اوہ وی ویلا ہا
جدوں نَونہہ لاہونے اپنے
تے اوہا ای لگنا جو ہر واری لگدا ہا،
دھاوندیاں کھاوندیاں
اندر باہر آوندیاں جاوندیاں
وی ایہو ای ہونا،
کِسے وی کم وِچ کُجھ وی نواں سہی نہ پوہنا،
وت کھبّے پکھ دیاں کُجھ جِیاں نال اُٹھن بیٹھن ہویا،
مارکس نُوں پڑھیا،
پوری وار دی پڑھت سار نویلی تھی گئی،
ککھ پَتر وی واپری اپنی
کر کے نوِیں سُناوندے نیں ہر دم،
سمن جاگن نال وی سانگا اچرج ہو گیا اے
گُذریا ویلا
رنگ وٹا کے مِلدا اے
تے حاضر گھڑی وِچ ہو اجوکا سردا اے،
آون ہار ویلے دی آس وی
نچ نچ کولوں لنگھدی اے،
کدیں ٹھیڈا کھا کے ڈَھے پَیندی اے،
وت کپڑے جھاڑ کے اُٹھدی اے
تے بھاو1 اچنبھے نَینِیں کھیڈیندی اے
1 -بھاو: نِرت وِچ ورتی واپری نیناں دِیاں سینتراں راہیں وکھالی جاندی اے- اوہ سینتراں بھاو اکھویندیاں نیں -