جیہناں رَتیا سچ
] ایہہ کھیال اے، وار نہیں پڑوار، ویلا ایہدا سن اُنی سو تریہہ توں لاء اُنی سو ستر تائیں اے لگ بھگ[
کلی 1
(کوٹھی سرکاری افسر سِپرِیئن دی- الٰہ آباد توں پنجاب وِچ آئے نُوں ڈھیر چِر ہو گیا اے- پنجاب وِچ ضِلعو ضِلعے پِھریا اے- ویاہ جہلم وِچ کِیتوس- سبھ نال اُردو وِچ گل کریندا اے یا انگریزی وِچ- ووہٹی رمّل نال اوہدے رنگ دی لوک بولی الیندا اے- پُتر اَیرِک آکسفورڈ وِچ دو ورھے پڑھ کے اج پرتدا اے پیا- کمرہ اوہدا تیار پیا ہوندا اے)
ساملو: ماں دا لاڈلا آؤندا اے پیا اج جِھیکی، سویر دی تُوں ایتھے تڑی ہوئی ایں- مینوں تے ساہ نہیوں لَین دیندی اوہ
جِھیکی: اوہا اے، آ کے رنگ وٹاسی ایہدا
ساملو: مینوں تے لگدائے اوہنے آ کے ماں دا وی پِیو ہو جانا اے
جِھیکی: نہیں ساملو- ایہہ ہور اوہ ہور
ساملو: ایہدا جایا پالیا نہیں اوہ، کِسے گوانڈھن دا اے؟
جِھیکی: رنگو رنگ نیں قُدرت دے بھیت
ساملو: بھلا پک اے تینوں جِھیکِیئے اوہدے تے- عاشق لگنی اے اوہدی
جِھیکی: کٹھے پلے کھیڈے آں- ماں میری وی ایتھے ای کم کریندی ہئی نا
رمّل: (بُوہے وِچ) تُوں ایتھے ڈَٹی بیٹھی ایں ساملو- میں کِچن وِچ پئی ویکھنی آں
ساملو: جی میڈم، کم دَسّو
رمّل: میں دساں، آپ نہیں پتہ تینوں؟ بھانڈے کیہنے مانجھنے نیں؟
گلاں وِچ لا گِھندی اے نا جِھیکی- ایہدا تے کم ای ایہا ہویا- جِبھ ایہدی نہیں تھکدی، کن تینڈے نہیں پکدے
ساملو: جُلو تُسیں، میں آئی میڈم (رمّل ٹُر گئی اے
(ہاں، کر گل پُوری جِھیکی، تُوں ایہدے پُتر دا دسیندی ہائیں پئی
جِھیکی: اوہا ای بھانڈا دھوسی میڈم رمّل دا
ساملو: تے میں کیہ کریساں
جِھیکی: مَوجاں- تینڈا وی اوہ دھو دیسی
ساملو: دھو کے وانڈھے نہ مینُوں ٹور دیوے
جِھیکی: پتہ اے تینوں ساملو، بھانڈے دس ہوندے نیں تن وِچ- نَوں تے ہر جی آپو اپنے دھوندا اے- میں دسویں دی گل پئی کرینی آں- اوہ کناں دی سُنی، نک دی سُنگھی، اکھاں دی ویکھی، مُونہہ دی چکھی نُوں کٹھی کر کے من وِچ دھریندا اے، دِل دماغ وِچ- اُتھاں ایہہ ساری سمجھ سوچ بن ویندی اے- جے سُنی ویکھی سُنگھی چکھی پرکھی نہ جاوے تاں سمجھ سوچ من وِچ جُڑ کے کُوڑ بن ویندی اے، مَیل- ایہہ پرکھن ای دھوون ہوندا اے دسویں بھانڈے دا
ساملو: تے ایہہ جیہڑا آؤندا اے پیا ایہہ اوہ پارکھ دھوبی اے
جِھیکی: آہو، مینڈی جاچے- تُوں آپے جاچِیں
ساملو: اُڈیکنی آں (نِکل گئی اے کمرے وِچوں)
کلی 2
ساملو: میڈم، جِھیکی کِتھے گئی اے
رمّل: نِکل گئی اے اوہدے نال ای
ساملو: کیہدے
رمّل: جیہڑا آیائے اَینیاں اُڈیکاں پِچھوں- دو دِن نہیں ٹِکیا ساڈے کول
