فرید بھنڈار

[پاتر: 1- اخبارچی کالم کار

2- کھبے پکھ دا نیتک1 موہری2]

نیتک موہری: ''ہویا تے ساتھوں کُجھ نہیں''

کالم کار: ''وت ہُن ہور کیہ جھونا3 جے''

نیتک موہری: ''بس رونا دھونا، ہور کیہ

اندر وڑنا، نِکل کھلونا،

ویکھنے آں

ہوندائے کرم کدن،

وہم گرم جے بہوں ہو گیا

ساڈا نکاح سواہ نال ہونا جے''

کالم کار: ''ایہہ رکھو''

نیتک موہری: ''کیہ اے''

کالم کار: ''پچانوے ہزار نَوں سو پچانوے،

آگیا4 دیو تہاڈے اج دے بیان تے کالم لِکھاں''

نیتک موہری: ''آگیا کاہدی، کرو جو کم اے تُہاڈا''

کالم کار: ''آگیا ہووے تے سُرخی ہوسی، ‘سواہ نال نکاح'' ،

نیتک موہری: ''ایہہ کیہ''

1- نیتک= سیاسی- 2- موہری= اگوان- 3- جھونا= شروع کرنا- 4- آگیا= اِجازت-

کالم کار: ''ایہہ چار ہزار پنج سُرخی دے رکھو''

نیتک موہری: ''چوکھا مِلدا اے تُہانوں ایہناں اخباراں چوں''

کالم کار: ''کیہ کرن دا، بھلا؟''

نیتک موہری: ''دسو''

کالم کار: ''جو کرن تُسیں نِکلے آہے اوہنوں نہ ہوون دیون دا''

نیتک موہری: ''جے ہو ویندا تاں کیا ہا''

کالم کار: ''نہ اشتہار ہونے سن نہ اخباراں،

نہ اسیں اوہ لینا ہا جو ہُن پیا مِلدا اے

نہ تُسیں''