی شیخ جمدِیوں ہُن نوں تہانوں حج تے گھل کے رمان نال بیٹھے ہوندے-
3: کوئی ملک چودھری جمدِیوں - ادھے پاکستان نوں جدے دا پاسپورٹ بنوا دیندے ادھے نوں دبئی دا-
بھولا: ایہہ گلیاں ہو جاندِیاں سُنجیاں - وِچ توں پلازے تے پلازا پواندِیوں دِنیں کلی شاپنگ کردِیوں شامیں ابّے نال شاپنگ کردِیوں - ناشتے لنڈن تے لنچ نیویارک تے ڈِنر جپان-
2: توں بھنڈ جمے جیہناں نوں کوئی چِھتر وی ہُدارا نہ مارے-
بھولا: جیہڑے مرن لگے پانی منگن تے گوانڈھی آکھن نقلاں کردے نیں -
3: جیہڑے ویاہواں دیاں بوٹیاں ہیٹھاں کران لئی بُسیاں سیاسی جُگتاں دی جوین ونڈدے پھرن-
مہراں: میں بھنڈ نہیں جمے- میں تہانوں برادری کولوں توڑ توڑ کے سانبھیا- لوکاں دے بھانڈے مانجھ مانجھ کے پوتڑے دھو دھو کے تہانوں سکولے گھلیا-
بھولا: اوہو تدے ای- ماشٹر نوں پتہ لگ گیا ہونائے نا- ایہہ بھانڈے مانجھن دا کورس کرکے آئے نیں ماں دے پیٹ چوں - اوس پڑھائی ویلے نا بھانڈے منجوان سانوں گھر ٹور دینا- تے چھٹی مگروں نا آپنیاں پِنیاں ملوان دے ویہہ رپیے منگنے- ٹیوشن فیس-
(ایہہ گلاں کریندیاں ترونہہ بھراواں اُتے اِک عجیب بالاں والا رنگ آ ویندا اے- جیویں رل کے کوئی شرارت پئے سوچدے ہوون)
بھولا: ابّے سانوں شریف آڑھتیے دی ہٹی بہا دِتا- بئی دُوروں نیڑیوں ماما لگدا جے- بُڈھیاں ترے جے تے ایانا اِک نہیں - جے حیلہ کرو تے ایہدا کاروبار سانبھ سکدے او-
(پِڑ وچ کُھسر پُھسر)
2: جدوں ساڈی رپورٹ آونی بئی ایہہ کم نہیں کردے گاہکاں نال جُگتاں کردے نیں - تے ابّے ساڈے نال اوہ کرنی جیہڑی نویں ٹھانیدار مُشتبیاں نال کردے نیں -
(کُھسر پُھسر پلو پل ودھدی اے)
3: جدوں رپوٹ آونی بئی ہیٹوں پُھٹ گئے نیں - ابّے سانوں برآمد کر کے مُڑ شریف آڑھتیے دے جمع کرا آونا-
اِک واج: بلے او وڈھیا کسبیا!
ہور واج: بُڈھا فراڈیا-
(رلیاں مِلیاں واجاں - کجھ لوک کھلو جاندے نیں)
اِک کھلوتا: (چِھبی دے کے) ایہہ سانوں سبق پڑھاون آیا سی جے فراڈیا-
(رولا- چوکھے لوک کھلو جاندے نیں)
واجاں: گل تے سنو یار-
بڑا برداشت کیتائے- کوئی حد وی ہوندی اے-
ساڈا صبر ہور نہ آزمایا جائے-
مکاؤ یار ایہہ بک بک ہُن-
باہر سٹو سُ چک کے-
اوہ پر ہویا کیہ اے-
ایہنے فاروق ساب دی بزتی کیتی اے- ہُن ایہنوں بندہ بنا کے ای ٹوراں گے ایتھوں -
فاروق: میں ساتھیاں نوں درخواست کراں گا کہ میری ذات نوں درمیان وِچ نہ لیاندا جاوے- میری عزت بے عزتی دا کوئی مسئلہ نہیں میں اِک عام ورکر آں - میری عزت تہاڈی عزت اے- ہاں اصولی گل ضرور اے- ساتھیو! میں ذاتی طور تے پہلوں ای ایس پروگرام دے خلاف ساں - محنت کشاں دی مجاہدانہ جدوجہد دے خلاف جیہڑی سازش کلچر دے ناں تے ہو رہی اے- میں تے اوس توں پوری طرح آگاہ ساں اور ہاں - اچھا ہویائے ساڈے کچھ دوست وی بے نقاب ہو گئے- اور تہاڈے واسطے دوست دشمن دی تمیز وی آسان ہو گئی- دوستو! انقلابی جدوجہد اِک ہمہ جہتی عمل اے مگر بنیادی طور تے ایہہ جدوجہد معیشت دے میدان وِچ محنت کش طبقے دی حتمی بالا دستی دے حصول دی خاطر برپا کیتی جاندی اے- جد ایس بالا دستی دا حصول مکمل طور تے عمل وِچ آجاوے تے بالائی ڈھانچے اُتے آپنے آپ ایہدے خاطر خواہ اثرات مرتب ہونا شروع ہو جاندے نیں - مگر ساتھیو! کچھ عرصے توں لوک ثقافت اور لوک زباناں دے ناں تے محنت کشاں نوں گاون وجاون اور شعروشاعری دی افیون دے کے اوہناں نوں گمراہ کرن دیاں بلکہ بے دست و پا کرن دِیاں اوہ کوششاں کیتیاں جا رہیاں نیں جیہناں دے پِچھے پسماندہ ٹٹ پُونجیا شعور جاگیردارانہ ثقافت دی باقیات تے سامراجی گماشتہ ثقافت دِیاں زہریلیاں گولیاں نیں - جیہڑیاں ہمیشہ ساڈی انقلابی بیداری اور عالمی محنت کش تحریک دے پختہ شعور تے آپنے وطن دے معروضی حالات دے سنجیدہ مطالعہ دی بنیاد تے بُری طرح ناکام بنا دِتیاں جان گیاں - ساتھیو! ایہہ لوک مراعات یافتہ طبقے دے ڈرائنگ روماں دی نام نہاد رومانی فضا وِچ چرس دے دھوئیں دی آڑ وِچ آپنے خبیث سفلی جذبات دی تسکین دی خاطر ساڈے بزرگ کلاسیکی شعراء نوں استعمال کر کے ساڈی بدنامی دا باعث بن رہے نیں - لیکن ایہہ لوک بجائے خود کوئی اہمیت نہیں رکھدے- ایہناں دے پِچھے بائیں بازو دیاں اوہ نام نہاد کھسی پارٹیاں تے اوہناں دی متضاد قول و فعل دی حامل بزدل پنشن یافتہ قیادت اے جیہڑی آپنی ٹٹ پُونجیا پدر شاہانہ چودھراہٹ، نوں برقرار رکھن واسطے اور محنت کش تحریک نوں ترمیم پسندانہ عافیت کوشی دے حوالے نال گمراہ کرن واسطے ایہناں لوکاں نوں استعمال کر رہی اے- اسیں ایہہ سب کچھ ہر گز نہیں ہون دیاں گے- اسیں ایہناں نوں مزید بے نقاب کراں گے- ہُن ایہناں نے ٹریڈ یونین محاذ تے ساڈی طاقت اور باقیماندہ محاذاں تے سالہا سال دی انتھک محنت دے بعد بروئے کار لیاندے گئے محنت کش طلبا اتحاد نوں کمزور بناون واسطے نِت نویں ہتھیاراں دے حوالے نال میدان وِچ آؤنا شروع کر دِتائے- ایہہ اجدا پروگرام اوسے سازش دی اِک مذموم کڑی اے-
]نعرے[ غداروں کے یار- ٹھاہ
دشمنوں کے دَلّے- ٹھاہ
(اِک ہور لیڈر جیہا بندہ اٹھدائے- مُونہہ تے کالی خسخاسی، سِر تے ٹوپی ہتھ وِچ نُکری مُٹھ والا بریف کیس- عینک دے کالے فریم دیاں باہیاں اُتے لِشکنے پترے لگے ہوئے نیں)
واجاں: بہہ جا
بہہ جا
تشریف رکھ اوئے
فاروق: دوستو- کامل ساب نوں اظہار دے جمہوری حق دے حوالے نال بولن دا موقع دِتا جاوے-
