]لاکھی جنگل دا ستلج دی کندھی والا سِرا- نظام تے جبرو آئے نیں - سنگھنے جھل وِچ ایہہ تھاں موکلیری بھالی نیں -[
نظام: کیوں ٹھیک نہیں تھاں
جبرو: ٹھیک ای اے، اساں کیہڑا شہر وساونا اے ایتھے
نظام: جیہڑا اُجڑ گیا، ایتھوں ای بہہ وساونا اے نا مُڑ
جبرو: (ہس کے) ٹُکر نہ کھا لیئے پہلوں
نظام: (ہس کے) آہو ایتھے تے وسیئے نا
(پرنے ولھیٹیا کھول کے کھاون لگ پئے نیں، اِک جی ٹھاٹھا بنھی آن کھلا اے کول)
جی: ایہہ وی رکھو رات لئی (پرنے ولھیٹیا ہور اگیرے دھریاس)
نظام: کون ایں تُوں
جی: اوہو جیہنے اوہ دے ٹوریا ہا تُہانوں
نظام: پرنیتو؟ پر…… تُوں تے……
جی: (ٹھاٹھا کھول کے) میں سوَنّی آں، ہانی تُہاڈے نال لیائی آں -
(ترَے جنے اِک اِک کر کے جھلوں نِکلے نیں)
سوَنّی: ایہہ جے موبرا…… ایہہ جھگر…… تے ایہہ راشی- مِلو- ایہہ نظام اے تے ایہہ جبرو
(ترونہہ جنیاں کول بدوکاں نیں تے نال گولیاں دے ڈبّے- سوَنّی مُڑ جھل وڑی اے، دو بدوکاں لے پرتی اے- اِک نظام نُوں پھڑائیوس تے اِک جبرو نُوں)
نظام: (سوَنّی نُوں) ایہہ تُسیں کِتھوں گِھنیاں، کیویں
سوَنّی: گہنے ویچ کے وہاجیاں جُوڑی ساڈی، گولیاں تُسیں آپ ای گِھنسو ایہناں گوریاں کنوں (جاندی) میں اِتھائیں ہونی آں - جدوں لوڑ پئی آجاساں (ٹُر گئی اے)
موبرا: (گئی سوَنّی والے پاسے سینتر کریندا گاوندا اے) مائی سپُوراں پُورن بھانڈا، حیدر (اپنے ول سینتر) ڈنگراں ڈھوراں جیہا
نظام: ڈنگراں ڈھوراں ای تے رانجھیاں دا ہِیراں سنگ میل کراونا اے تے سسّیاں دا پُنواں سنگ
موبرا: انگریزاں کولوں جان چُھٹے تے تاں - کیویں سوچیائے اوہدا تُساں -
نظام: انگریزاں کولوں ای نہیں - ایتھوں دیاں سیالاں تے کھیڑیاں کولوں وی- زمیندار وپاری، دوئے دِھراں رل کے دَبلّی بیٹھیاں نیں سانوں، دونہاں نال ٹکرنا پوسی- انگریز دی جُتی چٹ کے ساڈیاں سِراں تے دھرائی اے ایہناں ای-
جھگر: ساتھوں کھوہ جیہڑا کھاتیاں چ بھریانیں سانوں ایہناں کولوں کھوہنا ای پینا اے
نظام: کُھسا کھوہ پرتاونا پینا اے اوہناں نُوں جیہناں دا کیتا اے
راشی: آہو سانجھا کرن تے رلن اسانوں -
نظام: جِتنے رلسن کم ساڈا اوتنا ای ودھسی- اجے تے پنجے ای آں، اوہناں کول فوجاں پُلساں نیں - اساں اوہا کرنا اے جو سردا اے، جاچ بھال کے
جبرو: پہلوں کِتھے چلیئے
موبرا: جگپور- دُور دا دُور تے نیڑے دا نیڑے- راہ اَوجھڑ اے نا سو واپسی سُکھالی اے سانوں - پُلس فوج نُوں مگر آوندیاں ویلا لگسی
نظام: آہو، ٹھیک اے- اصلوں نال نیں وستیاں جیہڑیاں اوہناں نُوں نہیں چھیڑنا اجے……
ہُن پہر تے لنگھ گیائے رات دا، دو پہر سوں لینے آں وارو واری پہرہ دے کے، چوتھے پہر نِکل پوساں، پہلا پاہرا مینڈا
جبرو: دُوجا مینڈا
موبرا: (چھاتی ہتھ) ترِیجا
راشی: چوتھا
جھگر: انتلا، سبھ نُوں جگاونا……
(چارے گھتارے وِچ لمے پے گئے نیں نظام بدوک پھڑ دوالے گیڑا لاوندا اے، چونہہ پاسیں رُکھاں اندر جھاکدا)