ساملو: کِتھے ٹُر گیائے
رمّل: خبرے- گھر وِچ تے دِل ای نہیں لگدا اوہدا- چنگی نوکری مِلی اے، چنگی تنخواہ تے- پر نالو نال ای اپنے سیاسی یاراں نال مِل کے کُجھ ہور کری آوندا اے
ساملو: کوئی کرخانہ چلیندے نیں؟
رمّل: آہو ویہلڑاں دا کرخانہ- ویہلیاں کھاندے نیں تے بہہ کے گلاں بنیندے نیں حکومت نُوں- تے مُڑ جیلاں بھوگیندے نیں- چَوڑ نیں سارے گلادڑ- ساڈے پُتر نُوں وی خراب کِیتونیں، تنخواہ ساری اوہناں اگے دھر دیندا اے تے اپنے لئی پوٹا نقدی اوہناں کنوں گِھندا اے
ساملو: چلو جِھیکی نال اے- خیال رکھیسی
رمّل: سواہ خیال رکھنا اے اوہنے، گلادڑاں دی ماسی نے- کن کھا کے اوہدے پئی رَجسی- تُوں اپنا خیال رکھ- کم ہُن سارا تینڈے تے ای او
ساملو: میں تے تُہاڈا دسیا ای کرنا اے- تے کرنا وی اوویں اے جیویں تُسیں کروانا اے
رمّل: (ساملو دے سر تے ہتھ پھیریوس) جِیوندی رہو
کلی 3
] جیل- اَیرِک سِپرِیئن تے شِیدا ڈاکُو اِکو کمرے وِچ [
شِیدا: اَیرِک باوُ اِک گل تے دس
اَیرِک: کیہ
شِیدا: اسیں تے ہوئے نا لُٹ کھانے- ساڈا تے ہویا ایہہ ریسٹ ہاؤس- پھیرا پاوندے ای رہنے آں- تُوں ایتھے کِیویں آ وڑیوں
اَیرِک: میں گالھ کڈھی ہئی وزِیر نُوں
شِیدا: کوئی کَھیہہ کھہیڑ ہوئی آپو وِچ
اَیرِک: نہیں- اسیں سیاست دا کم جو کرینے آں
شِیدا: الیکشناں وِچ آہمو ساہما ہو گیا کِتے
اَیرِک: نہیں، اسیں الیکشن نہیں لڑیندے
شِیدا: تے ہور کیہڑی سیاست- تاش کھیڈدے او پیسے لا کے (ہسیا اے، جَھٹ ٹھہر کے آکھیوس) ایہہ گُن گُن کیہ پیا کرینا ایں- گاون تے دِل ای تے گا
اَیرِک: مینوں گانا نہیں آؤندا- ہِیر سُنن دا ٹھرک اے- اوہا سی گُن گن میری
شِیدا: ہِیر گاون دا تے ول نہیؤں سانُوں، بولی سُننی آ، تے سُنا دینے آں
اَیرِک: میلیاں تے سُنیاں نیں بولیاں، اپنا ای رنگ اے اوہناں دا، ٹوکواں وی تے پریرواں وی
شِیدا: (گنویوس) چاقُو، چاقُو
جمیا تے کَھٹ کے کھواون لئی سَیں
وڈا ہویوں تے بن گیوں ڈاکُو
وے شِیدیا، شاواشے
اَیرِک: آہا- (گُن گُن) پُورا ناں کیہ اے تینڈا یار
شِیدا: ماپیاں تے رکھیا ہئی عبدُالرشید- اوہ تے گیا گواتا- ہُن تے شِیدا ڈاکُو ای آہندے نیں سارے- اپنا ناں وی پُورا دس چھڈ
اَیرِک: اَیرِک سِپرِیئن- اَیرِک ای آہندے نیں
شِیدا: کالا انگریز (ہاسا)
اَیرِک: نہ ساڈی کوئی جات قوم، نہ دِین دھرم
شِیدا: تے ساڈا کیہڑائے- کم ای قوم تے کم ای دِین دھرم- جیویں ہُن ساڈا ڈاکہ
اَیرِک: ساڈا کم اے ہُونجھن مل وانی- اسیں سانجھ ورتارا چالُو کرنا اے- جیہدے وِچ نہ کوئی مالک ہووے نہ مزیرا