کامل: (خطیباں والی لٹک نال- لگدا اے مُونہہ وِچ پان ہے پر پان ہے نہیں - ع ق سنگھوں کڈھدائے- فاروق وانگ پوند ای جھگوجھگ نہیں ہوندا- ہولی ہولی تپدا اے پر تپ کے وی لٹک نہیں چھڈدا-) عزیزانِ گرامی قدر- میں تہاڈا اور آپنے فاضل دوست فاروق صاحب دا بے حد شکر گزار آں کہ مینوں آپنے مافی الضمیر دے اظہار دا موقع دِتا گیا اے- ایہدے وِچ شک نہیں کہ ساڈی جدوجہد اور جدوں میں ساڈی جدوجہد آکھناں تے میری مراد ہوندی اے تہاڈی جدوجہد- تہاڈی اور ساڈی مشترکہ جدوجہد محنت کشاں دے جائز حقوق واسطے ہے- پر ایس جدوجہد نوں ایس نیک اور مقدس جدوجہد نوں بعض وطن دشمن عناصر جس طرح آپنے گندے مقاصد واسطے استعمال کر کے ملک دے امن اور سلامتی نوں برباد کرنا چاہوندے ہن اوہ کوئی ڈھکی چھپی گل نہیں - سانوں ایہناں بدبخت عناصر توں ہر وقت خبردار رہنا چاہیدا اے- ایہہ لوک ثقافت دی آڑ وِچ اسلامی روایات اسلامی اقدار اسلامی شعائر دا مذاق اڑاوندے ہن- ملک دے اساسی نظریئے دیاں جڑاں کٹدے ہن- بزرگانِ دین دے اقوال نوں اوہناں دے مقدس کلام نوں آپنے مخصوص مذموم مقاصد واسطے توڑ مروڑ کے پیش کردے ہن- ایہناں لوکاں نوں نہ ماں بھین دی تمیز اے نہ وڈے چھوٹے دی- مکاری، منافقت اور دغا ایہناں دی تکنیک اے- اخلاق باختگی ایہناں دی مجبوری اے- کون لوک شامل ہن ایہناں دیاں صفاں وِچ- دہریئے کمیونسٹ مغربی آزاد خیالی دے کوڑھ دے مارے ہوئے مادر پِدر آزاد عناصر- دوستو! ایہہ گل شک و شبہ توں بالا تر اے کہ محنت کش ساتھیاں اور بھراواں دے حقوق سراسر نظرانداز کیتے گئے ہن- اور اج نہیں عرصہ دراز توں نظرانداز کیتے گئے ہن- ایہہ گل مزید برداشت نہیں کیتی جانی چاہیدی اور نہیں کیتی جائے گی پر سانوں ایہہ وی نہیں بُھلنا چاہیدا کہ ساڈا دین اعتدال سِکھاوندا اے- اسیں آپنے حقوق واسطے لڑاں گے پر آپنے فرائض دی ادائیگی ولوں وی کِسے نوں آپنے ول انگلی نہیں چکن دیاں گے- ساڈے آپنے حقوق و فرائض ہن مالک دے آپنے حقوق و فرائض ہن- لیکن میرے عزیز اگر اسلام دے دُشمن کامیاب ہو گئے بیرونی نظریات دے حامی کامیاب ہو گئے تے دین دا ناں کوئی نہ لئے گا- اگر دین دا ناں کوئی نہ لئے گا تے نظریہ مٹ جائیگا اگر نظریہ مٹ گیا تے ملک نہ رہے گا- اگر ملک نہ رہیا تے نہ مالک رہے گا نہ مزدور- نہ امیر رہے گا نہ غریب- دِھیاں بھیناں دِیاں عزتاں لٹیاں جان گیاں - آون والیاں نسلاں بے غیرتی دے ٹکڑیاں تے پلن گیاں اور ساڈے اُتے لعنت بھیجن گیاں - دوستو میں تہاڈا زیادہ وقت نہیں لینا چاہوندا- میں آخر وِچ صرف اینا کہنا چاہوناں - کہ میرے فاروق صاحب نال ہزار اختلافات ہون ایس معاملے وِچ میں اوہناں دی مکمل تائید کرناں - اوہ جو وی اقدام تجویز کرن اوہدی مکمل حمائیت کرناں -
فاروق: ساتھیو! ایہہ اِک ایسا معاملہ اے جیہدے وِچ متحدہ محاذ دا اصول اپنایا جا سکدا اے-
(نعرے- ''دُشمنوں کے دَلّے ٹھاہ- غداروں کے یار ٹھاہ''- پنج تگڑے گلابو ول ودھدے نیں - اوہنوں گھیرا گھتدے نیں - اوہناں دے بولن توں تے پینتڑیاں توں جاپدا اے کِسے کارروائی لئی آپنے آپ نوں گرم پئے کردے نیں - ایہہ سارا کم اِک ناچ دے روپ وِچ اے- پوند گھیرا موکلا اے- ہولی ہولی ناچ دی لے ترکھی ہو ویندی اے تے گھیرا سوڑا- پِڑ وِچ دہل جیہی بہہ گئی اے جیہڑی محلیاں وِچ پُلس دی کاروائی توں پہلوں بہہ جاندی اے-)
پنجے: بناسپتی بھنڈ
مجمے باز فراڈیئے
ڈبہ پیر
گنڈھ دیا پُوریا
دُنیا دارا شوریا
(نعرے- ''غداروں کے یار- ٹھاہ- دُشمنوں کے دلے- ٹھاہ''-)
پنجے: ساڈیاں جڑھاں وڈھن والیاں غدارا- اجنٹا!
ساڈیاں دشمناں دیا دَلّیا- اجنٹا!
ملک دیا دشمنا!
چرسیا- بھڑویا!
(''غداروں کے یار ٹھاہ- دشمنوں کے دلّے ٹھاہ'')
پنجے: ہُن توں ننگا ہو چُکیائیں اوئے-
ہُن تیرا وار ساڈے تے نہیوں چل سکدا-
بڑیاں بڑیاں نوں راہے پا دِتائے ایہہ کیہ اے-
چک دیو ایہدا بھنگ بھوسٹرا-
لاہ دیو ایہنوں چَکوّں
(گلابو نوں پے کے کِھچ دھرو کرن لگدے نیں)
بھولا: چل بے بے ایتھے تے محاسبہ پین لگا ای- وعدہ مافاں دی واری آون توں پہلوں ای پُھٹ چلو-
مہراں: نہیں وے- میں نہیں جے جانا (اگانہہ ودھ کے پنجاں نوں روکدیاں) تُسیں میرے نال گل کرو وے- میں دسنی آں کیہڑا اصلی اے تے کیہڑا نقلی- مُنڈیاں نوں پڑھنے پاون لئی میں ایہدیاں بوٹیاں تروڑیاں - کیوں نہ تروڑدی میں - بھنڈ دی رن تے میں آپنیاں بھاگاں نوں اکھوا لیا- اگوں بھنڈاں دی ماں میں کیوں اکھواندی- کیوں - تہاڈے چوں کِنے نیں جیہڑے آپنیاں پُتراں نوں دیہاڑیاں کراون دی سوچدے نیں - لگدے واہ تُسیں اوہناں نوں پڑھاون دا ٹِل نہیں لاوندے- دسو مینوں - تُسیں نہیں آہندے تہاڈے جمے جائے افسر بنن- کیہنوں نہیں سُکھاوندے دنیا دے عیش ارام تے حکومتاں - میرے مُنڈے ای رہ گئے سن دھکیاں دھوڑیاں جوگے- اساں کوئی ٹھیکہ تے نہیں کیتا ہویا آپنی لہائی دا- ایہہ کوئی کسب نہیں - جے ہے تے تُسیں کیوں نہیں کراؤندے آپنی اولاد نوں - خورے کِنے جُگ ہو گئے نیں سانوں ایہہ نموشی سہیڑدیاں - تُسیں وی چکھو نہ ایہہ سواد- ہر کوئی اُپر ویکھے تے اسیں انھے بنے رہیے- ایہہ کیہڑیاں کرماں دا بھوگ اے- جے لیکھاں دا لِکھیا سی تاں اوہ وہیاں رُڑھ پُڑھ گئیاں - کوئی ذات کذات نہ رہی- ہُن تے تھوکاں دے مُل تُردے نیں - جِنی کِسے دی پُج ہووے- ایہنے مینوں بڑا تایا- ایہنوں کسب کرامت دا جھل نہیں سی چھڈدا- میں مُنڈیاں دا اگا سوارن دا سوچدی ساں - ایہنوں خاؤند بناوندی ساں - ایہہ کسبی بن کے میری اولاد نوں بج لاونا چاہوندا سی- اخیر ایہہ ہار گیا- دو دلیلا ہو کے میرا آکھیا کرن لگ پیا- پھیر اولاد میرے تے سٹ کے لانبھے ہو بیٹھا- جنانی ذات ساں - سکھنے ہتھ ساں - جِت میں وی نہ سکی- نہ مُنڈے پڑھے نہ اوہناں کوئی آہر سکھیا- ایہہ گلابو دے کسبی تے نہ بنے پر میں بھنڈاں دی ماں بن کے رہی- ہُن ایہہ چار گلاں جوڑدے نیں آپنے بال بچے لئی- ایہہ میرا ویری- میری جُون نوں لگی لیہہ- ہُن اسیں مر کے اِک دوجے نوں آزاد کراں گے- ایس جہان تے ساڈا ککھ نہیں -
