کیوں گنبد بُرج تیاگے
کندھاں کچیاں ٹھاہراں کدوکیاں کیتیاں تُساں
اُڈار ہوون لئی،
گنبد بُرج منارے جدوکے اُبھرے اُبھارے
تدوں دِیاں تُسیں اوہناں تے بیٹھیاں ہوئیاں سَو
یا ہَولی ہَولی اوہناں دی پکیائی اُچیائی بھرمایا تہانوں؟
نِرا بھرمایا ای نہیں
چوگا وی چنگا چوکھا چُگایا،
تے کندھاں کچیاں دا
ہُن تہانوں خیال کیوں آیا
اوقافی مَولویاں تے نہیں تراہیا وِٹھاں تہاڈیاں پاروں؟
یا عاماں لوکاں وِچ
جنانیاں وِچ خاصکر
نِت پسردی مَنتا تُہاڈی پاروں،
یا کچیاں کندھاں والِیاں نال
کوئی سانجھ ساک اندروکا
بُھلیا صدیاں دا
ہُن مُڑ چیتے آیا؟
اساں کچہری نہیں کوئی لائی
پُچھنیاں ہاں پئیاں
ہوئیاں جو پکھنو (مَنّو تُسیں نہ منّو)
پکیاں ٹھاہراں نوں
کچیاں کرن دی آس
مُراد اساڈی ہوئی