فرید بھنڈار

کِرسانی کرسان کر، کھیت بیج سُکھ پَھل نہ لہندے

ونج کرن واپارِئیے، لے لاہا نِج گھر نہ وسَندے

چاکر کر چاکری، ہؤمے مار نہ صلح کرندے

پُن دان چنگیائیاں کر کر کرتب تِھر نہ رہندے

گُر سِکھ سُن گُر سِکھ ہوءِ، سادھ سنگت کر میل مِلندے

گُر مت چلدے وِرلے بَندے

بھائی گُرداس دی ایہہ پَوڑی، سنگت وِچ پڑھیجی 9 جُون 2023 دی شامے- ایہہ بھائی گُرداس دی اٹھائیویں وار دی ویہویں پَوڑی اے- ایہدی پڑھت بارے دو گلاں کرن جوگ نیں - پہلی ایہہ جو چھیویں سطر دسدی اے: گُر نُوں سُن کے ای سِکھ ہوئے نیں گُر سِکھ- سِکھ ہے سِکھن توں - سِکھ سِکھنہار اے سدا- کوئی بدّھی پوریجی ہوند نہیں اوہدی- نِت کُھلّے بھانڈے نیں اوہدے، کن اکھاں تے من- جانو دِل تے دماغ- ایہہ قُدرت دِتی سَک ہر جی نُوں مِلی پر ملّ ویہاری ورتن نے گھنیاں وِچ ایہہ مار دِتی- جیہناں گُر نُوں سُن کے اپنے بھانڈے مُڑ سجرائے اوہناں نوں ای باہوڑی ایہہ سَک-

دُوجی گل اِتھاؤں ای سردی اے- اوہ ایہہ ہے:

پہلیاں پنج سطراں پَوڑی دِیاں دسیندیاں نیں وئی مَل ویہاری ورتن جیہڑی کم ونڈ کیتی اے اوہدے پاروں گھنے جی تے بجَھ گئے نیں اوسے نال- اوہ باندھ ہُن کسب اے اوہناں دا- اوہ ایہدے وِچ بِیڑے ہوئے نیں - ایہو ای ہوند اے اوہناں دی- کِرسان (کِسان) راہک واہک واہی بِیجی وِچ ای رُجھے پئے نیں سِروں پَیروں - پر اوہناں دی کیتی اوہناں نوں سُکھ نہیں دیندی اُکّا- گُذران جوگا جِیوکا ای دیندی اے مساں - تے ہور کیہ دیندی اے، ڈھیر اوکڑاں دُکھیاریاں -

وپاری ویکھو- اوہناں غرقیا ہویا اے آپا لاہے دی کھٹّی وِچ پر لاہا اوہناں دا گھر وی نہیں وسیندا- سگوں اوہناں نوں بنھ دیندا اے بدیسی راس والیاں دے گُلَمّ وِچ- چاکراں نُوں ہؤمے تے مارنی پَوندی اے مالکاں ساہویں پر اوہ مردی کوئی نہیں - سگوں اوہناں دا وکھرپ ہور سنگھنا تھی ویندا اے- اوہ اپنے تت توں پریرے ہوندے رہندے نیں ہر دم- اپنے لئی غیر دھن وان ڈھیر چنگیائیاں کر کھٹیندے نیں چرچا- ہسپتال سکول کھولیندے نیں - پر ایہہ کیتی اوہناں نوں کئیاں رنگاں دی دُبدھا وِچ ول گِھندی اے- اندر رَتہ دِھجا نہیں ٹِکدی-

وڈھی ویہاری کم ونڈ راجیاں تے پرجا دی اے- راجے حاکم تے پرجا ادِھین لوکائی جیہدی گھال حاکماں دا مال بن ویندی اے تے اوہناں دی حکومت نُوں اپنی ستیا دے کر پیر لاوندی اے- ایہہ کر پیر ایس کارے جُٹ کے اپنے اصلے توں اُکّا غیر تھی ویندے نیں - ”پرے جا“ دی دَھونس جھلیندے ادِھین اپنے مُول دی نیڑ چَھڈیندے رہندے نیں - تے قُدرت دے دان کیتے ست نوں بُھلاون دا چارا کریندے رہندے نیں - راج کار اِکدوجے نال بِھڑن مِلن دے حِیلے کر کر کئیں رنگ وکھیندے نیں - اپنے عِلم دے دعویاں دے ڈھول وجاون لئی کئیاں رنگاں دے جھگڑے بحثاں اعلان بازیاں اِشتہاردے نیں -

پَوڑی دی چھیویں سطرے ایس پنج سطری ویہاری کرت دا تروڑ آیا اے- کُجھ جی اوس تروڑ نوں ماندے نیں - گُر دی دسائی سُن کے سِکھیار ہو ویندے نیں تے سادھ سنگت جوڑ کے مِلن دا ست چھکیندے نیں -

پر ستویں سطر دسیندی اے جو اجیہے بندے وِرلے ای نیں جگ تے- گُر تے قُدرت دی دس اے- پر ٹانویں ٹانویں جی رچیندے نیں ایہنوں اندر ویہاری باندھوں ہٹ کے-

بھائی گُرداس دے جوڑ ایس پَوڑی وِچ ایہہ پئے سَینتردے نیں جو اوہناں دا انت منُکھ نُوں اِک نویں ہوند وِچ ڈھالن ہے- تے اوہ نویں ہوند ای مَل ویہار دی اُتَھلّڑ ہے-

سو کارا ایہا ہے گُرداسی جوڑ دا جو سادھ سنگتی میل نوں پسار کے ہر جی نُوں ایہدے وِچ آون دا راہ وِکھایا جائے-