کل وِیرو پھُلیرن لنگھی اِتھاؤں
نکی جیہی ایہہ بُوٹا کہ بُوٹی
جھل آکھ لؤ
کول کھلو نرت سینتراں کر کر گا سناوے ایہنوں
“پتر تیرے نیں گوڑھے پِھکّے ہرئیل اڑئیے
وِچ وِچ چِٹل ہریاں چِھٹاں والے
سُوہے وی نیں
کُجھ سُوہے ہوون دے اُدّم رُجھ بدامی ہو گئے نیں
مہندی وی لائی بیٹھے نیں کہ بیٹھیاں نیں
ڈُس ادھ کُھلے پیازی کُچھڑ”
ایتنی آکھ اُڑ کن لا کھلوتی وِیرو،
سِدھی ہوئی تاں ہس پچُھیم
کیوں، کیہ آہندی اے،
وِیرو گاوندی اے:
“پتر نہ پھُل ایہہ پھُلیرن مینڈِئیے
ایہہ اسماتر بُل ہوئے
سُنی او آہندے جو پئے نیں:
مِتھی بیٹھے او جیہڑا اساڈی سَک بارے
اوہ چھنڈ آؤ
ہِین مہِین ہو مِلو اسانوں
مانو کھیڑ سترنگی”
“بانہاں لمیاں سِدھیاں نال کیوں چائی کھلے او”
“نہیں پھُلیرنے،
ایہہ نہ بانہاں نہ ڈانگاں بلماں
ایہہ نی قلماں ست مُونہِیاں
ویکھ نہ ہر مُونہہ وِچوں نِکلن پنج پنج جِیبھاں سترنگیاں،
آویں نا راتیں
بلسن کالیاں بتیاں،
تینوں رلائیے پائیے گُھمر انھیر
نِت ڈُبدا دینہہ ترائیے”