شِیدا: آہا، نہ کوئی پیسے والا ہووے تے نہ کوئی ڈاکُو- کوئی سوکھا کم اے ڈاکہ مارن- دینہہ رات جِند تلی تے دھری پِھرنے آں، پُلس دی پکڑ ولاوندے
اَیرِک: پُلساں وی تے پیسے والیاں دے حُکم ہیٹھ ای ہوندیاں نیں
شِیدا: پُلساں اوہناں دِیاں، کچہریاں اوہناں دِیاں
اَیرِک: تے جیلاں وی اوہناں دِیاں
شِیدا: جِیون وی اوہناں دے کِھیسے وِچ تے مَوت وی
اَیرِک: اساں اوہناں دی ورتائی مَوت نُوں جِیون کر کے پرتاونا اے جی جی نُوں
شِیدا: بس، اج توں میں وی تُہاڈی ستھ وِچ:
ڈاکیوں پھاکا1، رَل پَھکیا بھورا پھاگا2
چاکُھو3…… چاکُھو……
اوہا کھاوے جو سارے کھاون
اوہا پاوے جو سارے پاون
کیوں سُوٹے لاوے تباہکُو4، کُرسی تے چڑھ شِیدا
کیوں سُوٹے لاوے تباہکُو……
-1 پھاکا= فاقہ- 2- پھاگا= انند دیون والا (پھاگ= انند، سُکھ، مَوج)- 3- چاکُھو= چاکھنہار، (چاکھن= پرکھن) ویکھ چاکھ کے کم کرنہار- 4- تباہکُو= 1) تباہ کرن والے، 2) تماکُو، سِگریٹ-
کلی 4
] ڈُونگھی رات- ساملو اُٹھ بیٹھی اے اُبھڑواہے [
ساملو: جِھیکی؟
]جِھیکی بُلاں تے اُنگل دھر کے سَینتر نال ساملو نُوں اُٹھالیوس- دوئے ملکڑے نِکل آئیاں نیں- چَونکِیدار نُوں جِھیکی مُسکار کے سِر ہلُونیا اے- اوہ وی مُسکاریا اے [
ساملو: (ٹُردیاں) کِدے پئیاں وَینیاں ہُن اسیں
جِھیکی: اُدے ای جدے اوہ وسیندا اے
ساملو: تینوں کِیویں پتہ اے- دس گیا اے تینوں؟
جِھیکی: نہیں، مینڈا اپنا راہ جو اوہا ہویا
ساملو: ٹھیک ای ہا نہ گویڑ مینڈا، عاشق ایں اوہدی
جِھیکی: ایس راہ دے سارے راہی عاشق ہوندے نیں
ساملو: مینوں وی اندر اپنا کُجھ ہور جیہا ہوندا جاپدا اے- اوہدی جھاک وی مُڑ مُڑ آوندی جیہڑا مال منال تے افسری والا گھر چھڈ چھڈا کے نِکل پیا اے ایس پاسے، تے تینڈی وی- کیڈی بے پرواہ ایں ایس راہ دِیاں اڑنگیاں کنوں
جِھیکی: (ہتھ پھد چُمیوس ساملو دا) رمل جیہا اڑنگا ولا کے نِکل پئی ایں تے مِل پئیاں ہاں اساں
ساملو: جگ تے حکومت تے رملاں دی ہوئی- کیہڑا گھر اے سُکھالا جیہدی ڈوری اوہناں دے ہتھ نہیں
جِھیکی: آ کوئی آہر کرئیے،
ساملو: کیہ
جِھیکی: رملاں ایہہ رملاں رہن ای نہ
ساملو: کیہ ہو جاون
جِھیکی: جو اصل وِچ نیں
ساملو: کیہ
جِھیکی: ڈھوراں دیاں پَیراں دے اَیر
ساملو: وڈیاں بھوئیں والاں دیاں ڈھوراں دے؟
جِھیکی: رانجھیاں دی ہیک تے ٹُریندیاں مجِھیں گائیں دے
ساملو: (نچی اے) آ رل کرئیے آہر
رملاں ہِیراں ہوون
(جِھیکی وی رلی اے) مُکن وچھوڑے ازلاں دے
کھالے سِیراں ہوون
] دوئے نچ چال وِچ ٹُریندیاں گئیاں نیں- اگوں ڈھول دا واج [
ساملو: (ہسی اے) ایہہ ساڈے کِیتے پیا وجدا اے
