نِکیاں نِکیاں کُڑیاں
ستّاں اَٹھاں دی کوئی دسّاں باراں دی،
جَھنڈِیاں ہرِیاں
نِیلِیاں پِیلِیاں
کالِیاں لال ہلاوندِیاں
آون پئیاں گاوندِیاں،
” نہ کوئی وڈی، نہ کوئی چھوٹی
سانجھی سبھناں دی ہانڈی روٹی“
اگلے موڑ تے بُڈِھیاں جواناں
جِینز تے بُرخے، روکدیاں نیں اوہناں نُوں:
” بس نی بس ہُن، ٹُر جاؤ گھرو گھریں “
کُڑیاں اگوں آہندِیاں نیں:
” ماسِیو بَھینو پھُپِھیو
تُسیں ہُن پاسے ہو جاؤ،
ایہو ای راہ اے گھر دا،
بُرکی سلُونی اِکدُوجی دے مُونہہ وِچ پاؤ،
نہ کوئی ڈنڈا کھنڈا سوٹی،
کھاندیاں مِٹھی ہو جائے روٹی“