(رات- تھل- سٹّھاں پَینٹھاں دی ریتی ٹپری اگے بیٹھی ہانڈی پکیندی پئی اے- پتھر کوٹوں نِکلی راجکماری ہربنسی ایتھے اپڑ گئی اے-)
ریتی: کیہ پئی لبھنی اے راجکمارِئیے- ایہہ کوئی چونکی اے پتھر کوٹ دی؟
ہربنسی: میں تے راجکماری کوئی نہیں
ریتی: بستے تینڈے دی بوء تے ایہا آہندی اے-
(ہربنسی بستہ لکوں کھول بھوئیں تے سٹیا اے)
ریتی: (ہسی اے) ایویں تے پِچھا مگروں نہیں نہ لہندا-
ہربنسی: کیویں لاہواں
ریتی: پچُھ اوہنوں جیہنے گھلی ایں ایتھے
ہربنسی: کون؟
ریتی: تینوں پتہ ہووے
ہربنسی: پتھر کوٹ توں ویکھیا ہویائے؟
ریتی: انھیاں نوں وی پیا دِسدائے
ہربنسی: اندروں؟
ریتی: آ بہہ اگ لاگے- سُنا نا اندر دی-
(ہربنسی بہہ گئی اے)
ریتی: ڈھونڈ تے تینڈی ہوندی پئی ہوسی، ایہدھر وی متے آ نِکلے کوئی، پرتنا ای تاں راتو رات ای پرت جا، اج پندھ جیہڑا دُھپے کر آئی ایں بھلکے نہیوں ہونا-
ہربنسی: میں ہُن پرتنا کوئی نہیں
ریتی: ٹُر جا مُڑ اوہدے کول
ہربنسی: کیہدے
ریتی: جیہنے تینوں گھلیا اے اِتھائیں
ہربنسی: اوسے تے آکھیا اے ہُن تُوں پرتنا کوئی نہیں -
ریتی: آکھ مُڑ اوہنوں تینڈی شکل وٹا دئے
ہربنسی: وٹا دِتیوس
ریتی: میں تینوں کیویں پچھان گئی آں؟
ہربنسی: تُوں تاں اوہنوں پچھاتا اے جیں مینوں اِتھاں گھلیا
(ریتی اُٹھ ہربنسی نوں گل لایا اے، مُونہہ چُمیوس-)
ریتی: اصلوں اوہا ہو رہو، پتھر کوٹیاں نوں اپنی راجکماری نہیں لبھنی-
ہربنسی: کیہ آکھ میں تینوں بُلاواں
ریتی: ریتی- تکنی ایں پئی دوالے سمندر ریت دا- اِک مُٹھ میں وی ہاں
ہربنسی: تُوں جانُو کیویں ہیں ساری گل دی
ریتی: نَیئیں دس گئیاں نیں
ہربنسی: نَیئیں؟ کِتھے، کدوں
ریتی: دسایا اوہناں،
آئیاں اساں
آ مناں 1 وسائیاں
کڑے سہاگے ہل پھروائے دھرتی تے
فصلاں لگ گئیاں،
مَلّ اپھارے ڈکر ڈکارے
اوڑ سَوڑ دے ہاڑے،
سَودے گیر ہوئے راجکار
جد رُت پرتے نہر نویں اِک کڈھن ساڈے وِچوں
ودھے جھاڑ تے پسرے لاہا
لگن لارے تے وجن نعرے،
وِتوں باہر جاں وتر ہویا، دھرتی جر نہ سکی
ماندی پے گئی
چھڈ اُگاساں گلن لگی
1- مناں = جمع من (من، کندھی، دریا دا کنارا)-
جِتھاں پیر دھرو پانی نِکل کھلووے
کرم کوئی پِیر پیغمبری ناہا، سیما ہا
پانی نمک حلالے کر کر روز ویاہی آیا کِلّے کنالاں،
آکھن نیئیں، گئیاں اساں
زمانہ ریتا ہویا
ہویا چیت اچیتا،
ریتے اچیتے چوں
کِتے چوہا پریتی سریا
نس نس ہفدے پوہتے تَسّے
پِیتا سُرت رلی
دھر پتھر دوالے تُرت فصیل ولی
چاڑھی وت پتھرِیل چوکھنڈی
اندر قلعے بند ہو بہہ گئے،
پیڑِھیو پِیڑھی لڑ بِھڑ تھیندے آئے راجے مہاراجے
ریتڑ جُوہ دے
آپو وِچ پرنیندے آئے،
نیئیں دسایا اساں ای سریاں ہاں
سوما ہو کے ریت اچیتے وِچوں،
ایہناں پریت اساڈی
ول چوکھنڈی وَیر ورودھ کر پِیتی
اوسے دی تَس دِتی لوک نوں
آپوں چوکھنڈی قید ہوئے