جِھیکی: ایہہ جھوک عنایت اے- اِتھاں رَوضہ اے
ساملو: کیہناں دا
جِھیکی: صوفی شاہ عنایت دا
ساملو: میلہ لگا ہویا اے اِتھاں تے، کون آہے اوہ
جِھیکی: جُل ویکھنِیاں
] اِک جنا آیا اے- گل وِچ جھولا سُ- جھولے وِچوں مُٹھ مُٹھ شِیرنی دوہاں دیاں ہتھاں تے دھر گیا اے [
جِھیکی: (اِک لنگھدی جنی نال) بَھینے کیہ ناں اے تینڈا
جنی: پھجلاں
جِھیکی: میں آں جِھیکی تے ایہہ ساملو اے- لہوروں آئیاں سلام کرن
پھجلاں: دو پل اتھائیں کَھل ونجو- جیہڑے بھاگاں والے مَلک دی بھوئیں اے دوالے، اوہدا گھلیا چڑھاوا ایہہ سرکار دے چرنِیں دھر آواں، ول تہاکُوں کھڑساں-
جِھیکی: (جاندی نُوں) تھورا تینڈا بھَین پھجلاں
] کھلو اُڈیکدیاں نیں، پرتی اے پھجلاں [
پھجلاں: آؤ بیبی
جِھیکی: اساں اندر جا کے زیارت کرنی اے روضے دے
پھجلاں: بیبی سوانیاں کُوں اندر جاون دی اجازت نہیں- تُسیں سردل تے متّھا ٹیک کے دُعا منگ لینی- اساں تے ہوئیاں مُزیرناں- وڈیاں وڈیاں مِیر زادِیاں وی باہروں ای زیارت کریندیاں نیں
ساملو: ہے کون سن پِچھوں ایہہ صوفی عنایت
پھجلاں: ولی اللہ، برکاتاں کراماتاں والے، جیویں لہور وِچ نیں، شہر داتا صاحب تے چھاونی میاں مِیر صاحب
ساملو: بھَین جی تُسیں لہور بارے سُنیا ہونائے بہت کُجھ
پھجلاں: میں آپ رہ کے آئی آں اوتھے بیبی، مہینہ دو مہینے کئیں واری
ساملو: اوتھے تُہاڈی رِشتے داری اے؟
پھجلاں: مینڈی نہیں، ساڈے مَلک صاحب دی اے- بیگم سرکار اوہناں دی پِچھوں لہور دے نیں کشمیری- پھیرا پوندا رہندا اے اوہناں دا پیکیاں ولے- اسیں خِذمتیاں وی نال ہو آونیاں- وڈی حویلی اے- کشمیری دروَجّے- ویکھی ہونی اے تُساں بیبی
ساملو: اساں شہر دے اندر گھٹ ای جانِیاں
پھجلاں: بیبی اپنا شہر تاں ویکھ لؤ پہلاں- پھیر ای دُوجے پِنڈ گراں وی دِسن نا تُہانُوں
جِھیکی: سچ پئی آہنی ایں بھَین پھجلاں- اپنا پتہ پووے تاں ای دُوجیاں دا وی ہو سکدا اے
پھجلاں: اپنا پتہ وی پِھر کے ای لگدا اے اندر باہر تے شہراں دا وی
جِھیکی: اپنی بیگم سرکار نال تے مِلا دیو سانُوں
پھجلاں: اوہناں تُہانُوں پراہونِیاں کر لَینا اے تے وت اساں خِذمتی تُہاڈِیاں وی
جِھیکی: (ہتھ گُھٹیوس پھجلاں دا) اساں تُہاڈِیاں
پھجلاں: جے ہر کوئی ہِک بئے دا خِذمتی ہووے تاں جگ بہشت نہ تھی ونجے- مِٹھا ہووے کول تے تہاڈیاں مُونہاں چ رکھاں
ساملو: رکھی تے آوندے او- گلاں تُہاڈِیاں مِٹھا ای نیں
پھجلاں: اوہ ویکھو نا- دِسدی جے نا لوء حویلی دی- چلو ہُن اودھر
کلی 5
] حویلیؤں کُجھ اُرے اِک بُڈھڑا سِر تے پرنا ولی بہاری پیا پھیردا اے- پھجلاں لے کے پئی آوندی اے جِھیکی تے ساملو نُوں- سینتر نال اوہنوں کول سدیوس [
