شپا: جِس ویلے دا آن کے بیٹھا ایں - کیہ پیا نک وچ گُنگُناونا ایں شونکی
شونکی: اِک پُرانے جماتی دی سُنائی کہانی اے بھاء، اندر پئی بھوانٹِیاں ماردی اے-
شپا: تے سُنا سانُوں کیہ ساتھوں وی بھوانٹِیاں مروانِیاں نی
شونکی: لؤ بھاء- (کہانی کھیڈ وکھاوندا اے)
جدوکے اِتھاں آن کے بیٹھے آں
سانُوں نہیں پئی سُجھدی
اگوں کیہ کرنا اے
سارے جی اِتھاویں
اپنے بیلی پُرانے
آن کے ایہو آہندے نیں:
”تُساں جگ تے اپنا ناں دُھما کے
سانُوں وی
دِھجی پُشاک پوا دِتی اے
ہُن تُساں اِتھائیں رہنا اے
اساں مننا تُہاڈا تُساں اساڈا کہنا اے“
ہُن سِک جے اُسرے وی
اساں کم اگیرے کھڑنا اے
تے یار جِگری
بانہاں اساڈیاں گُھٹ دوالے گُھمدے نیں
متھا اساڈا گُوڑھے پیار نال چُمدے نیں
”ہُن سائیں، اساں اتھاں ہاں
تُساں اِتھائیں رہنا اے
اساں اوہا پاونائے
جو تُہاڈا لہنا اے“
شپا: کیوں نُورئیے فتُورِئیے
نُوری فتُوری: ہُونہہ- فتُور ٹھپنی بھوانٹی جاپدی اے- ایہو وجدی اے پئی اجکل ہر پاسے کُل جگ تے- کم اگیرے جان نہیں دینا جو جِتھاں وی ہے اتھاں ای رہوے
شپا: تے اُتھاں رہ کے وی اوہا ای کرے- ٹھپ ٹھپ اِستری
نُوری فتُوری: اِستریاں ای ہو گئیاں نیں ہانناں ساڈِیاں - بجلی جاندی آوندی رہندی اے پر اِستریاں نِت گرم نیں
بُرجو: جیویں کھیڈ وکھائی اے شَونکی- دِل کردائے ہُن ایتھے ای رہیے
شپا: تھڑا ای اُلٹانا پینائے
بُرجو: نہ بھاء- گل کرنوں وی جاساں اساں
نُوری فتُوری: جے کھیڈ سانُوں تھڑے تے ای رکھے تے کم اگیرے جائے ای جائے