گلابو: توں نیاں کیتا اے مہراں میں تیرا دیندار آں - بھاویں نیاں وِچ دینداری ہوندی تے نہیں - کیوں نیاں ساریاں دا سانجھا اے (سوچدیاں) آہو سانجھا اے سو دیندار وی سارے نیں - میں وی آں -
مہراں: میں تیرے کولوں کیہ لینائے- میرے جوگا تیرے کول دُھروں ای ککھ نہیں سی- توں آپ جوگا ای سیں - جیہڑے آپ جوگے ای ہون اوہناں نوں ویاہ وسیبا نہیں کرنا چاہیدا- تیرے جیہے آپ تے بدھے ہوندے نیں آپنی میں دے دوجیاں نوں نحق ماردے نیں نال بنھ کے-
گلابو: کھیڈاں تے سبھے میں دیاں ای نیں - ویکھنا تاں ایہہ اے پئی میں لڑ کیہدے لگدی اے- میں دا تُوں کون اے- میری میں کسب دے لڑ لگی ہوئی سی- نہیں کسب دے لڑ وی کیہ- کسب آپ کیہ ہوندائے- حرفاں دی کھیڈ- ہر کسب کمال پِچھے کوئی ہور دنیا ہوندی اے- سُفنیاں دی آساں دی- اوتھوں ای عشق والی کستُوری ہُلدی اے تے کسباں وِچ جان پیندی اے- کسباں دی جُون وٹدی اے-
مہراں: (خاب خیال وِچ) ایہو جیہاں گلاں نے کِسے ویلے میری مت ماری سی-
گلابو: برادری وِچ ہور وی مُنڈے سن- شریف سی اوہدی آڑھت سی- ماپیاں تینوں بڑا گھیریا- توں ماراں وی کھادیاں - پر اَڑ گیوں -
مہراں: انبھول ویلا سی- خورے کیہا ہلارا سی- کیہڑے تارے توڑن تے دِل سی- ہُن تے چیتے وی نہیں - دُھوڑ جم کے پتھر ہو گئی اے-
گلابو: توں آکھنا- تینوں مِلنی آں تے پر جیہے لگ جاندے نیں -
مہراں: ویاہ ہو گیا تے پر ٹُٹ گئے- تیرے نال رہن وی قید بن گیا- ماپے گھر نالوں وی کرڑی قید- اٹھے پہر چُلھا چوبَچہ- ایانیاں دے پواڑے، لوکاں دے میہنے- میں تینوں کھٹن کماون دا آکھنا توں متھے وٹ پا کے کُھونجے وڑ جانا-
گلابو: پوند تاں مینوں لگدا سی سبھ تیرا ای دوس اے- توں وِچوں دُنیا دار نکلی ایں - پر ہولی ہولی چانن لگا- اساں دونہاں رل کے گُھمن گھیر وِچ چھال ماری اے- میں تینوں باہر کھچن دا ٹِل لایا- مینوں جاپے توں مینوں گُھٹ کے چمبڑ گئی ایں - اندر ول پئی کھچنی ایں - تیرا نہیں سی دوس- گُھمن گھیر دا دستور ای ایہو اے- اوڑک میں تینوں چھڈ دِتا-
مہراں: مینوں چھڈ کے توں آزاد ہو گیوں -
گلابو: آزاد کیویں ہو سکنا ساں - میں آپنا گیڑ تیرے اُلٹ کر لیا- مینوں گُھمن گھیر دے چکر باہر وار سٹن لگ پئے تے تینوں اندر وار- مینوں سمجھ رَل گئی بئی گُھمن گھیر میرے وجودوں وڈیرا اے- میری وِتوں باہرا اے- پُٹھا وگدا رہساں تاں موت مینوں ایہدے کنڈھیاں توں باہر لے جاسی- توں سِدھی وگدی ایہدے دُھر وِچکار جا بُڈسیں - موتوں اگیرے ساڈے رُوح گُھمن گھیر توں چُھٹ کے مُڑ مِلسن-
(جیویں گلابو تے مہراں دی گل ٹُری اے- تے لوکاں اوہناں ول گوہ کیتا اے- گھیرا گھت ٹولے وال گلابو ولوں ہولی ہولی بے پرواہ ہوئی گئے نیں - اوہ اُباسیاں لیندے اِک دُوجے ول اِک ادھ گل ریڑھدے نیں - کدیں کدیں اِک دوجے نوں ہُورا دھپھہ وی لے کے پیندے نیں - اِک ادھ وار ٹھاپ وٹاندرا وی ہوندا اے- اوڑک بُہتے ہنگلاون لگ پیندے نیں - ایہہ سارا کم اوہناں دی آونی وانگ ناچ رُوپ وِچ اے- ایہہ ناچ لَے وِچ پہلے دا اُلٹ اے- گلابو تے مہراں دی گل پچھوکڑے ایہہ ناچ پیا چلدا اے- اوڑک)
اِک ٹولے وال: (اُباسی) چلیئے باچھا نیندر آ گئی اے-
دُوجا: چھڈ فروق باچھا نری اوزاری اے- (آکڑی) اسیں تے اجے بریک فاسٹ کرنائے باچھا-
(ٹولے وال ٹُردے نیں)
فاروق: (اٹھداے) آہو بئی چلیے دنیں عاملہ دی میٹنگ وی اے-
اِک ٹولے وال: ہرڑ بہیڑا آملہ- دِن دِیاں دِن نال باچھا- چلو کوئی جان شان بنایئے چل کے-
(فاروق ٹُردائے- کامل وی اُٹھدائے- کئیں ہور وی اُٹھ ٹُردے نیں)
کامل: ویلے دی نماز اتے کویلے دیاں ٹکراں - ایہہ مسئلے حل کراں گے تے اسیں کراں گے انشاء اللہ العزیز-
اِک ٹولے وال: (بوہیوں) اوئے ہُن آ جا ہُد ہُد- نِرنے کلیجے مرنا ای مسئلے کر کے
(فاروق کامل تے اوہناں دے ساتھی ٹولے والاں سنے ٹُر جاندے نیں - مگروں دو گھڑی چُپ رہندی اے- مُڑ اِنج جاپدا اے لوکیں جاگ پئے نیں - عام ہلجل ہوندی اے- کوئی تھاں وٹا بہندے نیں - کوئی بیٹھے آسن وٹاوندے نیں)
اِک واج: گئی کلیس-
ہور واج: ہُن گل ہو سی کُھل کے-
راجو: ہُن کیہدے نال گل ہونی اے- تماشبین کٹھے ہوئے دے نیں سارے-
دِتا: اوس ویلے توں کیہڑا اگے ہویوں راجو-
راجو: میں تہاڈیاں مُونہاں ول ویہندا رہیا-
عاشق: تے اسیں تیرے مُونہہ ول ویکھدے رہے-
اِک جَنا: اسیں سارے تُہاڈے مُونہہ ول ویکھدے رہے-
دِتا: کیوں - ساڈیاں مُونہاں اُتے کیہ لکھیا ہویا سی- اساں تہانوں کد روکیا سی-
اک جَنی: تُسیں جو موہری بنے کھلوتے سو- اساں جاتا کجھ کرسو ای-
عاشق: اینی خلقت دڑ وٹ کے بیٹھی رہی- کجھ ہلجل ہوندی تے ساڈا صدق بجھدا- سارا کجھ اچن اچیتی ہو گیا- سمجھ ای نہیں لگی-
