]پنجے اوجھڑ لنگھ کے وستی موہرے آ کَھلے نیں [
موبرا: ہا جے جگپور
جھگر: چونہہ نُکراں چوں بھال کے وستی مُڑ آونے آں ایتھے
جبرو: تُوں نجاموں ایتھے کھلو- آ مِلنے آں تینوں تے اگلا متا پکاونے آں
نظام: میں اَوجھڑ تاڑنا
موبرا: میں چڑھدی نُکروں آونا
راشی: (چھاتی ہتھ) لہندِیوں
جھگر: اُچِیوں
جبرو: لمِیوں
(چارے وستی وڑ گئے نیں - نظام اَوجھڑ بھالدا گاوندا اے، سہجے دھمالدا)
نظام: اِٹّ کھڑَکّے دُکّڑ وجّے
نی سیو اِٹّ کھڑَکّے، تَیں مَیں دُکّڑ
اِٹ اِٹ نی کَھڑ کَھڑ کِھڑ کِھڑ
تپدا رہوے چُلھا……
نی اڑِیو باراں رنگاں دی بھاجی
چڑھ چڑھ آون قاضی غازی
کاجی راجی کر پرتائیے نی سیّو
ایہو ساڈی صلح صفائی
ایہا ساڈا ہُلھا
آون فقیر تے کھا کھا جاون
رنگ تیرھواں لاون
نی سیّو راضی ہووے بُلھا
(چارے وستیوں نِکل پرتے نیں اگڑ پِچھڑ)
جھگر: پُلس فوج دی سُوہ تے کوئی نہیں، بیلی ٹکرے نیں دو، سمجھوتی سَری اے- آ رلنا نیں
موبرا: مینوں تے جاء جاء تے یاراں دی تک باہوڑی اے
راشی: ترونہہ دا تے مینوں وی پک اے- دھرو دے جھلکارے وی نیں - وِچ وچ دھکے دے وٹ وی پئے نیں متھیاں تے- مَیلیاں جَھگیاں چوں کھیڈ کھیال دا رنگ وی جھاکیا اے تے سُتھریاں وچوں بھنگ دی سُگندھ وی آئی اے
جبرو: سوَنّی جھاکی اے اِک باریوں، نیڑے ہویاں تاں دسیوس گھوڑِیاں پنجے اَوجھڑ وچ نیں، نظام دا گاون سُن سُن ہِنکدیاں - پرتو وستیوں کم کر کے تے میں واگ پھڑائی لَینی آں آ کے- کم سیتُو کراڑ دی ہٹی تے جے مینوں
موبرا: میں جیہڑی گلیئے وگیاں اوتھے وی آئی اے منگتی بن کے- سینتر کیتی سو- کول ہویاں تے دسیوس گھوڑِیاں اَوجھڑ وچ کھلیاں نیں - پوہی اے اوہناں نُوں دھمال نظام دی، گھوڑِیاں وی فقر ہوئیاں، اوہناں وی اُدھرنا اے کاٹھیاں لاہ کے تے جنگل نواں وساونا اے-
راشی: اِک ہٹی دے تھڑیوں اُٹھ مینوں مِلی اے سوَنّی، اکھے دوہڑا بُلھے شاہی نظامے تُہاڈے چَوہر پنجَوہرا کر کھیڈیا اے- لُہار اے کہ قوال؟ پر قوال وی لُہارا ای ہووے تے وارے اے سانوں - سُنیارے قوال تے نواباں راجیاں کول بہندے ہوئے
سگھر: راشی تُوں سُتھریاں بانیاں چوں بھنگ دی سُگندھ دا دسیا اے نا تے اوسلے دے پرنیتو دے جوڑے سُتھرے شاہی گاون دے بول چیتے وِچ پِھردے نیں پئے: تے
جیہدے کول دُوجے کنوں جِنا ودھ جی
اوہا اوہدی دَوڑ ہے تے اوہا کدھ جی
بس ایتنا ای- اگوں یاد نہیں - سوَنّی مِلی تے سُنساں اوہدے کولوں - بھنگ بھنن وی اے نا- سُتھرے شاہ بھنگ دھر گیا ہویائے سُتھریاں وستراں وِچ
نظام: ایہہ سیتُو کراڑ دی ہٹی کِتھے اے جِتھے سدیائے سانوں قوالی کرن لئی سوَنّی
موبرا: جُلو میں دسناں
ساز تے نال ای نیں (ہتھاں ول سینتر)
]پنجے جگپور وڑ گئے نیں [