مُلتان دے نیڑے پِنڈ اے اوہناں دا
پچُھیئم اِک دِن
”تہاڈے پاسے وی چُوہڑے ہوندے نیں
صفائی کرنہارے؟“
”نہیں، اسیں تے بالاں کُوں سدینیاں
پیار نال:
چُوہڑیا میریا آ نا اُرے،
چُوہڑئیے سوہنِیے نی
کُجھ کھا وی سہی کہ بُھکھیاں ای سمنا ای،
ہو سکدا اے سمجھو تُسیں
ایہہ بالاں کُوں بُری نظروں بچاون دا حِیلہ اے
پر نہیں، ایہہ اصلوں پیار دے بول نیں
چُوہڑا چُوہڑی،
ہور وی ٹھپّی بُھلی بُھلائی گل ہے ایہناں لفظاں پِچھے
جیہدی دس وڈیریاں کدے کدار ای پاوندیاں آہیاں“
”اوہ کیہ“
”وڈی چُوہڑ ٹابری کِسے ویلے
ایس جُوہ وِچ وسدی آہی
سبھ کُجھ اپنا ہا اوہناں دا
کِسے رنگ دی کائی کسر نہ آہی“
”وت کیہ تِھیا“
”آہندے نیں جد باہروں آن وڑے نا آرِیا،
ہَولی ہَولی مالکی اوہناں سانبھ گِھدی
چُوہڑ ٹابری کُوں دبَلّ دبیڑ
صفائی دے کم تے لا گِھدا:
’جِیونا جے تاں ایہو کسب بناؤ اپنا
لوڑیندا کھاون پاون ڈھی وَیسی تہاکوں‘،
پر ویکھو نا
چُوہڑکانا شہر اے چنگا بھلا
ناں پُرانا اوویں دا اوویں ای اے
کِسے کُوں کوئی کِھج کَھیہہ نہیں،
ہور وی وستیاں نیں
جیہناں وِچ چُوہڑ دا چانن ہے“