پھجلاں: کیوں بابا سوندھی؟
سوندھی: کون نی ایہہ
پھجلاں: لہوروں آئیاں نیں میلہ ویکھن- میں آکھیا بیگم سرکار نال مِلاونی آں
سوندھی: ایتھوں ای پرت پِچھانہہ تے چھڈ آ جِتھوں آندِیاں نی
پھجلاں: کیوں بابا سوندھی
سوندھی: پُلسیئے آئے ہوئے نی اندر- ایہناں دے لِیڑے لہاونے نی؟
پھجلاں: لوہڑا، کیہ آکھاں ہُن ایہناں نُوں
سوندھی: گھاٹا اے تینڈے کول ولاویاں دا؟ مینڈا مَتھا نہ بُھوا ایس عُمرے- مُڑ پِچھانہہ
پھجلاں: (کُڑیاں کول آ کے) چلو پھیر سہی- آؤ میلے ول ای
جِھیکی: کیوں پھجلاں جی، کیہ گل اے؟
پھجلاں: پروہنے ہور آئی بیٹھے نیں اندر- بیگم سرکار کول ویہل نہیں ایس ویلے
جِھیکی: ہُونہہ (تریوے پِچھانہہ پرتِیاں نیں)
پھجلاں: جھوک والی سرکار ای سرکار اے
سِر سردَل نُوں ہِک کریندی اے
ساملو: آہا- اج دی رات اوہدے لئی اے، سانُوں ہور سرکاراں نہیں ٹوہنیاں چاہِیدیاں
پھجلاں: ویکھو کون پیا آوندا اے مِلن تُہانُوں
]شِیدا آیا اے [
شِیدا: پھجلاں، فضل فصَل (گلوکڑی)
پھجلاں: رشید ایہہ نی جِھیکی تے ساملو- اَیرِک دے گھر کم کریندیاں نیں
شِیدا: اَیرِک دا گھر تے ہُن ایہہ جھوک اے
پھجلاں: آہندیاں سن اساں زیارت کرنی اے عنایت سرکار دے روضے دی اندروں- میں دسیا عورتاں نُوں مناہی اے روضے دے اندر جاون دی
(شِیدا ہسیا اے، پھجلاں وی رلی اے)
شِیدا: نی ساتِھیو، عنایت سرکار روضے وِچ تے نہیں، اوہ تے اپنی کرت وِچ نیں
پھجلاں: ساہ ساڈا عنایت دی کرت اے
رمّل: [دُوروں واج] جِھیکی…… ساملو……
ساملو: (نیڑے ہوئی اے) جی میڈم
رمّل: اوہ ہُن کوئی نہیں- میں رَملی آں- جدوکیِاں گئیاں ہو تُسیں، میں کملی ہوئی پِھرنی آں- سَوڑیاں گلیاں وِچ وڑ وڑ ویکھنی آں ترِیمتاں نال ہوندی ورتدی- مینوں سچ سہی پئی ہوندی اے تُہاڈی تے اَیرِک دی کیتی
(نچی اے) تُساں دِھیاں اوہ پُتر، نہیں،
تُسیں سیّاں اوہ بیلی
رَملی کملی میں نی سیؤ
ہُن گلیاں ای سانُوں حویلی
] اَیرِک سُن کے آ رلیا اے [
اَیرِک: ماتا دھرت مہت، ایہہ سانُوں ہُن کڈُھونیں ایتھوں
رمّل: ایہہ مَت نہیں نا ایہناں نُوں، سبھ جائیں ہِکا ای نیں، کیہ ریلاں کیہ جیلاں
شِیدا: چِنتا گھیری بیٹھی اے ایہناں نُوں رمل جی، ماڑیاں چِتاں وِچ نچن لگ پئی اے سانجھ سہج دی آس- ایویں ہوندی گئی تے سانُوں پٹ کڈھنا اے ایہناں، جداتاں بُھر جانیاں نیں ساڈِیاں
رمّل: کڈھنا نہیں رلا لینا اے اپنے کم وِچ- نہ حاکمی رہنی اے نہ نوکری
شِیدا: ایہہ دھڑکا ودھدا اے پیا پلو پل
