ایہہ جے پَین1 اساڈا
ہے پر اپنی مرضی دا
آہندا اے لؤ لِکھناں
تے لِکھدا کوئی نہیں،
اچن اچیت اسیں ایہنوں چیتا کراونے آں
تُوں تے کانی ایں
دِل دریا دی کندِھیوں اُسری،
تُرت ایہہ نِرتن لگ پوندی اے
ایہدیاں پَیراں دے اَیر
اُگھر اکھّر تِھیندے نیں
پوتھے ارتھاں دے
دِل دریا دے مَنڈ2 تے لِکھِیندے نیں
1 -پَین: قلم (انگریزی)- 2 -مَنڈ: نَیں دا اوہ کنڈھا جیہڑا پانی نے اندر سَر کے وتریا ہویندا اے، اوتھے اُگاس وی گھنی ہوندی اے تے واس وی-