لاہ لنگوٹ گُھلاٹ وڑے اخباریں کھاڑے
جِیوکا لَکھاں دا
پُورے ورھے دا
ایہناں دا کھاجا اِک ڈنگ دا ہے،
شُوکیاں چینلاں:
''ہلا وئی شیرو
ہلا ہاتھیو
ویکھو جی وِینی
ویکھو جی ٹِھبی
اوہ لؤ وَجّا جے دھوبی پٹڑا
چھڈاؤنا پینائے بَرَبّر گھول خلیفہ جی،''
گھول ایہہ لوک دی اکھیں سماون لئی نہیں ہُن
اوہ اکھ تے ایہناں اپنے بھانے
کر مکڑی چروکی مِلکھ دے جالے ڈاہی ہوئی اے،
نِت نِت گُرز اخباری دھرا موڈھے تے
گھول ایہہ گھڑی بُھلاون لئی ہے پولے ہوون دا سہنسا
جیہڑا ٹلدا ای نہیں
رنگ وٹا وٹا پیا پھیرے پاؤندا اے:
'اوہو! پھڑ پھڑ پٹھے،
چَر چَر ہڈیاں، اوہو!
دِل کہندا اے اجے خوراک دی لوڑ بڑی اے'