کُکڑ بتکے ہوئے اِکٹھے
لمیاں ہوئیاں تقریراں،
گھنا دھرو پیا ہوندا اے اساں نال
کوہ سانُوں ایہہ کھاندے نیں
بالاں اساڈیاں نُوں پَلَن نہیں دیندے
تل اُبال کھا جاندے نیں،
ایہو صلاح بنی
بتکے بتکاں چھپڑ تلا چھڈ ایہناں دے
چل وچ سروور رہن
جیہڑا اصل گھر اے،
کُکڑ کُکڑیاں وائیں وسن جیویں اِلّڑ اِلّاں،
پُوری جُون نُوں ایس کارے ول آنن لئی
جُوڑی بنانی پوسی،
چلو بن گئی
جِنے ہاں ایس ویلے اسیں ممبر ہاں،
پہلا صدر کون ہووے،
اِک کُکڑ بولیا میں
اِک بتکے آکھیا نہیں، میں،
مُڑ تقریراں لمیاں ہوئیاں
فیصلہ کوئی نہ ہو سکیا،
دوئے ڈھانیاں اَوکھیاں ہو کے
کَھیہہ بِھڑن تے آئیاں
اوڑک کِھنڈ پُھٹ دھائیاں مندے بولدِیاں