فرید بھنڈار

مکھی: (پھُل نُوں) پل تینڈے نال میل ہویا اے- واس تینڈی وِچ رنگ تینڈا گُھلیا- مینڈے اندروں لنگھ ایہنے مِٹھ بن نِکلنا اے

پھُل: واء تے لوء رل مینڈے اندر لتھے رنگ سُگندھ تھئے

مکھی: میل اساڈا مِٹھ ہے- میل دا اندر رس ونجن ای کار اے- ناں ویکھ نا مینڈا- ماکھی مکھی دی کرنی اے، اوہدا تت ست

پھُل: مینڈے ناں دے وِچے ای پھَل ہے جیویں

مکھی: منس دے وِچ ای من اے، ٹُکّر، منس دی کار دا تت

پھُل: منس نُوں اپنی سار نہیں

مکھی: مُڈھوں تے آہی- اوسے سار ای من بنایا اوہدا- سوچن بولن کرن دا سوما- وت بھُل گیا اوہنوں اپنا آپا- بھُلیکھ ای لیکھ تھئے اوہدے- دھن نُوں اپنا تت جاتوس- دھن نے واء نُوں دُھوں کیتا- دُھوں دھونس اے دھن دی کُل خُدائی نُوں

پھُل: ساڈے نال وی ایہا بھُل ورتارا ورتیا اوہنے- سانُوں وکھالا کر کے اپنا لایا ساہمنے

مکھی: ساڈے تت نُوں ویچ بھُلیکھا ہور کمایا- وٹی کھٹی منس دی ایہا ای اے

پھُل: واء نُوں دُھوں کر ساہ کُساہ کیتا- کُسن کوہن، کُھٹن کھوہن

(دوئے نچ گاوندے نیں)

واء وِچ لوء اَتے خشبو

ایہا ساڈا میل انند ہے

تُوں میں واء، تُوں میں ساہ

ماکِھیوں 1 مکھی مدھوں 2 مدَن

پھُلوں پھَلّ، پھَلوں پھُل ہاں

آپ نیئیں آپے پُل ہاں

تُوں میں واء، تُوں میں ساہ

1۔ ماکِھیوں = ماکھی توں – 2۔ مدھوں = مدھ توں -