قید خدائی کیتی،
ہن رل خلقت چوکھنڈی اُدھیڑے
اُدھرے آپ تے ایہناں نوں وی چُھٹکارے
مُکے باندھ کُچیتے دی
سومے رل مُڑ نیئیں ہوون،
ڈر ہے اندر راجکاراں دے ہر دم
متے خلقت رل نہ ونجے چوکھنڈی اُدھیڑن
اوسے ڈر نوں ایہہ خلقت دے اندر لاہون دا آہر کریندے رہندے نیں
سرک ونجے کوئی پتھر چوکھنڈیوں
ایہہ اوہنوں کم چُڑیلاں دا دسدے نیں،
ہر پل لوک دے من وِچ ایہا گل پاوندے نیں
انساناں دا قدرت دا تے فرض تے ہویا
رکھ چوکھنڈی دی
ہربنسی: سچی دساں میں وی تے سرکے پتھر راہیں نِکل چوکھنڈیوں آئی آں - (دوئے ہسیاں نیں، ریتی مُڑ گلوکڑی پائی اے ہربنسی نوں)
ہربنسی: کوٹ اے چار منزلہ
پوری ٹابری راجیاں دی اندرے وسدی اے
ساریاں میریاں پھُپھیاں ماسِیاں چاچِیاں تائِیاں
وِچے ویاہیاں جم جم پُتر دیندیاں ایہناں نوں آئیاں
تخت چڑھے دی میں بھتریجی،
ایسے کمے ای میں وی ڈیہنا اے
میرے اندروں کِسے دی کُجھ نہ لگدی آہندی اے:
میں نہیں اِتھاں رہنا
میں اپنی پالنہار مائی رواڑی نوں پچُھیائے
(قلعہ پتھر کوٹ- چوتھی منزل- راجکماری ہربنسی دا کمرہ- سٹھ پینٹھ دی رواڑی ہربنسی دے وال واہے نیں تے اوہنوں شیشہ وکھائیوس)
رواڑی: ٹھیک اے راجکماری؟
ہربنسی: ماسی رواڑی، تُوں ہُن مینوں ہروَنّی کیوں نہیں آکھدی- راجکماری راجکماری ہر ویلے-
رواڑی: تُسیں ہُن جوان ہو گئے او راجکماری- ہُن تہاڈی وار آون والی اے
ہربنسی: وار؟ کیہڑی
رواڑی: ویاہ دی
ہربنسی: کیہدے نال؟
رواڑی: کِسے راجکمار نال- فیصلہ ہوندائے پیا-
ہربنسی: میں ویاہ کوئی نہیں کراونا
رواڑی: اِنج دِیاں گلاں نہیں سوچی دِیاں
ہربنسی: میں نہیں سوچیا
رواڑی: تاں ہور؟
ہربنسی: کیہیں دسایا اے مینوں
رواڑی: کیں؟
ہربنسی: تینوں کیوں دساں
رواڑی: کَیں نوں دسنا اے
ہربنسی: ماں اپنی نوں
رواڑی: (کول ہو کے) باراں ماواں نیں تہاڈیاں راجکماری، کیہنوں دسیسو-
ہربنسی: کِسے نوں نہیں - میری ماں تیرھویں اے
رواڑی: تیرھویں، کون؟
ہربنسی: تُوں جیہنے مینوں پالیا سمھالیا-
رواڑی: پالن سمھالن تے کم ہویا مینڈے ورگیاں چاکراں دا- ماواں ایہا باراں نیں تہاڈیاں راجکماری-
ہربنسی: ماں تے ہِکا ہوندی اے، مینوں سچ دس اوہ کون اے نہیں تے……
رواڑی: بس- ہور نہ کُجھ ہُن آکھیں ہرونّی- سچ پئی دسینیاں میں تیری ماں نہیں - ہوندی تاں ایتھے نہ ہوندی-
ہربنسی: کِتھے ہوندیوں
رواڑی: جِتھاں اوہ گئی
ہربنسی: کون
رواڑی: ماں تیری- گل نہ مونہوں ایہہ کڈھیں ہرونیئے- پٹُھی کَھل لہسی آ میری ایس عُمرے-
(نِکل گئی اے)
ہربنسی: سار پئی تھیندی اے- سچ ای دسیا اے دسن والی-
ہربنسی، تُوں اِتھاں کِسے دی کُجھ نہیں لگدی- ایتھے کوئی کِسے دا کُجھ نہیں لگدا-
ہربنسی (ٹپری کول ریتی نال):
اج اُٹھی آں سرگھی، پتھر پِچھلی کندھ دا نکلیا ویکھیائے میں
وِچوں باہر جھاتیائے،
