گھر گھر وِچھیا تسَلّا مصلّا،
پھُپھڑاں تائیاں سَوہریاں پیکیاں
ٹیکے متھے پنج ویلے،
جَتھّے جُڑے مسِیتاں اندر
تانگھ بِھڑن دی ساہاں وِچ سرے
باہر کِسے نال نہیں تے آپو وِچ ای سہی،
اِک وڈا عالم
منیا پروَنیا،
نِکیاں ہوندیاں گوانڈھی ساں اساں
کٹھے کھیڈے پلے
وڈیاں ہو کے اصلوں وکھری سوچ تے کرنی ہوندیاں وی
گھٹو گھٹ اِک واریں مہینے سرپر مِلنا اوہنے
آکھنا ''سیاست، پرے پرے''،
لُک بہہ میرے نال اوہنے چُسکی لاونی،
اِک دِن عجب ہوئی،
ستراں وِچ اسیں اپڑے پئے ساں
ناں اوہدا عُلماواں دی شِکھر تے آہا
مِلے آں تے گُھٹ لا آہندا اے مینوں
''ہُن ویلا مُکن تے آیا پیا اے،
سچی تیرے نال کر جاواں
تے رڑک پُرانی اندروں کڈھ کے اگلے پندھ پواں،
جیہڑی سیاست کیتی اساں
مُدّا اِکو سی
اوکھے کِدھرے تیرے جیہیاں دے لگ مگرے
سَوکھیاں کولوں
کُھسی اپنی کَھسّن تے نہ آ جاون،
ایہہ تیری میری پرائی ویٹ ای''
گلاس پھڑا مینوں آہندا اے
''وِچے ای ایہدے رکھیں''