اِك اِٹ دی كندھ اے ساڈیاں گھراں وچالے
ادھ میں ادھ شیخ صاحب نے چاڑھی اے
ایہدی چنائی گارے دی اے
ساون بھادریں جے كوئی ایہدا كولہ بہہ جائے
اسو چڑھدیاں ادھ میں ادھ شیخ صاحب بنوالینے آں
شیخ صاحب دا باغ اے گھردا
دن پر رات اوہ باغ چ محنت كردے نیں
دوجے چوتھے بہار دامیوہ ساڈے گھر وی گھلدے نیں
”شاہ جی اج كل دے مینوں مُنڈے اصلی نہیں جے لگدے
سچی گل جے – تسیں جو مرضی آكھو
انقلاب دیاں، دھرتی دیاں ایہہ بانیاں پڑھ پڑھ چوڑے ہوندے رہندے نیں
پردھرتی وچوں اگن والیاں شیواں دی ایہناں رمز نہیں جانی مٹی ہتھ نہیں مارے
اُگدے رُكھ نال میرا جیہڑا رشتہ اے
میں اوہو رشتہ بندیاں وچ وی ویكھنا چاہوناں
اوہ نہ ہووے تاں كُوڑ كہانی ساری جے
انقلاب تے ہٹلر نے وی آندا ای سی“
”كل والے كِنوں لا جواب سن شیخ صاحب“
"اجے مٹھاس نہیں پوری لتھی – ہفتہ ٹھہرو"
"رنگ سوادتے سائز تہاڈا
نرافراڈ اے پھل بزاردا"
”اوجی عمل بندے دا جنس منڈی دی
پیسہ جھاڑ درختاں دا اے
بندہ جھاڑ اے پیسے دا
مینوں انج لگدائے
جیویں ہتھیں اُگائے ہتھیں سنبھالے رُكھ میرے جسم چوں روح چوں نكلے نیں
میں چاہوناں مینوں نت نرویا پھل پیالگے
تے میں ہتھیں كھوالاں سجناں نوں
ایہہ انقلاب جے اندردا
اك دوجے نال رشتہ كیہ اے ساڈا – پہلاں ایہہ سوال اے شاہ جی
اك دوجے نال عام گھروكی سلام دعا دا ایہناں منڈیاں چج نہیں سكھیا
تے دھرتی [1]دی نینہہ نویں ننیسوں – دھرتی نینہہ نویں بنیسوں“
(۲)
وساكھ چڑھے مینوں شامیں گھر وچ وڑدیاں
اك ڈھیر پچھانی، ات انوكھی مہك دا جھو لا آیائے
موتے دی ایہہ ہونہیں سكدی –
(اك ادھوراناموتیا ساڈے ویڑھے وی اے)
چیت وساكھیں ركھاں اندرویگ انوكھے اٹھدے نیں
مولسری، سكھ چین، تُوتڑی
(ساڈے ویڑھے نكے نكے تن رُكھڑے نیں)
ہوسكدائے ایہہ ایہناں وچوں كسے دی ہووے
اینی عمر گذاری اے
رُكھاں دی خشبو دی اجے سنجان نہ ہوئی
سچے ای نیں شیخ صاحب وی
میں مولسری سكھ چین توتڑی
واروواری سنگھناں نیڑے ہوكے
جناں نیڑے ہوناں
اونی ای خشبودراڈی ہوجاندی اے
میں ہار كے اندر ٹرجاناں
ركھاں نال تیرا سانگا كوئی نہیں
ایہہ تینوں آپنا بھیت كیوں دیون
شیخ صاحب ای سچے نیں
اگلی رات میں مڑگھر آیاں
مہك دے جگنو گھنے انہیرے وچ پئے لگ چھپ لبھدے نیں
اكھاں میٹ میں مگر ہوادے ہویاں
ہولی ہولی سركی جاناں
اك تھاں مہك دا گلا ساہ میرے مونہہ نوں چھوہندائے
میں ہتھ ودھا كے
اگے كھلوتے چور سجن دی بانہہ پھڑن دی كرناں
ہتھ میرا كندھ نوں وجدائے
میں اكھاں كھولناں
شیخ صاحب دے ویڑھے نسری
نویں شرینہہ مینوں كندھ دے اتوں آہندی اے
”مولسری، سكھ چین، توتڑی
ساہ وچ ساڈا ساہ اے
رُكھاں دیاں ساہواں تے
حق مالكی اجے نہیں لاگوہویا –“
دِنے دِنے میں شیخ صاحب ول جاكے
رات دی گل سناوناں
(حق مالكی والی تُك گھُسا جاناں)
شیخ صاحب دا بھریا بھریا مونہہ كجھ سنگڑ جاندائے
”مینوں كم سی – شامیں آپوں حاضر ہوساں“
وگ تگ اندر ٹرجاندے نیں
اوہ دن لاء
ہُن شیخ صاحب دیوں بہاردا میوہ آ ای جاندائے
پر آپ جدوں وی آوندے نیں
رُجھے رُجھے لگدے نیں
تے كھڑے كھڑے ٹرجاندے نیں
انقلاب دیاں بانیاں بولن والیاں دی
بندے نال بندے دے اصلی میل دی
گل نہیں كردے
1. مزدور ترانے ”انٹرنیشنل“ دی اك ٹك