نوری دی بولی
لِکھن
جُھمر
چادر اور چار دیواری
پرھایاں دا گاون
خبراں ختم ہوئیاں
وساکھی دا گاون
لہور شہر دا اک پرانا ہٹی والا
دھمال
اَسمان تے لالی
گاون
ہاڑ دی رات
چوہڑِیاں دا گاون
خیال
بھنگڑا
ویکھو
گلی وچ گلاں
رُکھ
رنگ
کچی ابادی وچ پکیاں جداداں
نظام لہار دا گاون
لہور شہر تے ہاڑ دا حملہ
رُت لیکھا
سرکاری سکول
اک نواں کیتا گاون
اک آونی جیٹھ چودھویں دی اگونہی خبر
شاعری
دعا
شیراں دا بیان
کولے چنن والی
خیال
مکھیر
وساکھ دی آونی
خیال
چیز گواچی
مناں غم نانہہ کر
سن 80ء دا ساون
خیال
پہاڑ دی وار
خیال
پُرسلات
فلسطین جون 82ء
موسم ٹپکے دا
جنگل وچ دلیل
اُرار دی رُجھ
دامن دی ویل- مادھو لال حسین دی ویل
اُپج
خیال
آون والا
نوری۱ دی بولی
نظام لہار دا ڈھول سُن کے
لہوروں چھٹی آیا شاعر
نوری کیموکے نوں آکھن لگا
ایہدے نالوں تے اردو اسان اے لوکاں واسطے
انگریزی جلدی سمجھی دی اے
مزہ تے اوہ اے مُونہوں نِکلے جا کے لگے
جس طرح لگدی اے گولی
سدھی سادی گل پنجابی بولی
نوری آکھیا- جیویں!
گولیاں ویریاں نوں ونڈن کان ہوندیاں نیں
بیلیاں نوں ونڈن کان ہوندیاں نیں بدوکاں
بدوک تاں سدھی سادی گل ناہیوں ہوندی
سدھی سادی گل تے ناہیوں ہوندی گولی دی
پر تساں تاں بختاوراں دے سِیری ہوئے
سچے او تسیں وی
ضلعیوں لسنس بھرا کے چھنباں تے اوہناں ڈھانیاں ہوئیاں مُرغائیاں
مُرغائی کیہڑی کسے ہتھیں بنائی اے
اوہدی کد کسے سِکھی اے بولی
گولی گھڑ کے گھلی اے گوریاں
تساں بختاوراں نوں بھر کے نپائی اے
کُتیاں بھج کے آندی اے مُرغائی
تساں وی کولوں ہَس بول کے بُرکی چائی اے
۱- نوری کیمو کے- ویہویں صدی دے پہلے ادھ دا شاعر جیہنے نظام لہور دے ڈھولے بنائے
ہن لوکاں ۱ وچ جیہڑے چھوہر گھسیندے نیں ترپڑ دیہیں سرکاری
الف دا آم پکیندے نیں
دوپہریں وگیندے نیں گُلیلاں
مہراں دے باگیں امباں توں اُڈیندے نیں توتے
سُتّے سُتّے پئے تربھکدے نیں راتیں
پوڑی دے ڈنڈکے ہتھ وچ بَھونی ہوندے تک کے
آکھ ویکھ کے بھرتی کراون کان جیہناں نوں سُکھی بیٹھے نیں ماپے
سُکھالا اوہناں نوں وی اُڑدو ای اے
اوہناں بھانے وی سدھی سادی گل اے گولی
پر جیویں! نوری آہدا ای:
جمن لاء دیاں اُجڑ گیاں نوں
کُھسے حق نِروان کان
صدیاں بدھی ڈُبّے لیکھے تارن کان
ہستی نویں اُسارن کان
جد وگی سہنی پے جاوے
جد آپ وگانی پے جاوے
جد ہتھیں بنانی پے جاوے
نہ گولی سدھی سادی آ
نہ بولی سدھی سادی آ
- لوک: پنڈ’ وستی