اِک جَنی: صاف کیوں نہیں آہندے ڈر گئے سو- اسیں تے صاف آہنے آں تہانوں ویکھ کے اسیں وی سمجھیا ڈرنا ای ٹھیک اے-
اِک جنا: سارا رپھڑ سٹیج دائے- جے پِڑ تے تھڑا اِک ہوندے تے اسیں تہاڈے ول نہ ویہندے تُسیں ساڈے ول نہ ویہندے-
عاشق: ایہہ کیویں پک ای بئی جو توں آہنائیں اوہ سارا پِڑ آہندائے-
اِک جنا: جے توں پِڑ وِچ ہوندوں عاشقا تے انج نہ آکھدوں -
گلابو: کیہ ناں ای؟
جنا: اجے ویلاں توں رجیا نہوں؟
عاشق: پِڑ تے تھڑا اک کیویں ہوون؟
اِک جَنی: جے آکھن والے تے کرن والے اکو ای ہون-
دِتا: ایہہ ہو سکدائے؟ ساڈے پلّے تے ککھ نہیں جے- کر سکدے او تے کرو- جے میرے آکھن دی لوڑ اے تے میں آکھ دیناں - (کُوکدائے) میرے کول کوئی گِدڑ سِنگھی نہیں جے- میرے تے کوئی ہکھی نہ رکھیو-
اِک جَنی: ایہہ آکھن دی کاہدی لوڑ اے- ہکھی والی کوئی گل رہ گئی اے-
اِک جنا: ایہہ آکھن نال تہاڈا کجھ سردا ہوسی دتیا- ساڈا نہیں -
بھولا: ایہہ وی ویلا آونا سی- وکنسیاں ای وکنسیاں نیں امیدوار کوئی نہیں -
اِک جنا: گواہی دین دا ویلا کُھنج گیائے-
گلابو: تے ہُن جھورے دا ویلائے؟ اگوں دن نہیں چڑھنے؟
اِک جنا: کون آکھ سکدائے جیہڑی ہُن ہوئی اوہ مُڑ نہ ہوسی-
جَنی: جے اوس گھڑی اساں گواہی دِتی ہوندی تے اگوں ساڈے چھٹکارے دا دِن چڑھدا-
گلابو: چھٹکارے دا دن جے چڑھ جاندا تے چڑھیا ای رہندا؟ کوئی دن اخیرلا دن نہیں ہوندا ہر گھڑی گواہی دی گھڑی ہوندی اے-
اِک جَنی: سبھ پھوکیاں لگدیاں نیں -
(پڑ ہولی ہولی انہیرے ہو جاندائے-)
بھولا: (ہسدا دوہرا ہو کے) ٹھگیا گیائے-
2: (ہسدا بھولے دے ہتھ تے ہتھ مار کے) چِٹے دینہہ-
3: (ہسدیاں) مساں مساں اِک چانس بنیا کسبیوں عاشق ہون دا- اوہ وی گیا-
بھولا: نہ پر ساڈے ولوں کوئی کسر نہیں ہوئی-
راجو: ساڈے ولوں وی کوئی کسر نہیں ہوئی-
(عاشق تے دِتا وی ہاسے وِچ رلدے نیں)
بھولا: اخیری فتح بے بے دی اے بئی-
مہراں: ایویں حرام موتے مردا-
بھولا: لے ایڈی وڈی قربانی ہونی سی تے-
3: ہمیشاں واسطے اِک رِیت تُر پیندی-
2: آون والیاں پیڑھیاں نوں جاگ لگ جاندی-
بھولا: ساڈی خیر اے- اسیں یتیمی کٹ لیندے- پر ساڈیاں کسبی بھراواں لئی اِک نشان تے بن جاندا-
2: بَھجے پرت پَیندے- ڈَھٹھے اُٹھ کھلوندے ورھے دے ورھے جلوس نکِلدا-
3: دیگاں چڑھدیاں - بھنڈارے کُھلدے-
بھولا: ورھے دے ورھے اخباراں والے بے بے کولوں قوم واسطے پیغام لین آوندے-
2: میرا انٹرویو آوندا ''شہید کی آخری نشانی''-
3: بس اوئے- میرے ہوندیاں تیرا انٹرویو کدی نہ آ سکدا-
بھولا: تہانوں کون پُچھدا- تُسیں تے دونویں حرامدے ہوندے- تہاڈا کمیٹی دیاں کاگتاں چ ناں ای کوئی نہیں پئی تُسیں شہید دی اولاد او کہ شریف آڑھتیے دی-
گلابو: چیچو چیچ گنڈیریاں - (ہسدا دوہرا ہو جاندائے پِڑ و ل جا کے) چیچو چیچ گنڈیریاں -
(پِڑ اچن چیتی چاننے آ ویندا اے- پر اُکا سکھنا- لوک ٹُر گئے نیں - راجو عاشق دِتا اچنبھے وِچ کھلوتے پِڑ ول تے اِک دوجے ول ویکھدے نیں)
راجو: اسیں گلاں کرن والے لوک ساں اساں آپنی اخیر ویکھ لئی اے-
گلابو: انج آکھن نال بھار ہولا ہو جاندائے-
راجو: بس بھار ای ہولا کرنائے اسیں ہور کیہ-
گلابو: ایہہ وی اوسے رنگ دی گل اے- ایہو جیہیاں گلاں کر کے بندہ ڈونگھے پانیوں باہر آ جاندائے- ترن نہیں سکھدا- (ٹھہر کے) گلاں کرن کسبیاں دا کم اے- حیلہ کرن عاشقاں دا- پر کرن دے نال ای جرن اے- جر ویکھن، پرکھن، جاچن-
راجو: اجے کسر رہ گئی ہونی اے ساڈے جرن والی-
گلابو: پرکھیئے وی جاچئے وی-
راجو: بڑیاں سُن بیٹھے آں جاچاں پرکھاں - جیہنوں ویکھو ایہو دسدائے- کرن دی کوئی نہیں کردا-
گلابو: ڈُونگھا پانی نہ چھڈیئے راجو- اِک دو گوتے ای نیں نا-
راجو: (گلابو نوں پیندائے) کد تائیں گوتے کھانے نیں اسیں؟
گلابو: جد تائیں ترن نہیں جے آوندا (کھلیر) میں کیہ دساں - میرا سریر بے عِشقا اے- عشق ایانا کھیڈدا کھیڈدا چھائیں مائیں ہو گیا تے اسیں سیانے ہو گئے-
عاشق: پرانے بندے ہر گل اگے عشق دا ای بوہا ماری آؤندے نیں - اک گئے آں سُن سُن کے- عشق عشق- عشق-
گلابو: لؤ مُڑ ہور سُنو- (گاوندائے)
ساوا پِیلا رَتّا
ترے رنگ عشقے دے
ساوا دُنیا دا عشق، کھاؤ کماؤ تے ہرے بھرے رہو- پِیلا، کِسے سوہنی صورت دا عشق- رنگ نُچڑ جاندائے نا- کیوں جی-
عاشق: تے رتا؟
گلابو: کُل نال اِک ہوون دا عشق-
عاشق: رتیاں کیویں ہوئی دائے؟
گلابو: نویاں نوں پُچھو اسیں پرانے کیہ دسیے- اسیں تے اجے ساویوں پِیلے ای نہیں ہوئے- سُنیائے نشانی ایہہ اے بئی موت دا ڈر مُک جاندائے-
عاشق: اساں تاں عشق ای مُکدے ویکھے نیں موت دے ڈر ہتھوں -
دِتا: پہلی گل تاں ایہہ اے بئی عشق ہوندا کیویں اے-
راجو: آہو پہلے دو کو صدیاں ایس گل تے بحث کر لؤ-
گلابو: عشق ہوندا ای کوئی نہیں -
دِتا: ایہہ کیہ گل ہوئی؟
گلابو: عشق عُشق کوئی نہیں ہوندا- بس مِلن ہوندا اے-
عاشق: ٹھیک اے جے اسیں ملے ہویئے تاں رل کے گاویئے ای نہ- رل کے کھلو وی جاویئے- اسیں ملن منگنے آں پر سانوں بنھ وجے ہوئے نیں - مِلن نہیں ہوندا-
گلابو: جیہڑا ایس گل دی کھیڈ بنا وکھیندائے اوہ کسبی اے جیہڑا بنھ تروڑن ٹُر پوے اوہ عاشق اے-
دِتا: بنھ کیویں ترٹدے نیں -
گلابو: اِک ترٹدے نیں دوجے آن مُونہہ وکھالدے نیں - راتیں عاشق بنھ تروڑدائے دنیں دنیا دار مڑ مار دیندائے- پھیر کسبی آوندائے- عاشق دی ہار نوں کھیڈ وِچ جت بنا کے وکھالدائے-