اَیرِک: اساں گئے تے ایہہ کم ساڈے نال ای تے نہیں ٹُر جانا، رہنا اے ایتھے، رنگ وٹائی آونائے
] جنے جنیاں نچ گاوندیاں آئیاں نیں دُکڑ نال:
آؤ فقیرو میلے چلیئے عارف کا سُن واجا رے
انہد سبد سُنو بہو رنگی تجِیئے بھیکھ بیاجا رے
] انہد واجا سرب مِلاپی نِرویری سرناجا رے
میلے باجھوں میلا اَوتر رُڑھ گیا مُول ویہاجا رے
کٹھن فقیری رستہ عاشق کام کرودھ من باجا رے
بندہ رب بھیؤ اِک بُلھّا پڑا جہان براجا رے
اَیرِک رمّل پھجلاں شِیدا جِھیکی ساملو وی رلے نیں [
کلی 6
]سیالکوٹ مِشن کالج دا ہَوسٹل- سپرنٹنڈنٹ ٹَیسلر دی رہائش- دو کمرے، اِک بیٹھن دا، اِک سمن دا- اَیرِک سِندھوں نِکل ایتھے اپنے سجن ٹَیسلر تے اوہدی ووہٹی شِیلا کول آ ٹھہریا اے- اَیرِک شِیلا دا مَسیر اے [
شِیلا: میں چاء لیاونی آں
ٹَیسلر: پُلس مگر لگی ہوئی اے ایہدے- پہلاں اوہدا اُپاء تے سوچ لیئے……
] پَوڑیاں توں بُوٹاں دا کھڑاک [
آ گئے نی
شِیلا: (اَیرِک نُوں) میرے نال آ جا دُوجے کمرے وِچ (اَیرِک اوہدے نال ٹُر گیا اے- دو پُلسیئے آئے نیں، ٹَیسلر باہر آ کے اوہناں نُوں مِلیا اے)
اِک پُلسیا: اَیرِک سِپرِیئن نُوں لَین آئے آں
ٹَیسلر: سِندھ گیا ہویا اے اوہ تے
دُوجا: اوتھوں پرت آیا اے سیالکوٹ- تُہاڈے کول ای ہونا چاہیدا اے اوہنوں
ٹَیسلر: مینوں تے مِلیا ای نہیں
پہلا: چلنے آں اسیں (دوئے پَوڑیاں ول ہوئے نیں)
دُوجا: ایہہ نالدا کمرہ وی تُہاڈا ای اے؟
ٹَیسلر: جی، میری بِیوی اے اندر
] پُلسیئے بُوہا کھڑکایا اے، اندروں ادھ ننگی شِیلا جھاتِیوس [
شِیلا: کپڑے پئی بدلنی آں
پہلا پُلسیا: اوہو…… ماف کرنا-
] دوئے پُلسیئے پَوڑیاں لہہ گئے نیں- اَیرِک شِیلاتے ٹَیسلر کمرے وِچ پرتے نیں [
ٹَیسلر: ہُن لہور چلنے آں تے اُتلیاں نال گل مُکاونے آں- تُوں پڑھاون دا کم کر اوتھے تے سیاست نُوں گھر وِچ ای رکھ
شِیلا: آہو- جِس گھر وِچ میرے جیہی سیاست رہندی ہووے اوتھے پولِیس کیویں آ سکدی اے (ہاسا)
کلی 7
] لہور- شاہ حُسین کالج- ترے کُھلے کمرے- اگے برانڈا تے کُھلا کچا ویڑھا-
اَیرِک سِپرِیئن برانڈے وِچ بیٹھا کتاب پیا پڑھدا اے- جِھیکی تے ساملو آئیاں نیں- اَیرِک اُٹھ مِلیا اے دوہاں نُوں- تریوے آہمو ساہمنے بہہ گئے نیں [
اَیرِک: کیہ خبراں نیں مُلتان دِیاں
ساملو: اسیں تے تُہاڈی خبر لین آئیاں ہاں
اَیرِک: آہو چنگی طرحاں خبر لؤ ایہدی- کِتے ٹِکدا ای نہیں
جِھیکی: (ہسی اے) اسیں گئیاں ساں اِسلامیہ کالج- پتہ لگا تُسیں چُھٹی کر گئے او
اَیرِک: میں تے نہیں کیتی، کرا دِتی اے کالج دیاں مالکاں
جِھیکی: دو ٹِیچر تے کڈھے اوہناں یُونین وِچ کم کرن پاروں، پر تُسیں……
