فرید بھنڈار

(سُرَینی مستؤل دی)

کوٹھے لاہن میں جِس ویلے جانا

ایم اے پاس مُنڈا مہراں دا

آئی سی ایس ہوون نُوں پِھردا،

سَینتاں گُجھیاں کرے مینوں، وِچ وِچ کُھلیاں،

کڈھ کڈھ جِیبھ وکھاوے،

اک میں آکھیا اِک دِن:

ایہہ جھاڑُو پِچھے ٹھوک میں مور بناونا ای،

پَیل تینڈی مُڑ جگ ویکھسی،

ہسیا، ''گل پرانی ہو گئی اے، ہُن ایہدی لوڑ کیہی،

جھاڑُو تے پُوچھل ہوئی جماندرُو ساڈی

پھیر کے پَیڑ بھُجائِیدے نیں،

ایہو پَیل تے جگ پیا پاوندائے

کیہنوں کیہ وکھاونا ای''،

چنگا،

لاہ پُوچھل میں مُونہہ تینڈے وِچ دینی آں

تینڈی سوت1 ہی تینڈے پیڑ2 وکھاسی،

جگ تینڈے نُوں موروں چور بناسی،

ہسیا، ''چور نُوں چور پھڑاونا ای''

کوٹھے لاہونے چھڈے میں منگ کے کھاون لگ پئی،

روک کار سرکاری اِک دِن سَو اوس مینوں پھڑایا،

موڑ میں آکھیا: رَکھ جِیبھ ایہہ مُونہہ اپنے وِچ،

اوہ مُڑ اوس راہوں نہ آیا

1- سوت= صفائی/ سوتن= جھاڑُو پھیرن، صفائی کرن- 2- پیڑ= پیراں دے نشان-