ساڈے شہر پُرانے دی گل اے
میں سکُولے ستویں جماتے پڑھدا ساں،
سکولوں آوندیاں چکری ناؤں دا چَونک اِک راہ وِچ آوندا ہا
ذرا گول ہا چَونک خبرے ایس گلے،
وِچ چکری دے لہندے آہے
کار وپاری وڈے،
ہٹی اِک بند ای رہندی آہی،
پنجِیں ستِیں دِنِیں اوہ کُھلنی،
سوانی سِدھ پدھری
منڈی دی ریڑھیوں سَودا اوتھے لہاونا،
گاہک کولوں لَینا کُجھ نہیں
پرچی لِکھا اوہنے رکھ لینی
تے سَودا اوہنوں پھڑاونا،
جے گاہک نُوں لِکھنا نہ آوے تے گُوٹھا اوہدا لواونا،
ہولی ہولی سُوہ لگی مینوں اوہدی اِک ہانن کولوں
پیو وڈا وپاری چکری چَونک دا ہا
کلّی اولاد ایہہ لاڈو اوہدی،
چنگی پڑھائی لکھائی اوہنے
نال بہا کے کم سِکھلائی وی کیتی،
ہٹی ناویں لائی،
ایہنے ویاہ نہیں کیتا،
کُڑیاں پڑھا کے ٹُکر کماوندی اے،
ماڑیاں جِھینیاں نُوں ہٹی کھول مہینے چ پنج ست واری
سَودا لوڑیندا مُفت چوا
مِتراوندی اے،
سانجھے کارے دی اندرو اندرِیں
گُجھی ستھ بناؤندی اے پئی،
ہَٹّ لُٹوانی کہاوندی اے،
میں مِلن لگ پیا اوہنوں،
پچُھیا چِٹاں دا اِک واری
پتہ لگا سبھ خالی نیں اِکو تھیلے وِچ،
آہندی اے تھیلا ہلا کے
ایہہ سارِیاں ہُن اِکو ای نیں،
جی کرے کدیں تے تول1 کوارا دھر کے تُوں وی
رَل مِل وِچ جاوِیں
1- تول= تولن والا وٹّہ، وزن-