جاگو
بُھکھ دیو بندی وانو،
جاگو
جگ دیو دُکھیو،
ڈھول نِیاں دے اج سِراں تے گجّے نیں
نویں جوت، رنگ نویں اج لگے نیں،
کُوڑیاں ریتاں دیاں پھاہیاں اساں وڈھیاں
جاگو، ترُٹّ گئیاں اج بیڑیاں،
کُجھ نہ ہاسے، سبھ کُجھ تِھیسوں
دھرتی دی نِینہہ نویں بنیسوں،
اج اساڈا جنگ اخیری
مورچہ کوئی چھڈ کے نہ جاوے،
جگتل ڈھولا
سانجھ خُدائی دی،
نہیں لوڑِیدے سانُوں کُرسیاں والے
اُپروں حُکم چلاونہارے
کیوں اساں تکیئے ایہناں دی مرضی
رل کے سبھ کم آپ مُکائیے،
چوراں توں لُٹ کھَسّن کارن
رُوح دی پھاہی وڈّھن کارن
اپنی ڈیوٹی آپے لائیے
آپے لائیے توڑ نِبھائیے،
اج اساڈا جنگ اخیری
مورچہ کوئی چھڈ کے نہ جاوے،
جگتل ڈھولا
سانجھ خُدائی دی،
مِل مزدُور تے ہالی کامے
اِک تھئے اساں محنتاں والے،
بھوئیں اساڈی محنتیاں دی
ویلھڑ کیوں پلسیٹے مارن،
رَت اساڈی ایہناں دی چربی
گِرجاں بن اسمانوں لمکن
اج ایہہ گِرجاں
انبروں ڈھائیے
دینہہ دے مُکھ توں کالکھ لاہیے،
اج اساڈا جنگ اخیری
مورچہ کوئی چھڈ کے نہ جاوے،
جگتل ڈھولا
سانجھ خُدائی دی