رُکھاں تھلّے
چاولاں بھری پرات دھری اے
پانی بھری کُنالی،
بُلبُلاں دیسی
کالی سِری تے لال بُنڈیری
جُھنڈ ڈُھکیا اے،
گُھٹ پانی بھر، دانے چار چُگ اُڈ گئیاں نیں
مینوں آوندا ویکھ ساریاں،
ایہہ اِک نہیں گئی
پانی والی کُنالی وِچ لہہ لہہ ڈُبکی ماردی اے
چڑھ چڑھ ٹاہنی پھڑک پھڑک پَر چھنڈدی اے،
رگڑی اے چُنج چنبا لگر نال
میرے کول کھلوون دا اوہنوں ڈر فِکر وی کوئی نہیں،
کیہڑی لبیڑ ورانی ایہنوں لڑ چمبڑی اے
ڈر بُھکھ وی ایہہ بُھل گئی اے،
ڈُبکی پرچھنڈ پرچھنڈ ڈُبکی
چنگا جَھٹ لا اُڈ وگی اے