دِتا: میں سوچناں - میں کیہ آں - کسبی، عاشق کہ دنیا دار-
گلابو: سوچ! سوچ کے آپنا اِک ناں دھر لے- مُڑ اوسے سل ہیٹھ دبیا جا-
دِتا: پھیر کیویں پچھاناں میں کون آں -
گلابو: پچھان اوسے شے دی ہوندی اے جیہڑی آپ بنایئے-
دِتا: سیانے آہندے نیں جیہڑا پچھاندائے سوئیو بناوندائے-
گلابو: کملے آہندے نیں جیہڑا بناوندائے سوئیو پچھاندائے-
راجو: (اوہدی کِھج ایہناں گلاں وِچ ودھدی رہی اے اوہ کدیں اچویں وِچ اُٹھیا اے تے کدیں سِر سٹ کے بہہ گیا اے- اوڑک ودھدی کِھج نوں ٹَھلن دی کردیاں) کوئی حد وی ہوندی اے بے غیرتی دی-
مہراں: منی نہ کملیاں دی جاندی اے نہ سیانیاں دی- منی اوہدی جاندی اے جیہدی کوٹھی دانے ہون-
دِتا: (سوچیں) آپنے آپ نوں کیویں بنایئے (کھلیر) بناون ہے کیہ-
گلابو: ڈھاون- ڈھاون بناون اِک جوڑا اے- دسن وِچ تے شیواں وکھو وکھ نیں نا- پر جس ویلے ورتو نا تے ہر شے جوڑا جوڑا ہوندی اے- دُنیا داری تے کسب- کسب تے عشق- پُٹھ تے سِدھ- جوڑ تے توڑ- ڈھاون تے بناون-
عاشق: جیویں گراریاں جُڑیاں ہوندیاں نیں - ہک سجے بھوندی اے ہک کھبے- کم ہکا کریندیاں نیں -
گلابو: گراریاں دا کم تے اگدوں مِتھیا ہوندا اے نا- ایہناں جوڑیاں دی کرنی- چل سوچل- کوئی آکھ نہیں سکدا بئی وِچوں کیہ نکلنائے- بس اینا پتہ اے- جوڑے جُڑے رہن تے حیاتی- نکھڑ جاون تے موت- (کھلیر) اوہ باتشاہ والی سُنی ہوئی جے نہ-
عاشق: کیہڑی؟
گلابو: باتشاہ ہا نہ اک- اوس دعا منگی بئی میں جیہڑی شے نوں لگاں اوہ سونا ہو جائے- دعا قبولی گئی- دعائیں وی ایہو جیہیاں جھٹ قبولیاں جاندیاں نیں - پوند تاں بڑا راضی ہویا- ہتھ مار مار کے کُل چیزاں وستاں سونا کر لئیاں - پر جیہڑے ویلے ٹُکر تروڑیوس نا تاں اوہ اوی سونا ہو گیا- پانی دا گُھٹ بھرن لگا اوہ وی سونا ہو گیا- گھابر کے سوانی آپنی دا ہتھ پھڑیوس چا- اوہ وی سونے دی ہو گئی-
عاشق: سُنی چاپدی اے پر ایتھے کیویں جُڑ گئی؟
گلابو: (ہسدائے) آہو وئی (اکھ مار کے) مینوں وی نہیں پتہ- اک گل اوہ ٹھیک آہندے سن- فراڈیا- ہر کسبی تھوڑا باہلا فراڈیا تے ہوندا ای اے نا- سو بھرا جی جوڑو- جوڑنی تاں ہُن پینی جے- نہ جُڑی تے سونا بن کے تہاڈے ساڈے سِر وِچ پھس جاسی- مُڑ سارے سونے دے ہو جاسو-
بھولا: واری واری ہوئیو تھوڑا تھوڑا- اسیں ویچدے پھڑے نہ جایئے نا-
دِتا: ساڈے سِر وِچ نہیں پھس سکدا سونا- اسیں شیواں دے بناون والے آں ہنڈاون والے نہیں -
گلابو: توں تے ہوئیوں میں کیویں ہویا؟
دِتا: توں گل نہیں بناوندا؟ جدوں ساڈی ہتھ دی کار دیہاڑی بن کے سانوں مِلدی اے تے پھوک ہو جاندی اے- جدوں تیری گل ویل نال تُل جاندی اے تے موئی چڑی وانگوں تیری جھولی وِچ آ ڈِگدی اے-
گلابو: سو نِری ہنڈاون والیاں نوں ای سونے والی بیماری نہیں لگی ہوئی سانوں بناون والیاں نوں وی لگی ہوئی اے-
دِتا: لگی وی رہنی اے جد تائیں مجبوری نہیں مُکدی-
گلابو: مجبوری کاہدی؟
دِتا: آپنی کیتی بگانے اگے ویچن دی- آپنے کم کولوں، آپنے آپ کولوں بگانے ہو رہن دی- اسیں آپنے اندر وِچ آپ اوپرے آں - آپنے آپ دے قیدی- اِک دُوجے کولوں سجنائی دی بُرکی منگنے آں پر دیویئے کیویں تے لیئے کیویں - جیہنوں ہتھ لایئے بگانا ہو جاندا اے- بگانیاں ناواں دیاں سِلاں نال ساڈے اندر نکونک ہوئے پئے نیں - جیویں پرانے قبرستان ہوندے نیں -
گلابو: کون قُم باذنی آکھے- (ہک وجا کے کوک کے) اُٹھ میرے آکھے اُٹھ- (ہولی پیار ونی آپنت نال جیویں رُسے نوں منیندا ہووے) اُٹھ آپنے آکھے اُٹھ-
عاشق: اوہو آکھے جیہدا پُٹھی کھل لہان تے دل ہووے-
دِتا: نہیں جے ہر کوئی آپنے آکھے اُٹھے تاں متے کِسے نوں کھل لہانی ای نہ پوے- کھلاں لاہون والیاں نوں آپنی پے جائے-
(راجو روہ وِچ ٹُردا اے)
راجو: بس کرو ایہہ تویت دھاگہ بتھیری ہو گئی اے- (اتاولا باہر ول وگدا اے)
دِتا: کِتھے چلیائیں -
راجو: (بوہیوں) مینوں پتہ اے اوہ کِتھے گئے نیں -
(دِتا تے عاشق جھپٹ کے راجو دے اگے آوندے نیں - کوڈی دیاں جاپِھیاں ہار اوہنوں ڈکدے نیں - اوہ ساہیاں ہار نکلن دی کردائے)-
راجو: روز دا یب مکان دیو-
دِتا: توں - توں - اِک آپنا یب مُکا کے- سو یب سانوں پا جائیں گا- ہیرو-
راجو: جے اینے جوگے نہیں تے چُپ کر کے دیہاڑی کرو- بند کرو ایہہ ڈرامہ-
عاشق: (داء مار کے جپھدیاں) منیا وڈا گوریلا ایں وئی توں -
(کوڈی دے پینتڑے گُھلدے نیں - دِتا وی پے جاندائے- دونویں راجو نوں ڈھاندے نیں)
بھولا: یا اللہ کِتھے پھسایا ای لیا کے- ساڈے جیہاں شریف شہریاں نوں -
2: خورے پُلس کِتھے اے- سانوں تے پھڑ کے ای لے جائے ایتھوں -
3: چل بے بے ساڈی تے گواہی وی شرع چ نہیں منظور-
مہراں: کوئی حیا کرو وے- کوئی ویلا اے تہاڈے کلان دا-
راجو: (کِلھ کے) چھڈ دیو مینوں -
عاشق: وَینا نہیں توں -
راجو: (لمے اراٹ نال پورے ٹِل نال اوہناں نوں دھکدیاں) چھڈ دیو مینوں -
(اوہ چھڈ دیندے نیں - راجو مریجے کھڈار وانگ اُٹھدا اے) میں نہیں چلیا- تہاڈے ہوندیاں کوئی کِتے نہیں جا سکدا- بُلارے بٹیرے- تہانوں ایسے لئی چھڈیا گیائے- گلاں دے جال چوں لوکاں نوں نِکلن نہ دیو- تہاڈا قصور نہیں - تقدیر اے ساڈی-
دِتا: تقدیر ساڈی ایہہ اے بئی سانوں اِک دوجے دی کرنی بھرنی پیندی اے-
راجو: جے میرا عمل کُوڑ اے تے میرے نال ای مُک جائے گا- تہاڈی بے عملی اج ساری خدائی نوں بھوگنی پے گئی اے-
عاشق: عمل کیہڑائے بے عملی کیہڑی ایہو تے ویکھنائے-
