فرید بھنڈار

نِکے ہوندیاں توں گاون دی چس آہی

جس مِلنا کول بہال اوس گاون سُننا

پیو مینڈا

جمُوں وِچ تحصیلدار ہا،

چنگا سُکھال ہا،

سوئن دی تے مینوں لَس نہ آہی

پر ناں وڈیاں رکھ کُندن دِتا

اکھے ویکھ نا واج تینڈا ای سونا اے

سُن چھڈنیاں میں صفتاں سلاہاں

تھیاں باراں دا واج وِچ تریڑ جیہی آ گئی

میں جُھر پاسے ہو بیٹھاں

سوچاں کیہ ہُن جیونا

پیو مینوں اِک فقیر حضوری لے گیا

سُن اوس واج آکھیا

گلا تینڈا ہُن کُھلدا اے پیا

دو ورھے تُدھ گاون سناونا کِسے نُوں کوئی نہیں

تے کرنا کیہ اے

ہر ویلے رب رب

نال ریاض سرگم

سُر تینڈے کِھڑ ویسن

واس اوہناں دی کَن جہانی دھو دیسی

کیتم اونویں،

دونہہ سالاں مگروں گنویا

اپنا آپ سُنجاتا

چَس= مزا، شوق، چاء-  بہال= بٹھا کے (بہالن= بٹھاون)-  سُکھال= خوشحالی-  تُدھ= تُوں -

سوئن= سونا-  لس= لالچ-  کُندن= سونا-  سلاہاں = تعریفاں -  تھیاں = ہوئیاں -

تریڑ= پاڑ، پھَٹ، وِتھ، درز-  جُھر= جُھر کے (جُھرن= دُکھی ہوون، مُرجھاون)-  ریاض= محنت-

سرگم= گاون دے سُراں دی لڑی-  کِھڑ وَیسن= کُھل جاسن (جیویں پھُل)-  واس= خشبو-

جہانی= دُنیا داری دے، ویہاری-  کیتم= میں کیتا-  سنجاتا= پچھانیا-