فرید بھنڈار

'' آہو یار،

ایہہ ای گونگلُو،

آہندائے گوہو1 تاں گلسی''

''ایہنوں بولی آؤندی اے ایتھوں دی؟''

''آپ تے نہیں بولیا

کِسے نالوں دسیائے امبرسری کشمیرئیے،

امبرسری کشمیری اے ایہہ آپ وی،

امبرسر وِچ واریاں دے آباد آہے کشمیری

ہتھاں دے اُنے سِیتے ویچن

اِتھاں آوندے

وس ای گئے اِتھائیں،

نِکل جانا کشمیر تے شلجم لے آونے

نال اُنیاں ٹوپِیاں دے''،

'' سو شلجم اصلی ناں ہا ایہدا،

مشاہُور پکوان اے کشمیری قورمہ ایہدا''

'' اُنج کشمیری آپ تے نہیں نا شلجم،

ایہہ ناں ایرانی اے

ایران چ عربی چڑھ بولی جَد ہوئی

ایہہ شلغموں ہو شلگم مِصر ول وگِیا1،

1- گوہو= گُنھو (گوہن= گُنھن)-

مِصریاں حج کروایا ایہنوں

تے شلجم کر اِیران پرتایا،

اوتھوں گیا کشمیر تے اوڑک2 امبرسر آ باہوڑیا3

تھی4 گونگلُو''،

''لمّاں پندھ5 کیتوسُو مسکِینے

وپاری شوریاں نُوں شورا چکھاون کِیتے''،

'' شرجم ہو گیا نا وپارک شر6 جاں7 جایا''

'' نَر کر سدویندا8 اے،

ہے اصلوں تے ایہہ مدِین9 مِدِھیجی10''

1- وگیا= ٹُریا- 2- اوڑک= آخر- 3- باہوڑیا= 1) مدد لئی آیا، 2) پرتیا- 4- تھی= ہو- 5- پندھ= سفر-

6- شر= بدی- 7- جاں= جدوں- 8- سدویندا= اکھواندا، بُلایا جاندا- 9- مدِین= مادہ-

10- مِدِھیجی= مِدھی ہوئی، پَیراں ہیٹھ لتاڑی-