گگن جوگی
اج مدتاں پِچھوں مِلیا اے
اگے دو ترے پھیرے مہینے دے لازم پاونے
ون سوَنے راگ سُناونے
مست کراؤنے اُڈنے کھڑَپّے پَھنِیئر،
اج پٹاری سکھنی اے
''فِلماں وِچ کم مِل جاندا اے
اُنج وی جیوکا لایا ہویائے سٹوڈیو والیاں
کواٹر دِتا ہویا نیں،
آویندے نیں بِین شُکین وی
تہاڈے ورگے مہربان تے مِلنے نصیباں نال ہوئے
اَوڑ روڑے وِچ ساون گھنیئر''
''گگن جی
ویہلی پٹاری
ہُن سپ نہیں مستاؤندے تُساں؟
''سپ ہوون تے مستاواں پِیرا''
''کیوں؟
کِتھے گئے''
''سارے نیول ہو گئے نیں''
''نیول؟''
''آہو
سُندے تے ہو ہر پاسے وجّ نیولاں دا
فر فر بیان تقریراں:
'ایتنے لکھ ہر سال میں سپ مُکائے
اوتنے لکھ ای ایہنے تھاپڑ تھاپڑ چلائے'
'جُھوٹھے دعوے پیا کریندائے
پھڑاں مریندائے'
'تحقیقات کراؤ'
'ایہنوں جیل وِکھاؤ'
اخباریاں رُوحاں نوں
ایہہ جھگڑ جُھٹ پتیاؤندائے''
''اصل نِیولے کِتھے گئے نیں؟''
''سپاں چھڈیاں رُڈھاں چ وڑ گئے''
''تپسیا کردے ہوسن''
''نہیں مَسیا پئے اُڈیکدے نیں
ست اشنانیں سپ ہو جائیے
نیول ویس رکھائیے،
سو چارے کُوٹاں گُڑھک کُوک ہے ایہا''
''کوئی شُوک نہیں''
''ہووے سپ تے شُوکے''
''سپ ہُن جمدے ای نہیں؟''
''اوہ نیول سکولے ای جمدے نیں سَن وردی
اُتھاں ای جاگدے سمدے نیں''
چائی بین گگن
چھیڑی بیراگی
راگ چوں راگ کڈھیندا
اچرج جوڑ جوڑیندا
گھنٹے ادھے پَونے وِچ ای سپ کر گیا سارے سُنِیئر