چیتر بہارے گھا تے بیٹھا
میں کتاب پیا پڑھناں
اوہ اکدم آن کتاب تے لتھی اے
میں نیجھ نال اوہنوں تکناں
دو نیں لتاں ایہدیاں پچھلیاں
دو نیں لتاں ایہدیاں اگلیاں
چار نیں لتاں ایہدیاں وچلیاں
دو ہتھ نیں مونہہ دے نیڑے
ہتھاں نال ہوا نوں ٹوہے
پچھلی لت بھوا کے مونہہ تے پھیرے
سر تے تیتر میتر ٹوپی
وچ سریر اے راکٹ وانگر
اک پل بلدیاں اِک پل بُجھدیاں متھے تے دو اکھیں دھریاں ہوئیاں نیں
ایہدے اندر رت تے ہونی کوئی نہیں
بگا جیہا سنہرا پانی ہونائے
ایہدی باندھ ایہدی مرضی کیہہ اے
میرے کول جے موٹا شیشہ ہووے تے میں ایہنوں ہور نیڑیوں ویکھاں
کد پچھلیاں لتاں اوہنے اندر سنگیڑیاں
کد تِیر سر یر نوں چلے چاڑھ کے چھوڑیا
ورقے توں میرے سینے تیکر
پندھ کروڑاں ورھیاں دا
اوہ اک پلکار دی شیر چھال وچ چِیر گئی
اک چیک جیہی
میری ہک دے اندر لیک گئی
2
مساں میں مُڑ کے دھیان پڑھن ول لایائے
اک خاکی رنگی ڈھال کتاب تے ٹردی آوے
خاکی رنگی ڈھال دے اُتے نقش نیں لاکھے
ہیٹھ کون اے
میں ملکڑے دھون نواکے کجھ کتاب نوں چاء کے
اکھاں کاغذ سیدھے کرناں
حرفاں نکتیاں وچدیں تھلے جھاتناں
اوہ جھب ڈھال وچھا کے
نکا جیہا اک ڈُس بن بہندائے
میں اک پل لئی نیجھ موکلی کرناں
تے اوہ واء سمندر اندر تاری لا جاندائے
میں جیہنوں پیا ڈھال سمجھناں
اوہنوں کھب بنا جاندا ئے
3
اچراں نوں اک اُڈن بھمبیری
کجھ کالی کجھ لال سنہری
مونہہ دے اگے بھوویں پئی
میں پھُوک مارناں
ورقے اُتے چِت ہو کے
اوہ نکا جیہا اک نکتہ بن گئی
میں جاتا ایہہ مر گئی اے
اوہنے پَر چمکارے
رُکھاں نوں اک ناچ گھیر وچ ولدی ولدی تر گئی اے
4
پچھوں نکیاں نکیاں ہریاں ہریاں پِڑیاں والا
سنُدا کتابے اُلر آیائے
مال گڈی دیاں پہیاں وانگ ایہدے پیر سینکڑے
حرفاں لفظاں فقریاں وچدیں
آپنا سریر دھریکی آوندائے
اکو رنگدیاں بہتیاں پیراں والیا
بھئی توں نچ نہیں سکدا
چٹے کالے کاغذ تے تیرا ساوا بانا
تیری چال نوں کج نہیں سکدا
انگل نال میں اوہنوں کتابوں تھلے دھکناں
اوہ اَڑدا بہندا لہہ جاندائے
ہریا جیہا اک لیس دا تربکا
میرے نونہہ تے رہ جاندائے