اَیرِک: مینوں کڈھیونیں یُونین وِچ کم نہ کرن پاروں
جِھیکی: ساڈے جیہیاں پُٹھے پاسے پئیاں دی خبر نہ لَین پاروں (ہاسا) یُونیناں دا کم تے دستُوری ہویا نا
اَیرِک: نوکریاں چوں کڈھے جاون والیاں نُوں کھاون پاون لئی کوئی آہر تے کرنا ای پوندا اے
ساملو: اسیں تے ٹیوشناں کر کے کھانِیاں
اَیرِک: ایہہ وی ٹیوشن سینٹر ای سمجھو
ساملو: اسیں تے کالج سمجھ کے داخلہ لَین آئیاں ساں جِھیکی……
اَیرِک: ایہہ کالج ہے وی اے تے نہیں وی
جِھیکی: بس اسیں تے ایتھوں اوہا پڑھنا اے جیہڑا پڑھایا نہیں جاندا
ساملو: اَیرِک جی، کالج تے دِن ویلے لگدے نیں نا- شاماں ویلے دِن دے پڑھے نُوں ان پڑھیا کراون لئی داخلہ لیندیاں ہونیاں نیں ایتھے
اَیرِک: کُجھ تے اوہ آوندے نیں ایتھے جیہناں نُوں کِتے داخلہ نہیں مِلدا- پر کُجھ اوہ وی جیہڑے وڈیاں کالجاں نُوں چھڈ کے ایتھے آ ویندے نیں- بنایا تے کالج ای سی، پر اساں لوک بولی نُوں اگیرے کیتا تے ایہہ لوک رہریت دا کھاڑا بن گیا- اوہا پڑھائی اوہا سیاست
جِھیکی: جو پڑھت سو کرت
] ترے مُنڈے تے دو کُڑیاں نالدے کمرے وِچوں نِکل قوالی کرن لگ پئیاں نیں- باہروں پنج ست ہور وی آ رل پئے نیں چھوہر چھوہِراں [
گھڑیالی دیو نِکال نی
اج پی گھر آیا لال نی
گھڑی گھڑی گھڑیال وجاوے
رَین وصل دی پیا گھٹاوے
میرے من دی بات جو پاوے
ہتھوں چا سٹے گھڑیال نی
اج پی گھر آیا لال نی
انہت واجا وجے شہانہ
مُطرب سُگھڑا تان ترانہ
بُھل گیا صوم صلات دوگانہ
مدھ پیالہ دھن کلال نی
اج پی گھر آیا، آہا، آہو نی اج پی گھر آیا لال نی
مُکھ ویکھاں تاں عجب نظارہ
دُکھ دلِدر اُٹھ گیا سارا
رَین ودھے کائی کرے پسارا
دِن اگے دھرو دوال نی
اج پی گھر آیا لال نی
گھڑیالی دیو نِکال نی اج پی گھر آیا لال نی
] وِچوں اِک کُڑی باہیں چا کے گِرہ لاوندی اے [
نہ مَیلا نہ دُھندلا نہ بھگوا نہ کچ
نانک لالو لال ہے
سارِیاں: نانک لالو لال ہے
سچّے رَتّا سچّ
] قوالی دھمال ہو گئی اے [
گھڑیالی دیو نِکال نی
اج پی گھر آیا لال نی
مینوں اپنی خبر نہ کائی، کیا جاناں میں کِت ویاہی
ایہہ گل کیونکر چھپے چھپائی
ہُن ہویا فضل کمال نی
جِھیکی: پڑھن پڑھاون تے ہِکّا ای ہویا پیا اے اِتھاں
اَیرِک: اسیں وی پڑھنے پئے ہوئے آں
] اُٹھ دھمالِیں رلیاں نیں جِھیکی تے ساملو- اَیرِک وی [
ٹُونے کامن کرے بُہتیرے
سحری آئے وڈے وڈیرے
ہُن گھر آیا جانی میرے
لکھ ورھے رہی ہوری نال نی
گھڑیالی دیو نِکال نی
بُلھا شَوہ دی چھیج نیاری
نی میں تارن ہارے تاری
کیویں کیویں ہُن آئی واری
وِچھڑن ہویا محال نی
اج پی گھر آیا لال نی