فرید بھنڈار

اساں رڑے ہاسے،

جُگ جُگ سانوں دلیندے آئے شاہ سیاہ اسوار

رَت بِھڑ موئیاں دی

وِس ہوئی

اَس مُدت مدِیدِیں پِیتی،

گھاہ دی پُونی وی

لہہ وِچ ساڈے تند ہو سرنوں نابر،

ویہندی آئی رُوڑی اسانوں

سمجھوتی اوہدی نِجھاون دی

ویہل کیہدے کول آہی؟

اساں نر اوہ نار

کِتھے جودھے سورمیاں دے رن پِڑ

کِتھ ڈھیری اوہ رَد کباڑ،

لنگھیا ویلا

سنے اسواراں گھوڑے بِیت اتِیت ہوئے

گِڑ پئے ٹینک ٹرک

رن پِڑ کتھا دی رِیت ہوئے،

لانگھا ڈھور جنَور تھئے اس

وِٹھ گوہے رس اندر چھیڑی تانگھ اچرج

رُوڑی دی سمجھوتی دا

ہویا اچیت گیان،

ٹوہِیئم اوہنوں

ہس بولی اے تُساں تے نر ہو رڑیؤ اڑیؤ

ہے وِیرج وِچ تاں آؤ میل کروں،

کن سن وِچ ای کیتی اساں

رُوڑی راتِیئے1

ہُنے ہُنے پئی تِھیندی اے سانوں اپنے سُن ہوون دی سار

پئے آں در تینڈے

کر ہُن جیویں توں جانیں،

ہس اُلری اے پوش پُشاکوں واہن قلندر

ننگ بھوگ دی موکھ کیتیوس تن ساڈے نوں دان،

آئی اے واء

سِلھ چھنڈ وتر کر گئی،

کن کن پھوٹ ساول دی ہوئی اے

رنگ الستی لگا تدوکا نہیں لہندا

1- راتی= 1) پریم وِچ مگن، 2) رات واسی، 3) آپوں رات ہوئی-