راجو: ویکھدے رہو- ویکھدے ای لگے جاؤگے- قبراں تے مِٹی چڑھدی جائے گی- پیڑھیاں دی پیڑھیاں گلدیاں جان گِیاں -
دِتا: کیہ کریئے اسیں دس پھیر- تیرے توں پہلاں دنیا نہیں ہو گئی؟ ساڈے ساتھی بدماشاں نال نِبڑدے مارے نہیں گئے؟ مِیلو مِیل جلوس نکلے- مقدمے لڑدیاں ساڈے سِر چٹے ہو گئے- تے اج اسیں اوتھے دے اوتھے ای آں - کیہڑے بوہے کھل گئے نی ساڈے جوگے-؟
راجو: تُسیں مقدمیاں وِچ وڑے کیوں - جداد ونڈاونی ساجے- ایہہ جی ورکر نیں - ایہہ جی لیڈر نیں - ایہہ بولن گے ایہہ سُنن گے- لیڈر کتاباں پڑھدے رہے، بحثاں کردے رہے- تُسیں بھانگڑے پاوندے رہے، نعرے ماردے رہے، کندھاں کالیاں کردے رہے- دونویں کھسی ہو گئے-
دِتا: تیرے بُگچے وِچ کیہڑی سلاجیت اے؟ بڑھکاں مارو- کاغذ تے چُھریاں لاؤ- بمب کیس پوا لؤ- تے باقی عمر پُلس بھنیویں بنے رہو-
راجو: (جر کے- واج وِچ اُچیچا ٹھرمّا لیا کے) اسیں بولی ای وکھو وکھ بولنے آں پئے- گل کیویں ہووے- (کھلیر) کیہنوں نہیں پتہ- کیہنوں نہیں پیا دِسدا کیہ پئی ہوندی اے- جے تُسیں کِسے گل تے اٹھو ای نہ کھلوو ای نہ تے لوک کیویں جُڑن- اوہ تہاڈیاں کیوں سُنن- گھرو گھریں جا کے آہرے کیوں نہ لگن- ہر کوئی آہندائے میں آپنے تے پواڑے نبیڑاں نس بھج کر کے-
عاشق: جُڑیئے کیویں (کھلیر) پواڑے نِبڑدے کوئی نہیں - ہور ودھدے رہندےنیں - ہر کوئی آہندائے اوہ ساہمنے دائی اے میں اوہنوں ہتھ لا لیا تے مینوں کوئی نہیں پھڑ سکدا-
گلابو: غلامی دے بال نیں ڈرتے لالچ- ایہہ دوئے وڈے ہو کے آپو وِچ ویاہ کر لیندے نیں تے اگوں مُڑ غلامی جمدی اے-
راجو: غلامی دے بال ایہہ دو نی گلابو (دِتے تے عاشق ول سینت) جَوڑے- جد تائیں ایہہ جیوندے نیں خیر نال- غلامی نوں ہور اولاد دی لوڑ ای نہیں -
عاشق: ایہدے لہو چ اجکل بہوں سیک ای وئی-
دِتا: لہو چ سیک دا تے پتہ نہیں - مُڑھکے وِچ بو ضرور سُو-
عاشق: ہیں اوہ کیہ گل اے یار-
دِتا: (راجو نال) دس دیاں؟
راجو: ایس ویلے کیہ جوڑ اے ایس گل دا-
دِتا: چل رہن دینے آں - توں آہنائیں تے- انج جوڑ تے جوڑنا پینائے نہیں تے سونے دا بن جاسیں بچُو-
عاشق: دس یار- ساڈیاں کیہڑیاں گُجھیاں نیں ایہدے کولوں -
دِتا: کامریڈ شکیلہ نوں نوکری لبھ گئی اے پی آئی اے وِچ- اوہنوں ہُن راجو راکٹ ہوراں دے مُڑھکے وِچوں بو آون لگ پئی اے- ایہہ ہُن چی گویرے بن کے آپنی موت دی خبر اوہنوں اخبار وِچ پڑھاونا چاہوندے نیں - سنے فوٹو-
مہراں: ایہہ کوئی ہَسیَن اے شکیلاں؟
بھولا: او نہیں بیبے کامریٹ ایہہ آہندے نی جیہڑے رل کے کم کرن- مطبل اکو پالٹی- جیویں اسیں تیرے کامریٹ آں -
مہراں: تُسیں کاملیٹ ہووکھاں رناں آپنیاں دے- رل کے کم- ایہناں سواہ رل کے کرنائے جیہناں دی بو خشبوای وکھری ہو گئی- (ٹھہر کے) میرے جیہی ای ہونی اے چندری- گھر دا سکھال لوڑدی ہونی اے- نہ لبھا تے کاملیٹ بن گئی- لبھا تے ٹُر گئی-
2: لبھا تے آملیٹ بن گئی-
بھولا: بس اوئے- فرائی پین ڈھک رکھ ذرا-
راجو: ماسی ٹھیک آہندی اے-
دِتا: من لینے آں سوکھی نبڑ جاوُ-
راجو: سوکھیاں نبیڑنا تے تہاڈا کم اے-
دِتا: ہر کوئی ایہو آہندا اے: جنانیاں گھر دا سکھال لوڑدیاں نیں - لے کے بہہ جاندیاں نیں ورکراں نوں وی نال-
عاشق: ٹھیک نہیں ایہہ گل-؟
گلابو: جے مرزے نے صاحباں آپنیاں بھراواں وِچ ای جا وساونی اے تاں اوہ مُڑ آپنیاں بھراواں دا پکھ کیوں نہ کرے- اوہ مرزے دیاں کانیاں کیوں نہ تروڑے-
عاشق: تے کیہڑی نویں دنیا وِچ ٹُر جائے مرزا اوہنوں لے کے- نویں دنیا بناون دا پواڑا اے سارا- (کھلیر) ایڈیاں ڈونگھیاں لیہاں جیہڑیاں ساڈیاں روحاں وِچ گڈیاں پیاں نیں - کیویں ڈھایئے اوہناں نوں - جیہڑے صدیاں دے بے آسے ہوئے پئے نیں دل- اوہناں نوں ان ڈِٹھیاں چاننیاں ول اُڈار کیویں کریئے-
گلابو: رُکھ تے مجبور نیں - بے بہارے جُون نہیں وٹا سکدے- بندہ تے رُکھ نہیں -
عاشق: رُکھاں نوں بہار دی کیڑ ہو ونجے تے جُون وٹاونی پوندی نیں - ساڈیاں سِراں توں کئیاں بہاراں دے ڈھول گجدے لنگھ گئے- اسیں اوہو دے اوہو رہے- ہتھوں پرانیاں جوناں وِچ لہہ گئے-
گلابو: مجبوری نوں ورتنا پر اوہدیاں حداں نوں نہ مننا- ایہہ مختاری اے بندے دی-
عاشق: مندے تے اسیں وی نہیں حداں نوں -
دِتا: جیہناں دے حداں اندر گزارے پئے ہوندے نیں اوہ حداں نوں مندے نیں بھرا جی-
گلابو: پرانے لوک آہندے سن رُکھاں تے چڑیلاں وسدیاں نیں -
عاشق: حداں اُتے پہرا جنانیاں ای دیندیاں نیں -
مہراں: پہرا کیہ دینائے چندرِیاں - پھاہی جو گل وِچ پئی ہوئی نیں - ایانے جم کے پالن دی- چُلھا چونکا کرن دی- کِتھے جان-
دِتا: حداں توں نابرہو جان-
مہراں: کر کے ویکھیں نا-
بھولا: اوئے ہُن کوئی گل نہیں بے بے ہُن تے مشیناں آ گئیاں نیں ہر کم دیاں، رِنھن دی وکھری، دھون دی وکھری، ایانیاں دی وکھری-
2: چلو کھلاسی ہوئی- مشین جیہڑی وی آئی آپے ساڈے مجور بھرا چلا لیسن بھاویں اوور ٹَیم لاونا پوے نیں -
(چویاں پنجیاں ورھیاں دی شکیلہ بھونچلی ہوئی اندر آؤندی اے- جاپدائے پورے ٹِل نال آپنا آپ سواہرا پئی رکھدی اے-)
راجو: کیہ گل ہوئی اے شکیلہ؟
شکیلہ: (روہ کِیل کے) بس کوئی گل نہیں - میں ایہہ دسن آئی ساں کہ اگے توں میں تہانوں لوکاں نوں مِل نہیں سکاں گی-
عاشق: ہویا کیہ اے؟
شکیلہ: بس میرا فیصلہ اے- میں چاہونی آں ایہہ سبھ نوں دس دِتا جاوے- میرے گھر آون دا یاں مینوں کِتے سدن دا کوئی فائدہ نہ ہووے گا- ایہہ سلسلہ ہمیشاں لئی ختم سمجھیا جاوے-
