''ایویں کاں کنّ پئے کھاندے نیں''
''پاؤ بھورا، کھاون، اپنے کن بچا لؤ''
''کرنے آں بندوبست اوہناں دا،
تینوں دس کیہ پائیے،
جو گل کرو
تُوں بھُکھے ننگے کر اگیرے
آپ پِچھانہہ ہو جانا ایں''،
''سچی دسّاں،
کانواں نال یرانہ اے میرا پُرانا،
ہوواں جِتھاں میں کلّم کلّا
آ کول کَھل ویندے نیں،
اکھ وِچ اکھ پا سانگا یاد کرویندے نیں:
’کرت اساڈی اَیتنی او مِترا
جِتھاں جدن اُجاڑا تِھیوے
اپڑ کُوک مرینے آں
سُن ورساند کریندی اے واء
اُجڑے بَوہڑ مُڑ جھوک وسیندے نیں'' ‘
''اوہا گل،
چار پیسے نیں جیہناں کول، اوہ ساڈے ورگے
جِتھے وی بیٹھن اوہا تینوں اُجاڑا اے،
ایہناں تیریاں یاراں کالیاں نُوں وی
رہندا ایہو پواڑا اے''