“نِکیاں گلاں ای اوڑک وڈھیاں ہوندیاں نیں”
“نِکیاں ای رہن تے چنگا نہیں؟”
“آہو،
کرنہاراں دِیاں اپنے ہتھاں تے آپے لِکھیاں”
“جوکھ گوکھ کے ایہناں نُوں
ہوئی ورتی پئی ہووے نویں
ہتھوہتھیں سنیہا تھی کے
کرے صلاحیں چِت چیتے نال جی جی دے
سانجھی ورتن سارے1 سواہری بھانجی2”،
“نِکیاں گلاں وڈِیاں تھی کے
چڑھ کُرسی تے بہندیاں نیں
مُڑ لہندیاں کوئی نہیں”
“کُرسیاں والے آپو اپنی کر کے وڈیری اِکدوجے دی بھندے نیں
کِرچاں ہو کے کِھلردِیاں
چُبھ چُبھ واہنیاں پیراں نُوں
ٹُرنوں آتر کرن دا چارا کریندیاں نیں”
-1 سارے= بناوے، تیار کرے- -2 بھانجی= بھاجی، حِصہ-