سارا ورھا دکان تے بیٹھدے نیں میاں صاحب
ویلے سِر کھولن جھاڑ پُونجھ ہر شے
ویلے سر بند کرن حساب کر کے
اِک پل نہیں ایدھر دا اودھر ہوندا،
سُوٹ گرم ٹھنڈا جِیویں ہوئے بہار
چھی دینہہ چھی رنگ نیں ٹائیاں دے،
اچکن جُمعے دے جُمعے،
کدے چُھٹی نہیں کیتی، سوائے اِتوار،
مُونہہ تے بدھی مُسکار
گل ٹُھکی تُلی،
آدر اوہناں دا پُورا بزار کردائے،
مینڈی دُکان وی نال ای اے،
عُمروں ہانی آں اسیں
پر میں ادب لِحاظ دی وِتھ رکھناں،
اج آیاں میں تے ویکھناں کیہ
دُکان بند اے،
بیٹھے تھڑے تے ہوئے نیں میاں صاحب
کُھلی ڈُلھی مُسکار
کُڑتا، تیڑ دھوتی،
''کیہ گل اے اج میاں صاحب، خیر اے''
ہتھ پھڑ بہال کے نال مینوں
موڈھے دھری نیں بانہہ اج پہلی واری
''کمّوں باہرلی سوچ سی غَیر مینوں،
کدے غَیر خیال نہ نیڑے لگّا
اوہنوں پتہ سی میرا
جیویں مینوں اوہدا،
اج بُھل پھیرا اوہنے پایا اے
میں چابی گوا بیٹھاں''
''میاں صاحب ایہہ کندھ تُہاڈی اندر
کُجھ دِناں توں تریڑ جیہی پیا ویہناں،
حیران آں تُسیں ایہہ گَولی ای نہیں''
''آہا، مان جوانیاں،
ایہا ای او چابی
لبھ دِتّی اے تُوں
کُھل گئے نی بُوہے، وجّے پئے سن جو،
کُھلّے وجّ گئے نیں''
بانہوں چا اُٹھایونیں مینوں
اتے بھانگڑا پایونیں،
پیراں مینڈیاں نُوں تُرت سہی ہویا
جِتھے کھلے آں
جاء ایہہ اوہا اے روز جیہڑی لنگھنے آں
پر اوہا نہیں