گاون پُرانا ہا:
'دُلّا بھٹی واہلا ہو'،
لوک تے ہُن ایہہ بُھل گئے نیں،
لِکھیا کِدھرے مِل ویندا اے
'دُلّا بھٹی والا ہو'،
ایہہ تے بے ارتھا ہویا نا
''واہلا'' لِکھن دا ول نہ ہا آوندا
کسبی کاتباں نُوں
وچارے کیہ کردے،
گاون سارا یاد تے سانُوں وی نہیں ایس ویلے
گھڑ دو سطراں جُڑدیاں اوہدے نال
سُنا دینے آں،
'دُلّے دِھی ویاہی ہو
دُلّے لُٹ پرتائی ہو،
آل دوال وِچ اپنے دُلّے
جاگ اُتھل دی لائی ہو،
جی جی اندر وسدا اے
دُلّا بھٹی واہلا1 ہو،
کاہلا نہیں اوہ
سہج سبھائیں
رُت پرتا پیا ہسدا اے'
1- واہلا= واہل وان (واہل= ذمے واری)-