واء تے اصلوں بے رنگ اے
جِیکن پانی،
وت کِیکن پاوندی اے واء کہانی سترنگی،
انگ انگ وِچ مار ترنگ
ستّر رنگ رلاوندی اے،
پچُھو نا واء نُوں
تے اوہ ہس ہس پتر ہلاؤندی اے،
دسیندی کُجھ نہیں
اکھو اکھ کریندی اے سمجھوتی:
”میں کیہ دساں،
میں تے ہوئی ایانی
جِیکن پانی“،
پانی وی نالوں لنگھ سر ماردا ہسدا اے:
”اکھے ایویں اُلیل جیہا آیا اے
اسیں دوئے ہوئے ایانے
لکھاں ورھیاں دے ویاہے آں
جو پئے جاپدے او
سَنے اپنے
سمجھو ساڈا ای جایا اے،
رکھیو ایہہ گل اندرے،
کر کے کِسے نال
سانُوں مرواوندے او جندرے“