نویں جَگت سرکار جُگ نِروار نواں
بھوئیں چڑھی پٹوار ناویں مالکیاں
ماملے پکے تار پَیلی گہنے پا
چَٹی لمبڑدار پنشن خور شریک
کَتّو سمندر پار پُھٹی ایہناں دی
کر دیو کنک جوار بِسکُٹ عیش کرن
حرف پڑھاؤ چار ترلے نوکریاں
داڑھے تے وستار ویتر وردڑیاں
رِیت گھڑو ہتھیار اندر پئے کھڑکن
سِکھڑے مُسل کراڑ بَنھو رجمنٹاں
پِچھوں گھتو پاڑ اَگا جُڑ نہ سکے
پلے نور انوار بھر دیو چھاتڑیاں
نَک دی سیدھ اسوار چڑھیا مُڑ نہ سکے
سنت پیر دَر دوار مُراداں تیل دیو
کَنڈ تھاپڑ تلوار بھارُو سَر کر لؤ
کالے پانی کاڑھ جیہڑے انموڑ کوئی
کُرس دیو دربار وِچولا گیراں نوں
لُچ تلو اِنکار سیاسی چاڑھ کڑاہ
مَچ مَرے اخبار بھڑک بھڑکا ہو
تھئے نہ خلق نوں سار ہوئی ورتی دی
’لاہ1 سِروں بھوئیں مار‘ نہ کوئی ونگار سُنے
گُھٹ بھرے کوئی ہار نہ سانجھ سروور تھیں
1- ماٹی قدم کریندی پار
بُلھا ایہہ بجھارت بجھیں، لاہ سِروں بھوئیں مار (کافی بلھے شاہ)