پیسے گوا کے
لبھن پَیلی وَل پئے آونے آں،
اگوں اوہ ٹُری آوے، واہنے سِر پَیرِیں،
کول آ کے آہندی اے
''کیوں بھائیا،
کیہی بَھونچل پئی اے''
''مائی پرلو پیسے گوا بیٹھے آں
ہُن پئے لبھنے آں''
''تے ایہہ پیسے والا پواڑا مُکاوندے کیوں نہیں''
''کم کار چلائیے کِیکن''
''سانجھی کرو نا بھوئیں
رَل واہو رَل کھاؤ''
اِک باہروں آپچُھیا''ایہہ مائی کیہڑی پارٹی دی اے؟''
''ایہہ تے گھراں دے بھانڈے مانجھ
ٹُکر کُماوندی اے''
گل مائی پرلو دی اساڈے اندر لہہ گئی
اساں ترَونہہ کُجھ بھوئیں رکّڑ
جِتھے گھاہ وی اُگدا نہ ہا
ہسدیاں کھیڈدیاں رَل واہی، سانجھا پانی لایا
کیہ دسیئے کیہ ہویا کرشمہ،
سبھ توں ودھ اُگاس،
مائی پرلو نُوں اساں اوہدے وِچوں نذر دِتی،
ہس موڑیوس:
''رکھو نا کول ونگار
ایہدے نال اِک سانجھا بھانڈا سارو
تے چکھو سواد اَن چکھیا،
ڈُبیا صدیاں دا رَل تارو''