]سوَنّی نظام دے ڈیرے آئی اے[
سوَنّی: تُساں ڈیرا مواسوں چا آندا اے؟
نظام: ہُن ایہا مواس اے
سوَنّی: مواس تے کم ہویا تُہاڈا- جد تائیں کریندے او پئے، مواسے ای رہسو- چھڈے ڈیرے تے فوج دا ہلّہ ہویا- رُکھاں نُوں گولِیاں دے ہار پوا کے نِکل گئے سرکارِئیے-
سگھر: سُونہا گھلیا ہا اوہناں - سانُوں چتاونی کر گئی ہئی پرنیتو
سوَنّی: مینوں اپڑ گئی اے ساری کہانی- توِیت وی پی آیا ایں تُوں پِیر عالی مقام دا-
راشی: کیویں اپڑی اے ساری؟
سوَنّی: میں آپ مُریدنی جو ہوئی عالی مقام دی
موبرا: بلّے- تینڈی تابعداری نال کئیں مُرید بِلٹ گئے نیں اوہدے- نِکل آئے نیں تِلکن بازی ویڑھیوں - کئیں جائیں نِکی مالکی والیاں بھوئیں سانجھی کر گِھدی اے- سیپ دی اُچ جِھک مُکاون دا آہر وی تِھیندا اے پیا- ہر کوئی رنگ رنگ دا کسب پیا سِکھدا اے- سوانِیاں گھرہست بندی وِچوں نِکل کے کم وِچ اگیرے تِھیندیاں نیں پئیاں - جنے وی گھروکے کم وِچ حصہ پاوندے نیں پئے
سوَنّی: کرنی آپ ای درس ہوندی اے، آپے ای درشن- پر پونی وی وِچے رکھنی پوندی اے چِت چیتے دے
موبرا: ساڈی تے پونی تُوں ای ایں سوَنِّیئے
سوَنّی: میں اپنی آں، تُہاڈِیاں آپو اپنیاں نیں - رلے دا سوما تے اِکو ای اے، مَلّ ویہار- پر ہر کِسے دے رلے دا رنگ آپو اپنا اے تے سُگندھ وی آپو اپنی- جُلنی آں - جبرو دی ڈھانی ول وی پھیرا لاونا اے
نظام: کاہلا پَے ویندا اے جبرو بعضے ویلے
سوَنّی: گھٹدی ودھدی رہندی اے کالھ اوہدی- کم دے انت دا چیتا نہ وِسرے تاں کالھ کیہی تے ڈِھل کیہی
موبرا: آہ- کم انت ٹِیچا اے- کم اے تت دی سُنجان- اوہ ہر ویلے حاضر رہوے من وِچ تاں جی وی حاضر- اپنی کار کُل دی کار- دُکھ سُکھ وی سانجھا (سِینے ہتھ دھر مُڑی اے سوَنّی تے نِکل گئی اے)