دِتا: کم تے ہر کوئی آپنی مرضی نال کردائے- آپنی خوشی لئی- مجبوری تے کوئی نہیں -
شکیلہ: نہیں میرے لئی مجبوری بن چکیا سی ہُن ایہہ کم- میں مکاونا چاہونی آں ایہنوں - لوک جس حد تیکر ڈِگ سکدے نیں اوتھے پہنچنا میرے وس توں باہر اے-
راجو: شکیلہ گل کیہ ہوئی اے ایس ویلے- توں دسدی کیوں نہیں؟
شکیلہ: (بے ملومی جیہی روون ہاکی) لیڈر بنے پھردے نیں کمینے (سنبھل کے اگے وانگ) بالکل کجھ نہیں ہویا جناب- معمولی گل اے- تہاڈے صدر فاروق صاحب آپنے خاص ساتھیاں نال میرے گھر آئے- پتہ نہیں کتھوں آئے سن- اوہناں زبردستی میرے کمرے وِچ وڑ کے بدتمیزی کیتی- ہویا تے کجھ نہیں -
راجو: (دِتے ول ودھ کے) توں جواب دے (دِتے نوں گلمیوں پھڑ کے ہلوندائے) دے جواب! (شکیلہ نال) کِتھے گئے نیں اوہ؟ ہن روکے مینوں کوئی- (باہر ول نسدائے)
شکیلہ: (کاہلی نال اوہدے ول جا کے اوہنوں ڈکدیاں) کوئی لوڑ نہیں - بالکل کوئی لوڑ نہیں، کِسے قسم دا ایکشن لین دی- ایکشن لینا ہوندا تے میں پولیس سٹیشن جاندی- مینوں کِسے قسم دا سکینڈل نہیں چاہیدا- ایسے واسطے آئی ساں ایتھے کہ ایس ڈرامے نوں ہُن ختم سمجھیا جاوے-
دِتا: ٹھیک اے بی بی- اسیں ایہو جیہیاں ڈرامیاں جوگے ای نہیں - ساڈے پلے نہ اینی ویہل اے نہ اینا دم-
شکیلہ: بس شکریہ- (جاون لگدی اے)
راجو: شکیلہ میں نال چلناں -
شکیلہ: (جاندیاں) نہیں بس شکریہ- مینوں راہ آوندائے-
دِتا: اِک گل میں آکھنی اے (شکیلہ رُکدی اے) ساڈے وس خبرے کُجھ ہے وی کہ نہیں - ماریئے کِتے تے لگدی کِتے اے- آکھن نوں تے میں آکھ سکناں بئی ساڈے نال کوئی واہ نہیں فاروق دا- اسیں اوہدیاں کیتیاں دے دیندار نہیں - پر میں آکھناں اسیں دیندار آں - تے جِنی کُو توں ساڈے وِچوں سیں توں وی دیندار ایں - فاروق نوں تیرے ول آون جاون دا حوصلہ کدوں دا ہویائے- جدوں دی اوہنوں تیرے وِچوں کوئی مڈل کلاس خشبو آون لگ پئی اے-
عاشق: یار ایہہ گلاں ہُن ایس ویلے-
دِتا: ہور کِسے ویلے ایہہ گل ہو ای نہیں سی سکدی-
عاشق: اوہ ہو- بُہتے سیانے ہون دا ایہو پواڑا ہوندائے- سُوئی اڑ ویندی اے بعضے ویلے- کوئی ویلا ہوندائے سمجھن سمجھاون دا-
شکیلہ: نہیں نہیں میں سُن سکنی آں - تُسیں کر لؤ- پھیر متے موقع نہ لبھے-
دِتا: بس میں تے ایہو آکھنا سی-
شکیلہ: نویں تے نہیں ایہہ- کئیں واریں سُن بیٹھی آں - مڈل کلاسن ہو گئی آں میں - آپنے میل نال دغا پئی کرنی آں - میرے اندروں پرانی عورت والی حرص تے خود غرضی نہیں مری- ٹھیک ہونائے- پر میں کیہ دیکھیائے- تہاڈیاں دِلاں وِچ میں کیہڑی نویں دنیا دے باغ تکے؟ مینوں خبرے تہاڈے چوں کیہڑیاں خشبواں آئیاں نیں -
2: مُڑھکے دی……
بھولا: ہاچھ! (زوردی نِچھ کے 2 دے پرنے نال نک پونجھدائے- نالے اوہنوں ہُجھدائے)- بیڑا تر جائے- ٹھنڈ لگ گئی اے-
شکیلہ: (پہلی وار اوہناں نوں ویکھدی اے- مہراں تے گلابو نوں وی-) ماف کرناں میں اگے تہانوں ……
عاشق: ایہہ ساڈے……
مہراں: نہیں بی بی کوئی نہیں - تُسیں کرو گل- اسیں ہُن جانے آں وِیر- ہیں
بھولیا-
شکیلہ: نہیں جی میں کوئی خاص گل نہیں کرنی- تُسیں سُن ای بیٹھے او- خیر اے
جی تُسیں بہوو- میں تے آپ چلی آں -
مہراں: جیہڑی تیرے نال واپری اے دِھیئے- اگے خورے کِنیاں نال واپر گئی
اے- میں تے آپنی پئی کردی ساں جدوں توں آئی ایں - ہر کوئی
گھر دا سُکھال لوڑدائے- ہور ایس جِند دا کرنا کیہ اے-
(شکیلہ چُپ مہراں ول تکدی اے مُڑاچن چیت)
شکیلہ: پہلا سبق: عشق کر- نواں زمانہ لیاونا ای تے نواں عشق کر-
مہراں: آہو پہلاں ایہناں ہڈ حراماں نوں سانبھ مگروں ایانے ایہناں دے- آپنا آپ مار کے کما تے ایہناں ملہپاں نوں کھوا-
شکیلہ: دوجا سبق: مرد بن- عشق وِچ اوکھی سوکھی بن جائے تے آپے نبیڑیا
کر-
مہراں: آہو اسیں لیڈری جو کرنی ہوئی- توں ساڈا کمیٹی دا گند والا ٹرک بنی
رہو-
شکیلہ: سبق نمبرتِن اسیں آون والے زمانے دے نویں عاشق آں - ساڈے
اُتے دقیانوسی روکاں ٹوکاں نہ لا- ساڈے عشق دریا نوں مار کرن
دے- جدھر چاہوے- وتر لاون دے- ساڈی من دی موج ای ساڈا
سچ اے-
مہراں: چَوَل جہان دے- ہابڑے آپنے نوں ہابڑا آہندے سنگدے نیں -
پُرانِیاں ترکّیاں بوٹِیاں نویں مسالے دُھوڑ دُھوڑ پئے ویچدے نیں -
شکیلہ: سبق نمبر چار توں زنانی ایں - ہزاراں ورھے غلام رہی ایں - ازاد
ہوندیاں ہور ہزار ورھا لگنائے تینوں - اجے ساڈے حکم وِچ رہو- گاہل
کڈھیئے تے پی جایا کر- ماریئے تے کھا لیا کر- دوائی سمجھ کے-
مہراں: نی جاؤ نی- تُسیں پڑھیاں لِکھیاں جے نا- میرے ورگی ہووے تے
ایسے دوائی دی اِکو پُڑی نال تاپ لاہ چھڈے ایہو جیہاں دا-
دِتا: (سہجے راجو کول ونج کے اوہدے سِر تے ہتھ پھیردائے) توں جواب
دے ہُن- دے جواب-
شکیلہ: (جیویں آپنے آپ نال- پر آپنے آپ توں باہر) جے میں آپنا زنانی
ہون ای ویچنائے تے سبھ توں اُچی بولی والے اگے کیوں نہ ویچاں -
مہراں: (کھیڈ وِچ رلدیاں) جے مُڑ پنجرے ای پَینائے تاں پرانے پنجرے وِچوں نکلیئے ای کاہنوں -
شکیلہ: اوہدا پتہ تے ہے نہ جند کیہڑے پاسیوں نکلدی اے-
مہراں: آہو- کیویں ماردے نیں تے کِتھے دبدے نیں -
راجو: اسیں سمجھوں کھنجے ہوئے آں - سانوں رَلو-
دِتا: شِیرا!
راجو: سانوں کجھ ویہل دیو-
شکیلہ: ساڈے وس نہیں ہُن-
عاشق: آپ ازاد ہویئے تے تہانوں قید نہ کریئے-
دِتا: شِیرا!
