سپ دھرتی جایا
کُچھڑ وسدا
ڈِھڈ رگڑدا باہر آیا،
کوٹھیوں واج پئی
ایہہ سپاہی اے
ایہنوں سپاہ وِچ جمع کراؤ
ڈوری پاؤ نتھ نک ایہدا
درجہ بدرجہ سپہ سالار دے ہتھ پھڑاؤ
جیہنوں لڑاؤ لڑ جائے
جیہدے کولوں مرواؤ مر جائے
رکھو خزانے اُتے ایہنوں
نیڑے کِسے نُوں آون نہ دیوے،
جیویں حُکم ہا تیویں اسیں کر دِتا،
پچُھنے آں کدیں اُپر خزانے بیٹھے نُوں
پتہ ای وِچ کیہ اے،
میٹ کے اکھیاں گھیس جیہی وٹ لیندا اے
دھڑکا سانوں لگ ویندا اے
سوچے پے نہ گیا ہووے
ایہہ خزانہ ہے پھوکانا
ساڈے ورگیاں کِیڑ کیڑاں دی آہیں واہیں بھریا
رُڈ کڈھ ہیٹھو ہیٹھ تخت دے آن سرے
ڈنگ پاءِ شہنشاہ وِچ دھرے،
اساں مناسب ایہا جاتا
دو سپادھے کر درباری
سِر تے ایہدے بہاؤ،
اکھیں نجھیندے رہن ایہدیاں
اِک دِنے اِک راتیں،
جس دم تاڑن گہر فٹافٹ بِین وجاون
ایہنوں حال کِھڈاون