کسے زمانے نکی جیہی اِک گرِاہ آہی
سادی سُتھری
انبر واہے دُدھل راہ تے بھوندی،
اُتھائیں وسیندی ہئی ہِک وست بھلیری
ناں منس ہا اوہدا،
منس دیاں ہَن دو لتّاں
ہِک دا ناں ہا قِسمت
جیہنوں چنگی آکھ کے تھاپڑدا ہا اوہ
جدوں کم سر جاوے
دُوئی نُوں ورتیندا ہا جدوں کم وگڑے
ایہدا ناں ہا، دِین دھرم،
منس دو پَیرا ہا،
کُرنگ اوہدے وچ رِیڑھ دی ہڈی
سِدھا اوہنوں کھلاردی ہئی،
منس ہا اکثر سِروں گنجا
ہِک اوہدے کول ہئی رُوح سدِیویں جِیونہاری
تے نال دو واگاں وی آہیاں
مان تران نُوں قابو رکھن لئی
ہِک لیڈر، ہِک ہم وطن،
کھاندا ڈھیر ہا منس
بُوٹے مچھیاں جنَور پکھیرو
سمجھو کھا گِھندا ہا جو کُجھ مار سکے،
کدے کدار اوہنے
اپنے ورگے منس وی کھا سٹنے،
اوہ پر کدی کدار ای سمجھو،
ہر منس کول ہِک تے ہا دِل
ہِک جگرا ہِک چِت اتے ہِک جھنڈا
ایہہ اوہدے ستلے انگ آہے
جیہناں دے سِر تے جِیوندا ہا،
پک اے مینوں منس اجیہے وی آہے
جیہناں دا جگرا ادھا ہا
اجیہے وی آہے جیہناں دا نہ کوئی دِل ہا نہ چِت
پر جھنڈیوں باجھ منس؟
ایہہ کیویں تھی سکدا ہا،
اوس گراہ وسیندیاں جِنساں وِچوں
منس ای سبھ توں کاری ہا،
خوشی خوشی اوس اپنیاں بھاگاں دا بھا چڑھا لینا
خوشی خوشی اوس مَوت سپاہی دی مرنا
یا اپرادھ دھڑَلّے دار کُماونے
جیہناں نال اخباراں اگِنتر وِکنیاں
جیہڑیاں ہُن الوپ نیں،
منس دا ورتارا سلاہیا ویندا ہا
پر آہا دو ڈک ای،
ادھا نرگِنیندا ہا
جیہدی کائی سوچ نہ آہی
تے دُوجا نار
جیہنوں سوچن دی آہی مناہی،
پر ہِک گل دوہاں دی سانجھی آہی
آہے دوئے ڈر بھرے
مَوتوں
قرضیوں
اِکلاپے توں
ہارن توں،
پر سبھ توں وڈا ڈر نالدے منس دا ہا،
سُوجھوان یا نابر اُتَھلّوُ، سنت ولی
ایہہ آہے وِرلے ای
تے تُرت چڑھائے جاندے آہے سُولی
نہیں تے گولی مار یا زہر کھوال مُکائے جاندے آہے،
ہُن اگلے ہفتے درس ہے ساڈا کُتّے تے