پڑھیاں نفل نمازاں
رکھے نفل روزے،
حج پنج کیتے
دونہہ سالاں چ ست ہو جاونے نیں،
نال کیتیاں ہور کمائیاں وی
پُتر چَونہاں چوں دو پڑھا باہر
وڈے افسر کیتے،
کاروبار باقی دونہاں سانبھ لِیتے،
ستاں شہراں چ گھر نیں نال لنگر
جیہڑا آوے اوہ رج کے جاوندا اے،
پڑدے دار کر دِھیاں
گھراں اپنیاں ورگیاں وچ ای دوئے ویاہیاں نیں
وڈیاں عالمِ دِین سدوائیاں نیں،
تک کُفر یا شِرک دی کِسے رنگ دی سانُوں نہیں وارے،
چڑھے جیہڑے غُبارے وی بے دِینے اِنقلابیاں دے
کڈھ پُھوک اسیں تَھلّے لاہ سَٹے،
ہُن ویکھ لؤ کِدھرے نِشان ہے کوئی؟
راہوں تِھڑکیا کِدھرے اِنسان ہے کوئی؟