شکیلہ: پھیر پہلوں ہو لؤ نہ آپ ازاد-
دِتا: کِسے اِک وَل دی ازادی کوئی ازادی نہیں ہوندی-
عاشق: ایہو تے آہنے آں پئی رل کے ازادی منگیے-
دِتا: جیہڑی منگیاں ملے اوہ وی کوئی ازادی نہیں ہوندی (شکیلہ تے مہراں نوں) کھوہ کھڑو ساتھوں ازادی آپنی- ایہو راہ جے- رلن دا- پہل تہاڈے ہتھ اے-
شکیلہ: میرے ہتھ؟ وساہ کیویں کھاواں - لڑن واسطے وی نیڑ ہونی چاہیدی اے تُسیں ہُن مینوں ڈھیر دراڈے جاپدے او- جیویں میں تہانوں کدیں ملی نہ ہوواں -
دِتا: (تِڑ کے، لڑائی واسطے للکردیاں) تینوں پی آئی اے وِچ نوکری لبھ گئی تے ساڈے کولوں بو آون لگ پئی-
شکیلہ: (للکرا پرتاوندیاں) تہاڈے کولوں بو نہ آون لگ پیندی تے تاں مینوں پی آئی اے وِچ نوکری دا خیال وی نہ آؤندا (کھلیر) میں تہاڈیاں گلاں سُندی ساں تے جاپدا سی کوئی بھار پیا لہندائے- جیویں گرمی دی بہار مُکن لگیاں لگدا اے- تُسیں مینوں کِسے عجیب دنیا دے بندے جاپدے سو- نویکلے- پر کولوں ویکھیا تے تُسیں اوہو سو- میرے پِنڈ دے چودھریاں دے پُتر- مہراں دے منشی- میرے بھرا- سبھ آہندے سن تیرے رَلیاں باجھ اسیں اِک پیر اگانہہ نہیں ودھ سکدے- جد میں رَلی تے پتہ لگا ہر کوئی میرے اندر دی پرانی عورت نال ای گل کرنی چاہوندا اے- ایہہ نویں سانجھ اِک سانگ اے- پرانیاں لوڑاں پوریاں کرن دا نواں ڈھنگ- نواں وی کاہدا- گھر دیاں غلاماں وِچ جو نہیں لبھدا اوہ باہرلیاں وِچ لبھن لوک ہمیش ای نکلدے رہے نیں - تہاڈا سانجھا سچ میرے لئی سانجھا کُوڑ بن گیا- کاروباری لوکاں والا سانجھا کُوڑ- سنگھنا- گار ورگا-
تہاڈیاں گلاں توں مینوں ڈر آون لگ پیا- گلاں اوہو ای سن پر ہُن میرا جی اُتانہہ آون لگ پیندا سی- سوچیا پچھلیاں کول ای پرت جانی آں - دِل رہے نہ رہے جِند تے رہ جائے خبرے-
دِتا: آپنی ازادی کھوہ کھڑو ساتھوں - ساڈیاں سِراں توں پرانی جُون دا بھار لاہ دیو- اگوائی کرو ساڈی-
گلابو: تارے ڈلھکدے نیں پئے، ویکھیں نہ عاشقا، کہ میریاں اکھیاں دا فتور اے؟ عجیب رنگ اے رات دا-
بھولا: سرگھی ویلا ہون لگائے-
2: بانگ دیاں؟
بھولا: توں کُکڑ والی دے تے میں اُتوں مولوی والی دے کے چُھری پھیراں تینوں -
2: مینوں پتہ اے نا- تینوں اخیر ویلے ترس آ جانائے میرے تے-
بھولا: ترس کاہدا اوئے- توں آپنا فرض پورا کرنائے میں آپنا-
2: فرض وٹا نہ لیے-
بھولا: (بھارا گورا) کیہ بندے کیہ جناور- فرض سبھ دے قدرت نے مقرر کر دِتے نیں اِک واری- توں میں کون آں ادل بدل کرن والے (ہیک نال) خدا پنجے انگلاں بربّر نہ کرد-
3: بچُو گھر چل لؤ- ترونہہ نوں کٹھیاں ترے چُھریاں پِھرنیاں نیں جدوں کھیسے جھاڑدے اندر وڑے او تے-
بھولا: آکھاں گے بی بی کھیسے بھر کے ٹُرے ساں راہ چ ایویں ہیرا منڈی دا مُوڈ بن گیا-
2: نہیں - آکھاں گے دُشمندار بندے آں اکثر- اِک دو بھارُو لہانے سن رقم لگ گئی-
بھولا: نہیں اوئے ایہہ نہیں ٹھیک- آکھاں گے بی بی جیہدی نیاز ونڈ کے آئے آں اوہ کرماں والا ہور دیسی-
2: علم والے لوک آں بئی۔ اِکو ماملے نوں جِنی واری ویکھنے آں ہور ای دِسدائے- چھڈو- صاف صاف آکھدیا جے بی بی مجوراں دے جلسے تے گئے ساں کھیسے کٹا کے آ گئے آں -
بھولا: (ٹُردے نیں) چل بے بے-
عاشق: مُڑ مُکی کِتھے-
(بھولے ہوریں اَجھکدے نیں)
مہراں: خبرے ساڈے ہوندیاں مُکنی وی اے کہ نہیں -
گلابو: مُکدی تے کدیں وی نہیں - پر اجدی رات ہے اچرج رات- عجیب رنگ نیں اکھاں اگے- کوئی عجیب اُلیل اے سریر وِچ-
عاشق: ساتھوں وکھرا ہوندا جانائیں - اسیں تے سوالاں دے اوجھڑ وِچ آں -
گلابو: سوالاں وِچوں ای جواب نکلے تے ویہندیاں ویہندیاں آپ سوال بن گئے- جیویں رات وِچوں دینہہ نکلدائے تے ویہندیاں ویہندیاں رات بن جاندائے- میں تہاتھوں وکھرا نہیں - میں جواب نہیں - اسیں سارے رَل کے سوال بننے آں تے رَل کے ای جواب ہونے آں - رَلن نکھیڑے لئی ہوندائے تے نکھیڑا رَلن لئی-
دِتا: ساڈے سوال عملاں وِچ جواب منگدے نیں - گلاں وِچ نہیں -
گلابو: عملاں اُتے گلاں کھلوندیاں نیں تے گلاں اُتے عمل (کھلیر) اج دی رات الوکار اے- تارے انج نہیں کدیں بھوئیں ول اُلرے-
بھولا: چل بے بے-
مہراں: (شکیلہ نال) چنگا پھیر-
شکیلہ: (مہراں نال) پھیر کدوں؟
مہراں: جد کدیں آس بنی-
عاشق: رلیوں باجھ کوئی آس نہیں -
دِتا: رلن وِچ موت دا بھؤ تے ہے-
راجو: اسیں نرا آون دا ای کارا کر سکنے آں -
شکیلہ: آہو- خبرے-
بھولا: بے بے ٹُر وی-
دِتا: (بھولے نال) تُساں وی آونائے بھولیا- (اچنبھا-3,2 نال) تہاڈے دونہاں دے تے ناں ای پتہ نہ لگے-
عاشق: عجیب گل اے خیال ای نہیں آیا-
2: میں بھولاں -
3: ایویں کردائے- میں بھولاں -
دِتا: (بھمبل بُھوسے وِچ- بھولے نال) توں ……توں …… نہیں؟
بھولا: میں..... میں..... نہیں - اصل گل دساں - اسیں تریوے بھولے آں -
دِتا: پتہ کیویں لگدائے کیہڑا کون اے-
بھولا: پتہ کیوں نہیں لگدا؟ بھولا پٹاس، بھولا تاؤڑی تے بھولا پیٹی- (پٹاس، تاؤڑی تے کُڑتے تھلے ڈِھڈ تے بدھی پیٹی وکھا کے)
3: بس جیہدے کول جیہڑی شے ہووے- اوہ اوسے شئے دا بھولا ہوندا اے سمجھو-
راجو: پر تُسیں ناں کیوں نہیں رکھ لیندے؟
بھولا: رکھیئے کِتھے؟
2: ناواں دی لوڑ ای نہیں - جدوں مجلس عاملہ دی میٹنگ کرنی ہووے بھولا چھڈ کے ترپھلا بن جائیدائے-
3: بھولا چھڈ کے نہیں - بھولا رکھ کے- بھولا ہرڑ، بھولا بہیڑا، بھولا آملہ-
عاشق: چلو جی بھولا ترپھلا- آسو تاں سہی نہ-
بھولا: مال مِلسی تے آوساں -
3: اسیں قصائی آں بئی سانوں دو دو ناغے کراونے جے-
2: تہاڈی تے سُنیائے کھل وی آپنی نہیں ہوندی جے سانوں اوہو ای بچ جائے- اوہدا وی سُنیائے مالک بیانہ پھڑ بیٹھے ہوندے نیں -
عاشق: مال تے مِل ای جاندائے یار پر کوئی گل تے نہ نہ ہوئی-
راجو: جے مال لئی آونائے تے بشک نہ آؤ-
بھولا: کیوں جے آ گئے تے دستی بمب مار کے اڈا دیو گے سانو؟
عاشق: جیہڑا کم بندہ مال واسطے کرے اوہدے وِچ سچیائی نہیں آوندی-
بھولا: خیر نال کدوں ویکھی جے ساڈی ایڈور ٹِزمنٹ سچیائی دی- اسیں تے برادر کُوڑ دے بپاری آں - کُوڑ دا لین دین کرنے آں - ساڈا تندور مال باجھوں تپدا ای نہیں - صاف جیہڑی گل جے برادر-
3: ٹھنڈے تاء ساڈے چ روٹیاں نہ لاؤ برادر- ایویں آپنا آٹا خراب کردے او آہ-
عاشق: جِتھے پیسے دی گل آ ونجے- روح نوں بریکاں جیہیاں نہیں لگ ویندیاں؟
2: رُوح دا تے پٹرول ای پیسہ اے- آپنا انجن اوور ہال کراؤ-
دِتا: چلو تُسیں پیسے واسطے ای آؤ-
بھولا: ساڈا کوئی وساہ نہیں -
راجو: تُسیں موت او؟
بھولا: آہو ڈرو ساتھوں -
راجو: ڈرنا کاہدا پھیر- اِک نہ اِک دن آسو ای-
بھولا: نہیں ویاہ کرا لؤ اوسے دن آ جاواں گے-
3: اگے پِچھے سدنا ہووے تاں سائی دینی پیندی اے-
دِتا: کیہ سائی لیندے او؟
بھولا: چھپی ہوئی لِسٹ نہیں ریٹاں دی ساڈے کول-
دِتا: کجھ دسو تے سہی-
بھولا: سِر دیون توں لیکے سِرمُناون تیکر سائیاں نیں -
2: (پٹاس وکھا کے کھڑکا کے) ساڈے مینجر نال گل کرو-
(تریوے بھرا باہر نکل ویندے نیں - مگرے مہراں تے شکیلہ وی- گلابو جھٹ کو عاشق دِتے تے راجو ول ویکھدائے- ایہہ تریوے کھلوتے اِک دوجے نوں تکدے نیں - وت سہجے لہہ کے پِڑ وِچ کھلو ویندے نیں - شکیلہ پرتدی اے جیویں کوئی کم چیتے آیوس- سہج نال دونہاں بینراں نوں لاہ دیندی اے تے ٹُر ویندی اے-
(اوہلا)