کون پیا وِچ ہیلو ہیلو کردائے
ایہدی خیر اے- آپنا ای بندائے
تھری ٹو سکس پھیر
کیہڑی پکچر
جِتھے ہال چ کوئی نہ ہووے
پکچر اینویں بور کرے گی- ڈرائیو ٹھیک اے
ہیلو ہیلو ذرا ڈس کنکٹ تاں کریو
کوئی وڈا ای ڈھیٹھ اے- تھوڑے کیتیاں نہیں ایہہ مگروں لہندا
مزے لین دے ایہنوں
لکھ واری اسیں ڈس کنکٹ پئے کریئے- ایہنوں ایہو نمبر ملنائے
ہیلو ہیلو ذرا ڈس کنکٹ تاں کریو
میں بڑی ضروری گل کرنی جے اِک تھاں- انٹر فیئر کرن دی معافی چاہوناں
مزے لوو جی چھڈو گلاں ہور ضروری
معافیاں کہیاں- اسیں تُسیں کوئی غیر تاں نہیں
ہیلو ہیلو تُسیں کون او بئی
ڈسکنکٹ تُسیں کیوں نہیں کردے- کراں رپورٹ میں
ہیلو ہیلو کمپلینٹس
کیہدی رپورٹ تے کیہدے اگے- تُسیں اسیں کوئی دو تاں نہیں
جان دے ایڈا کچیاں نہ کر سو- ایہہ کوئی ساڈا پیو تاں نہیں- تھری ٹو سکس
نیلی ساڑھی بنھیں اج توں
ہائے- ساڑھی دا میں ستیا ناس کروانائے
ستیاناس تے ساڈا ہونائے ساڑھی دا کیہ جانائے
یو تھنک دَیٹس کلیور
ہیلو ہیلو ذرا اُچی- اُچی مینوں آواز نہیں آوندی
آہو جی ہن کاہنوں آوے- بڑے سیانے کن نیں تہاڈے
نالے اسیں تُسیں تاں ہوئے اِکو
ساڈی تہاڈی کندھ نال کندھ اے
اوہ آواز نتھاویں باہر دی
اگلا بھانویں لاؤڈ سپیکر لا کے بولے
راہ وِچ گم سم ہو جاندی اے
رب دا ناں جے کرن دیو مینوں
اج اخیری دن اے
جے اج گل نہ ہوئی تاں کُجھ نہیں ہونا
سو واری کرو جی میں کیہ کہناں
پر باہر دِیاں آوازاں ہوندیاں انیویں ای نہیں
میں ٹرنک کال تاں ہی نہیں پیا کردا- شہر چ ای- اج اخیری دن اے
ہیلو ہیلو ذرا اُچی اُچی
کوئی ہووے تاں اُچی بولے
تُسیں کون او
اسیں کون سہی
جو وی او تُسیں رب دا ناں جے
آپنی آواز دے وچ رلا کے اوس آواز نوں اُچی کر دیو
اک واری میری گل تاں ہو جاوے
جو بولے سو کنڈا کھولے- اسیں کوئی ٹرک اوپریٹر نہیں
تُسیں ایکسچینج توں نہیں پئے بولدے؟
ایکسچینج توں اجکل کوئی نہیں بولدا
پر میں تہانوں ڈائل تے نہیں کیتا
سانوں ڈائل نہیں کوئی وی کردا
پر ڈائرکٹری
جیہڑے نمبر کتابیں چڑھ گئے اوہ نہ ملے ملایاں
باہر دیاں آوازاں بند نیں
آپنے آپ توں دوجے تائیں سفر دا آڈر کوئی نہیں
کیہ کراں پھیر
جے اج گل نہ ہوئی میری تاں پھیر کدی نہیں ہونی
کرنا کیہ اے
کن ریسیور اُتے رکھو- انگلی ڈائل اُتے
باہروں باہروں جاگدے لبھو- اندروں ہو جاؤ ستے
سُتیاں سُتیاں جیہڑیاں چاہو آوازاں سن لئو