فرید بھنڈار

اب ہم گُم ہوئے پریم نگر کے شہر

اپنے آپ نُوں سودھ رہیا ہُوں

نہ سِر ہاتھ نہ پَیر

لتھے پکڑے پہلے گھر تِھیں

کون کرے نِر وَیر

خودی کھوئی اپنا پد چِینا

تب ہوئی کُل خَیر

بُلھا شوہ ہے دوہِیں جہانِیں

کوئی نہ دِسدا غَیر

انور علی رُہتکی دی کتاب ‘‘قانونِ عِشق’’ 1900ء دے نیڑے دی اے- ایہہ بُلھے شاہی کافیاں دا سنگریہہ ہے- نال ای رُہتکی ہوراں دا کیتا ویروا وی ہے، کافِیو کافی-

اسیں جدوں پنجابی ادبی اکیڈیمی دے جوڑے سنگریہہ وِچوں کافی لے کے سنگت وِچ پڑھ کے سمجھن دا آہر کرینے آں تاں ''قانونِ عِشق'' نُوں وی جھات لینے آں- ''قانونِ عِشق'' نُوں کاتباں نے اصل توں پرھے کرن وِچ کسر تے کوئی نہیں چھڈی پر وت وی ایہہ جھات کاری ہوندی اے-

ایس کافی بارے انور علی رُہتکی دے ویروے دا خلاصہ ایہہ ہے: ہر ہستی دے دو رُوپ ہن، اِک تے اوہدی اصل- اوس اصل دا تت ہے رلت، مِلاپ- رلت ملاپ نال بنی ہستی ہی حقیقی ہے واء پانی اگ دی رلت تے مُڈھ ہویا ہوند دا- اگوں آپت دا سانگا ای ہوند دا نِبھن سرن ہے- رلت ملاپ ای تت اے سو ایہہ ہی شَوہ ہے، کُل اِکائی جتھے ہوند ہے اوتھے ای شوہ وی ہے- سو کوئی ہوند غیر نہیں-

دوجا رُوپ ہوند دا اوہدی وکھری شناخت اے- شناخت جے تے شوہ دی ہی رہے تاں تے اوہ پریم نگر وِچ گُم ہے- پر جے اوہ اپنے وکھرپ نُوں ای اپنا تت بنا کھلووے تاں اوہ اصل توں دُراڈی ہو ویندی اے، غیر حقیقی- ایہہ مَل ویہار دا کارا ہے- سو ہوند دا دُوجا رُوپ بے اعتبارا ہے-

کافی دی دُوجی سطر دسیندی اے جو سِر ہاتھ پَیر تے تاں لبھن وکھو وکھ جے اوہ پریم نگروں باہر ہوون-

کافی دی ترِیجی سطر وار دی دس پاوندی اے- پہلا گھر تے اوہ سانجھ وسیب ہے جیہدے وِچ بندِیکی جُون نے لکھ ورھے لنگھائے، ٹُرن کھلوون رل کار کرن سِکھیا- وت سانجھ وسیب نُوں چھڈ کے مل ویہار دی پکڑ وِچ کیوں آئی بندِیکی جُون، ایہدا نتارا ''کَون'' ای کر سکدا اے (''کَون'' کُل اِکائی اے)- جدوں بندیکی جُون نے مل ویہار نُوں تجیا تے بھنیا، مل ویہار دا دِتا وکھرپ چھڈیا تاں کرت سُرت مُڑ اُدھری تے کُل خَیر ہوئی، سُکھ واسا- ہُن حاضر ویلے تے آوندے ویلے وِچ شوہ نال اِک تھیون دا انند ہے-

کافی کھیال ہے بنتر پاروں، کھیڈ- ایہدا کھیڈن ای جِیون دی جاگ مانن ہے-