بھٹھہ مجُور دی
(جیہنوں جُوڑی والیاں شہر بُلا اِکٹھ وِچ گل کرن دا آکھیا)
کیویں دسائیے تُہانوں باوُ،
اکھر تے باوُاں کول ودھیرے ہوندے نیں
تقریر بیان بناون جوگے،
ساڈے کولوں تے اِٹاں ای بنواندے نیں بھٹھیاں والے
اکھر ساڈے اپنے بھانے اِٹاں ہیٹھ دباندے نیں
نہیں جاندے اِٹاں ہیٹھ تے ہوندا کُجھ نہیں
اِٹ اِٹ ساڈی اکھر ہوندے نیں
کارخانے تے دفتر ہٹیاں محل مکان جیہڑے پاندے نیں
نہیں جاندے اُسرگے ہتھ لِکھیاں کتاباں ہوندے نیں
بولی ساڈی جیہناں دی سانجھی
اوہا پڑھ سکدے نیں
اکھر وکھ وکھ جوڑ نویں سِر
نویاں کتاباں اوہا لِکھ دھر سکدے نیں