ایہانوں كون ای -ساڈے گھر وچ وڑدیاں چشتی پچھدائے
آپے پچھ لے – میں آكھناں
كتھوں آیائیں كاكا – چشتی اوہنوں پچھدائے
بِیغاں لے جبال – بِلیوں اَلہ لیسَم
میں ترجمہ كرناں:
پیرا دے دربار
پنڈیوں اگلا ٹیشن –
ہرن دا بچہ اے؟ چشتی ہسدائے
"اِیگل اوتئی-"
"آہندائی ڈیگر ہوگئی"
چشتی گھڑی دیكھ كے آہندائے بلكل ہوگئی
اوہ نل توں ووضو كركے
چڑھدے ول مونہہ كركے ڈیگر نیتدائے
ایہدا چڑھدے قبلہ ای – چشتی ہسدائے
”اشاں تِدے ری اوں تكشا املائے“
”اساں جدے وی مونہہ كرسائیں قبلہ ئے“
پہنچ گیائیں بھئی پہنچ گیائیں توں
چشتی وكھیاں پھڑپھڑہسدائے
"بولی كیہڑی ماری آوندائے؟"
"ایہدی جیبھ چ تندوائے"
"توں كنج بجھنائیں بانی ایہدی"
”جدوں دا آیائے – میں ویہلا نہیں بیٹھا
میں ایہدا صوتی تجزیہ كیتائے
اصول میں لبھ لئے نیں ایہدی زبان دے –اگوں سوكھائے
جیم لام چے دال ڈال جے لفظ دے پہلوں آون الف بناوندائے
جیم دال نوں، سین شین نوں، وچ آون تاں لام بناوندائے
رے نوں غین وی، تے وی، میم وی كر جاندائے
پرپھیر وی ایہدی گل سمجھنا نرا سائنس نہیں
كجھ كجھ آرٹ وی او
ہے سائنس پر ایپلی كیشن آرٹ ای اوہدی“
"آہو جی
ایہہ سائنس تے حضرت سلیمان توں ٹردی آئی اے"
"پیوكھڈیاں تے كاریگر سو گجرانوالے
چاچا ٹرك ڈرائیور سو
باڑیوں سودا چاوندائے – شہر وشہر كماوندائے
ایہنوں اللہ واسطے پیراں اگے نذر كیتونیں
آہندائے بُتی نہیں كرونیدے
اگانہہ پچھانہہ میں ہو جُلناں
اگانہہ پچھانہہ جے ہو جُلاں
مھاڑے دِلاں چھِك كریندے نیں
میں اودرویناں“
"تہاڈے ول سركاركدوں دی لتھی اے خیریں"
"ٹھیكدار اے ملك ساہمنے- چھڈ گیائے اج دوپہر
خدمت خلق دا بڑا شوق سو
رب دے خوف توں ڈردارہندائے
آكھ گیائے مینوں سڑك تے بُھلیا لبھائے
میں كم توں ویہلا ہوكے ایہنوں خدمت خلق دے چھڈ كے آوناں
ایتھے ای بیٹھیں كا كا- تینوں ملك صاحب ہنے لے جاندے نیں"
"ایس ملك وچ انقلاب نہ كدیں وی آیا"
میں تے چشتی گلاں كردے سیر كرن نوں ٹرپئے آں
"ایس ملك وچ انقلاب نہ كدیں وی آیا"
اسیں ہنیرے پئے پرتے آں گلاں كردے
"لئو جی ایہہ اجے ایتھے ای جے"
"ملك صاحب نہیں آئے كاكا"
اوہ روون ہاكا بولدائے
ہن كیویں جُلساں
ڈاكو مانہہ نپڑیسن
مانہہ پولس آلے نپڑیسن
"جے رُنا تاں جھب نپڑیسیں- میں آكھناں
اوہ سُكے سنگھ وچوں بہی بركی جیویں ہیٹھاں كردائے
اوئے تینوں كیہنے پھڑنائیں
چشتی آہندائے
ركھ جگرا- لڑپھڑ پیر آپنے دا- بوہڑے ای بوہڑے
ایتھوں بس وچ بہہ جاٹیشن دی
اوتھوں ٹكٹ كٹا لے پنڈی دا
تے وڈے ویلے پیراں دا جا بوہا ملیں
میں آكھنا- میں تینوں رقعہ لكھ دیناں
جیہنوں دكھاسیں راہے پاسی
مونہوں آپ نہ پچھیں دسیں
ناں كیہ اے تیرا؟
"اُڈتی"
"اُڈتی؟"
"اُڈتی"
اوہنوں بس وچ چاڑھ كے میں تے چشتی مڑ كے ٹہلن لگ پینے آں
خركاراں دے ڈھائے نہ چڑھ جائے- چشتی آہندائے
نہیں ہے ہشیار گالھڑ دا بچہ- میں آكھناں
"خبرے روٹی وی كسے دتی ساسو"
"ویكھو- خیال نہیں آیا- اوہنےمنگی وی نہیں-"
"كوئی نہیں راہ چوں ٹھنگ ٹھَنگ لیسی-"
گھنٹے ادھے گھنٹے مگروں چشتی آہندائے
یار اُڈتی دا خورشید نہیں بندا؟
میں سوچ كے آكھناں- بن تے سكدائے
اسیں اك دم دونویں بس سٹاپ ول نس پینے آں-
پھیر اك دم رك كے ہس پینے آں
"چنگا كل فیر"
"چنگا كل فیر"
گھر وگھریں ٹرجانے آں-