کندھوں ہیٹھاں توڑ زمین تائیں نکے وڈے پتھر کِھلرے پئے نیں
مینوں پَوڑی جاپی ٹُٹی بھجی-
بستہ پانی دا بنھیا لک،
نِکل مگھوریوں لمک پوڑی تے آ گئی آں
کِھسکدی چمبڑدی پتھراں نوں زویں تے لہہ گئی آں
چوکیدار وی کوئی نہیں اُتھائیں
اُجاڑ ول نِکل پئی آں
تپدے دینہہ وِچ ٹُردی نِکل کِتھائیں گئی آں میں جاتا کوئی نہیں
رات ہوئی اے
جُتی لاہ میں ہتھ پھڑی اے،
ٹھنڈی ریت تے چلدی گئی آں
لو دِسی اے نمھی جیہی
تینڈے کول اپڑ گئی آں
(کُڑی اِک ہربنسی دے ہان دی آئی اے)
ریتی: آ نی مُٹھے ریت دِئیے
کُڑی: ایہہ کون ای
ریتی: ٹوہ سیان تُوں
کُڑی: گُھٹ سومے دا جاپدی اے
ریتی: گِھن ونج ایہنوں - ہوندی اے پئی ڈھونڈ ایہدے پرچھاویں دی جیہڑا چھوڑ کوٹ وِچ آئی اے
کُڑی: آ جُلوں
ہربنسی:کِتھاں
کُڑی: ٹِیسی روہ دی تے، اوتھے پتھر کوٹِیا کوئی نہیں آ سکدا- ڈیرا چُڑیلاں دا ہویا
ہربنسی:اوہ کون نیں
کُڑی: تُوں میں، ہور وی نیں
(دوئے ہسدیاں نس گئیاں نیں -)
ریتی:
واجاں
اندرے اندر کد رہیاں
چُپ گلیاں وِچ دِلاں دِیاں لہہ پولے پیریں ایہناں
بِھیڑے بوہیاں اوہلے کھلیاں ہانناں نِت لبھ لئیاں
واجاں
اندرے اندر کد رہیاں،
کنّاں جدوں بہائیاں اندر
اُٹھیاں ہتھ بن گئیاں
واجاں اندرے اندر کد رہیاں
ہس رس کِکلی لگیاں پاون
کہیاں اتے ان کہیاں
واجاں اندرے اندر کد رہیاں
(پاہرو نال نائب، وردی وِچ، اگیرے ہو لوء وِچ آئے نیں -)
پاہروُ: سُن لئیاں نیں واجاں تیریاں آ گئے آں
ریتی: بیٹھو، ٹُکر کھاؤ
پاہروُ: کیہ پکایا ای
ریتی: چِکڑ چھولے
پاہروُ: توہیں کھا- رجے پئے آں - اپھارا کراؤ ایں
(نائب نوں) وڑ اوئے کڑیا- اندر ہولا کر ایہدا-
(نائب ٹپری وِچ وڑ پھولا پھالی کرن لگ پیائے- پاہرو دی اکھ بچا کے کوئی شے چا کھیسے وِچ پائیس-)
پاہروُ: (ریتی نال) ایس پاسے تے نہیں آئی راجکماری؟
ریتی: آئی اے
پاہروُ: کِس پاسے گئی اے؟
ریتی: کِسے پاسے نہیں
پاہروُ: کِتھے، پھیر وی
ریتی: کِتے نہیں، ایتھے ای اے
پاہروُ: (اچنبھا) دس کِتھے
ریتی: ایہہ تیرے ساہمنے
پاہروُ: (ہسیائے) گئی اے نا ماں تیری پتھر کوٹ جوانی ویلے منگن خیر، اوتھوں گِھن آئی تینوں ڈِھڈ دھرا کے-
سِیساں دینی ایں پئی گاون گاوندی بہہ کے ایتھے اجے تائیں - (بانہہ ریتی دی نپی سُو) ہا کڑا چاندی دا ای سِکے دا؟
ریتی: ایہہ نہ لاہیں
پاہروُ: کیوں
ریتی: چُڑیلاں چنبڑ جاسن
پاہروُ: مینوں؟
ریتی: نہیں مینوں - تیڈے کولوں تے ڈردیاں ہوئیاں
پاہروُ: (کڑا ریتی دی بانہوں لاہ کے پاہرو اپنے تھیلے پایائے) اسیں اوہناں دے کھسم جو ہوئے- آون تے مینوں واج مار لئیں -
نائب: (باہر آیائے ٹپریوں) کُجھ نہیں اندر سرکار
پاہروُ: کیوں کڑیا، کھانے نی ایہدے چِکڑ چھولے
نائب: رہن دیو سرکار، بُہتے ای گلے ہوئے نیں
(دوئے ہسدے نِکل گئے نیں)
ریتی: (مُڑ گاون لگ پئی اے)
واجاں
اندرے اندر کد رہیاں ……
-----